Bodosa Newspaper

July 27, 2024
Facebook Youtube
Menu

Bodoland

डिब्रुगड़ मुलुग सोलोंसालियाबो सानसेनि मेहेरगोनां हाबाफारिजों बर’नि बिफा बड’फा उपेन्द्र नाथ ब्रह्मनि 67थि गोथार जोनोम सानखौ फरायसा सान फालिदों ।

by

डिब्रुगड़ ,31 मार्च : बर’नि बिफा बड’फा उपेन्द्र नाथ ब्रह्मनि 67थि गोथार जोनोम सानजों लोब्बा लाखिनानै आसाम सोरखारा दिनै गिबि खेब आसाम नाङैनो 31 मार्चखौ “फरायसा सान” महरै फालिनो खावलायनाय लेखा डिब्रुगड़ मुलुग सोलोंसालियाबो सानसेनि मेहेरगोनां हाबाफारिजों मुलुग सोलोंसालिनि सिङाव थानाय बड’ बिफाननि नब्लाङाव 67थि बड’फा उपेन्द्र नाथ ब्रह्मनि गोथार जोनोम सानखौ फरायसा सान महरै खुंफुंनाय जायो। बे हाबाफारिखौ डिब्रुगड़ मुलुग सोलोंसालिनि Physical Education नि गाहाइ ड० मन्तु बर’वा मासि लानानै सामलायनाय जायो। बे हाबाफारियाव  गाहाइ आलासि महरै डिब्रुगड़ मुलुग सोलोंसालिनि मानाव गेदेर Vice Chancellor प्रफेसर जितेन हाजरिका, थांखिजानाय बुंथिगिरि महरै History बिफाननि गाहाइ ड० चन्दन कुमार सर्मा, बुंथिगिरि महरै डिब्रुगड़ मुलुग सोलोंसालिनि Registrar ड० परमान्द सनवाल आरो Education बिफाननि मानगोनां प्रफेसर प्रबिन कुमार गगै बिथांमोनहा बाहागो लायो। बे हाबाफारियाव बराय बिबुंथि होयो ड० प्रतिमा ब्रह्म, लेङाइ बिबुंगोरा बड’ बिफान, हाबाफारियाव बाहागो लायो फारियै ड० बृदुल बसुमतारी, लेङाइ बिबुंगोरा बड’ बिफान, मुस्रिमा मुनमि बर’, लेङाइ बिबुंगोरा बड’ बिफान, टाइ रावनि फोरोंगिरि उदयण बरा, मेदिनि माधब महन, Performing Arts नि बिबुंगोरा तपासी हाजवारी, Applied Geology नि लेङाइ बिबुंगोरा रतमालि बसुमतारी, Chamestry बिफाननि लेङाइ बिबुंगोरा पृथिवीराज काख्लारी, मिसिं रावनि फोरोंगिरि प्रफेसर पबित्र कुमार पेगु आरो दिपटी पेगु, करियान रावनि फोरोंगिरिफोर फारियै की.चुक ली, बिकास आरो पार्क बिथांमोनजों लोगोसे गुबुन गुबुन बिफाननि गासै सा 140 निख्रुयबो बांसिन फरायसाफोरा बाहागो लाफैनानै हाबाफारिखौ जाफुंसार खालामो।

गुरुदेब कालिचरन ब्रह्म त्रासआ 5 थि गुरुदेब कालिचरन ब्रह्म बान्थाखौ होनो थाखाय फोसावबाय

by

बड’सा थान्दै, गसाइगाव, 30 मार्चः गुबुन गुबुन बोसोराव होबोनाय बायदिनो देग्लायबो 2023 गुरुदेव कालिचरन ब्रह्मनि 164थि जोनोम सानजों लोब्बा लाखिनानै फैगौ 18 एप्रिलाव  दिल्लियाव खुंफुंनो लानाय मोनसे हाबाफारियाव गुरुदेब कालिचरन ब्रह्मनि जोनोम सानजों लोब्बा लाखिनानै गुरुदेब कालिचरन ब्रह्म त्रासआ 5थि गुरुदेब कालिचरन ब्रह्म बान्थाखौ होनो थाखाय मोनसे जुरि बर्टनि सायख’नायजों होनो फोसावबाय। मिथिनो मोनाय बायदिब्ला, देग्लायनि बे बान्थाखौ मोननो हादों परेश मेन अफ इनडिया पद्माश्री जादब मलाय बायेंआ। बिथाङा सासे समाजनि थाखै नांथाबनानै समाजनि जानानै अराय मोजां खामानि मावग्रा सुबुं बिथाङा समाजनि जानानै आराय सम हाबा मावो। बिथाङा मुलुगनांआरि दरबाराव मिथिसार जानाय सासे सुबुं। बिथांखौ सासे बान्था मोनगिरि महरै मोननो हादों बेखौ गोर्बोजों गोजोनाय फोरमायदों गुरुदेब कालिचरन ब्रह्म त्रासनि आफादगिरि एबा गथ’सा बान्था मोनगिरि ड० अजित बर’आ। बे हाबाफारियाव गाहाय आलासि हिसाबै बाहागो लाफैगोन भारतनि मिनिस्थार अब  ट्रायबेल एफेयारस श्री अर्जुन मुन्दा, बि टि आरनि गाहाइ मावफुं सोद्रोमा प्रमद बर’, आसामनि मन्थ्रि उर्खाव गोरा ब्रह्म, राइज्यो सभानि एम पि रोनगोरा नार्जारीजों लोगोसे गोबां मेलेमजि सुबुंफोरा बे हाबाफारियाव बाहागो लाफैगोन होनानै खौरां मेल गेजेरजों ड० आजित बर’ आ फोरमायदों । लोगोसे बे हाबाफारियाव गासैबो हौवा माहारिखौ गामसा आरनाइ आरो होनजाव माहारिखौ गाबगोनां दख’ना गानना थांनो थाखै बिथाङा बयखौबो गुरैयै खावलायहरो।

श्रीरामपुरआव फिन दाव ब्रइलारजों आबुं गं 10 बलेर पिकआप भेनखौ सिमलतापु पुलिसआ हमदों।

by

श्रीरामपुर 30 मार्च: राइज्योनि जुनात फिसिनाय बिफाननि होबथानायनि उनावबो आसाम-सोनाब बंग सिमनाजों आइन बेरेखायै दाव ब्रइलार फालांगिया सोलिगासिनो दङ। आसामयाव गुबुन राइज्योनिफ्राय दाव ब्रइलार लाबोनायखौ होबथानायनि उनावनो आइन बेरेखायै दाव फालांगि खालामनायाव सिन्दिकेट हान्जाया सांग्रां जादों। हरनि समाव सिन्दिकेट हान्जाया माहारियारि राजा लामानि सोलायै गामियारि लामाजों गोबां रां लानानै दाव ब्रइलार रोगानाय गारिफोरखौ आसामाव हाबहोनायनि राहा लायो। बेबायदिनो थांनाय हरनि समावबो सोनाब बंगनिफ्राय आइन बेरेखायै दाव ब्रइलारखौ आसामाव लाबोनाय गासै गं 10 बलेर पिकआप भेनखौ सिमलतापु पुलिसआ आसाम-सोनाब बंग सिमनानि श्रीरामपुरयाव हमनो हायो। आसाम-सोनाब बंग सिमनानि गामि ओन्सोलजों आइन बेरेखायै दाव ब्रइलार रोगानाय AS 16 AC 4220, AS 26 C 9736, AS 15 C 6609, AS 1 HC 0196, AS 01 HC 6375, AS 16 AC 3791, AS 16 C 6550, AS 1 AC 6373, AS 16 AC 4243, AS 26 C 8211 नम्बरनि बलेर पिकआप भेनखौ सिमलतापु पुलिसआ हमनो हायो।

Ex Volunteers ग्रुबा All Bodo Ex Volunteer Force Organization मुं होना दिनै मिरु आफादखौ गोदानै दाफुंबाय।

by

मुसलपुर ,18 डिसेम्बर : दिनै Bodo Ex Volunteer Force For Bodoland Movement आफादआ बागसा जिलानि मुसलपुर जुनियर बेसिक गुदि फरायसालिनि नब्लांआव मोनसे मेलनि गेजेरजों‌ All Bodo Ex Volunteer Force Organization मुं होनानै मिरु आफादखौ दाफुंबाय। ककराझार जिलानि डलिन ब्रह्मखौ आफादनि आफादगिरि, बागसानि सिन्तु बसुमतारिखौ गाहाइ नेहाथारिनि बिबान होनानै आसामनि गुबुन गुबुन जिलाखौ लानानै गोदान मिरु आफादखौ दाफुंना लानाय जायो। बर’नि थामान्था रैखाथिखौ खौसेथिखौ फोथांना लाखिनाय थांखिखौ लानानै बे बड’लेण्ड सोमावसारारि आफादखौ दानाय जादों आरो बे बड’लेण्ड सोमावसारारि आफादा अहिंसा खान्थिनि गेजेरजों सुबुं सोमावसारनाय हाबाफारिखौ बड’लेण्ड मोनागौ मानि सोमावसारलांबाय थागोन होनना गोदानै दाजानाय आफादगिरि डलिन ब्रह्मआ मोनथि होदों।

क’क्राझार सोरखारि फरायसालिमायाव ईशान चन्द्र मोसाहारी फोथायफुनजि बेनि सेथि गोसोखां बिबुंसार हाबाफारि खुंदों

by
Kok govt college

क’क्राझार,05  डिसेम्बर :क’क्राझार सोरखारि फरायसालिमानि बर’ बिफानजों दाजानाय ईशान चन्द्र मोसाहारी फोथायफुनजि एबा ट्राष्टनि बानजायनायाव थांनाय 3 डिसेम्बर, 2022 खालारखालि “सेथि ईशान चन्द्र मोसाहारी गोसोखां बिबुंसार” हाबाफारिया गाजा गोमजायै खुंफुंजायो। ईशान मोसाहारीनि सावगारियाव बाथिसावनाय आरो बिबार बावनाय हाबाफारिजों जागाय जेननाय बे हाबाफारियाव हांख्रायजानाय आलासि,बर’थुनलाइनि लिरगिरि,समाज सिबियारि,फरायसालिमाफोरनि गोरायुं,क’क्राझार फरायसालिमानि बिबुंगिरिफोर आरो फरायसाफोरा बाहागो लादोंमोन। हाबाफारियाव क’काझार सोरखारि फारायसालिमानि गोरायुं लोगोसे फोथायफुनजिनि आफादगिरि ड0 बन’बिना ब्रह्मआ गावनि बराय बिबुंथिनि गेजेरजों बयखौबो बरायो आरो बर’लेण्ड मुलुगसोलोंसालिनि रिजिष्टार ड0 सुबुं बसुमतारीया बेखेव बिबुंथिखौ लाखियो । बिथाङा गावनि बिबुंथियाव बर’ थुनलाइनि आगुनि लिरगिरिफोरनि मावलांनाय हाबाफोरनि सोमोन्दै आथिखालाव गुवारै सावरायनायजों लोगोसे बिथांमोनखौ हारि-माहारिफोरनि गेजेराव अरायगोजोर खालामना लाखिनो नाजानांगौ होननानै फोरमायथियो। बे हाबाफारिनिनो फुंखा सुबुं सोनाब बेंगलनि रायग’न्ज मुलुगसोलोंसालिनि फेकालटि अफ आर्टस,कमार्स आरो ल’निडीन,प्रफेसार दिपक कुमार राय बिथाङा “बर’ राव आरो थुनलाइ जौगानायाव सा- बेंगलनि बिफाव आरो बिहोमा’ आयदानि सायाव सावरायो। लोगोसे,ईशान चन्द्र मोसाहारि फोथायफुनजिनि थिखानाय थांखि बादियै क’क्राझार सोरखारि फरायसालिमानि बर’ बिफानाव बर’ आयदायाव अर्नास लानानै आरिमु जालिया थाखोआव बयनिख्रुयबो बांसिन न’म्बर मोननो हानाय फरायसा थरायना बरनालि मोसाहारिनो बे बोसोरनि “आरिमु जालिया ईशान बान्थाखौबो होनाय जायो । मख’जाथावदि, बर’नि मुंदांखा थुनलाइगिरि ईशान चन्द्र मोसाहारिनि थुनलाइ सोरजि,बेनि सानथौ आरो सानस्रिखौ अराय गोजोरै फोथांना लाखिनाय थांखि आरो नोजोरखौ सिगाङाव दोननानै थांनाय 8 सेप्टेम्बर, 2022 खालारखालि ईशान चन्द्रमोसाहारी फोथायफुनजि एबा ट्राष्टखौ दानाय जादोंमोन। बै साननि हाबाफारियावनो ईशान चन्द्र मोसाहारी फोथायफुनजि एबा ट्राष्टनि सोमोन्दैबो फरायसालिमानि बर’ बिफाननि गाहाय लोगोसे बे फोथायफुनजिनि पावार अफ एर्टनी ग’बिन्द बर’आ बयनिसिम गुवारै बुंथिना होयो। बे बिबुंसारनि गासैबो सामलायनाय आरो दैदेननायनि बिबानखौ बानस’नाय क’क्राझार सोरखारि फरायसालिमानि बर’ बिफाननि लेङाइ बिबुंगिरि गणेश बर’नि साबायखर बावनायजों बे हाबाफारिया थुंगेयो।

कुमारिकाटा UN एकाडेमियाव दान मोनसेनि गोलोम बोथोर बन्दनि समाव सोलिगासिनो दामजु दामनाइ सोलोंथाइ मावबादा ।

by
कुमारिकाटा UN एकाडेमि

बाक्सा,14 जुलाइ : तामुलपुर जिल्लानि सिङाव थानाय कुमारिकाटा UN एकाडेमिनि  दिथागिरि मनेस्वर बर’ आरो गोरायुं बिरखां नार्जारी बिथांमोननि दैदेननायाव कुमारिकाटा UN एकाडेमियाव फरायसाफोरनो दामजु दामनाइ सोलोंथाइ मावबादा लानानै फोरोंथाइ होगासिनो । गुबैयै बेवहाइ खाम, सिफुं, सेरजा, भाइलिन, आरो हारमुनियाम दामनाइ बायदिखौ फोरोंथाइ होनाइ हाबारिया सोलिगासिनो दं । गोरायुं बिरखां नार्जारीया फोरमायनाइ बायदिब्ला गोलाव सम गोलोम बोथोरनि बन्द’आव फरायसाफोरखौ गोदाव सोराव थाहोआलासेनो माबा मोनसे सोलोंनायाव मुखुब जानानै थाहोनो आरो रोंगौथिखौ फेहेरनो थांखिजों बेफोर आइदाखौ लानाइ जादों होनना मिथिहोदों ।

सान्दुं गोसानि समाव रानथाबनानै खामानि मावग्रा सुबुंफोरनो जाग्रा आदार रान्नानै होदों समाज सिबियारि नबिन गयारि

by
Nabin Gayary

बाक्सा, 13 जुलाइ : समाज सिबियारि नबिन गयारिनि सुबुं सिबिथाइ आखु। बाक्सा जिल्लानि सालबारि ओनसोलाव बयजोंबो मिथि जानाय सासे समाज सिबियारि नबिन गयारिआ सिगां समफोराव सालबारि ओनसोलनि गोबां राइजो राजाफोरखौ  हारि-धोरोम फाराग खालामालासे सुखु-दुखु नि समाव आरो दैबानानि खैफोदनि समावबो गोबां खौरां लानानै मदद होबोदों। बेबायदिनो दिनैबो सान्दुं गोसानि समाव रानथाबनानै खामानि मावग्रा सुबुंफोरखौ खौरां लानायजों लोगोसे पातेमाबाट साहा बागाननि साहा बिलाइ खाग्राफोरनो गावनि आखाइजोंनो गासै साहा खाग्रा सुबुंफोरनो नारें रोसि सेबनानै लोंहोनायजों लोगोसे जाग्रा बेसादफोर जाहोनानै गोजोन होयो आरो साहा बिलाइ खाग्राफोरा सान्दुं गोसानि समाव गावसोरखौ खौरां लाफैनायनि थाखाय बिथां समाज सिबियारि नबिन गयारिखौ बोर सास्रियो। सेन्ट जिभियार इंलिस स्कुलनिबो बिगुमा बिथां नबिन  गयारिआ लोगोसे खौरांनि गेजेरजों फोरमायोदि, सालबारि महकुमानि ओनसोलाव गासै राइजो राजाफोरनो गावनि रां खरसा खालामनानै सिगांबोगानग्रा जिजों लोगोसे जाग्रा मुवा बेसाद बायदि बायदि  मदद होबोबाय थादों आरो फैगौ समफोरावबो बेबायदिनो रायजो राजाफोरखौ मदद होलांबाय थागोन होनानै फोरमायदों ।