Bodosa Newspaper

June 16, 2025
Facebook Youtube
Menu

North-East

दिनै 31 मार्च बड’फा उपेन्द्र नाथ ब्रह्मनि गोथार जोनोम सान।

by

दतमा,31 मार्च: बहुमनि बर’फोरखौ खौसे खालामनायनि लामा दिन्थिलांनाय बड’फा उपेन्द्र नाथ ब्रह्म आ 1956 माइथायनि 31 मार्च, दिनैनि सानावनो जोनोम मोन्दोंमोन। बड’फानि गोथार जोनम सानखौ बोसोरफ्रोमबो फरायसा सान महरै फालिबोदों दुलाराय बर’ फरायसा आफादा। सिगां बोसोरफोराव फालिबोनाय बायदिनो दिनैबो बड’फा उपेन्द्र नाथ ब्रह्मनि गोथार जोनोम सानजों लोब्बा लाखिनानै दुलाराय बर’ फरायसा आफादनि बान्जायनायाव कक्राझार जिल्लानि दतमा थुलुंगाफुरिनि बिथांखौ फबनाय जायगा थुलुंगाफुरियाव सानसेनि मेहेर गोनां हाबाफारिजों फरायसा सानखौ फालिनाय जादों। फरायसा सान फालिनायनि फुंबिलिनि हाबाफारि बायदियै आफादनि फिरफिला बिरहोनाय, बड’फा उपेन्द्र नाथ ब्रह्मनि मांखरसालियाव बिबार बाउनाय, गोजोननि थाखाय फारौ आरो बिलुन बिरहोनाय आरो मोनसे हान्जा सुरनायखौ मावफुंनाय जायो। फरायसा सान फालिनायनि लोब्बायैनो “बड’फा उपेन्द्र नाथ ब्रह्मनि सान्थौ आरो सानस्रिजों गेरेमसा बर’ माहारि दानायाव आथिखालनि फरायसुला फरायसुलि आरो माहारिया लानो गोनां बिफाव” आयदानि सायाव मोनसे गेवलां मेल खुंनाय जायो। गेवलां मेलआव गाहाइ आलासि महरै बाहागो लायो पद्मश्री बान्था मोन्नो हानाय मुंदांखा हाग्रा आरो आवहावा संरैखागिरि जादब पायेंआ। दिनैनि बे हाबाफारियाव दुलाराय बर’ फरायसा आफादनि आफादगिरि दिपेन बर’, गाहाइ नेहाथारी खनिन्द्र बसुमतारी, आसामनि केबिनेट मन्थ्रि उर्खाव गोरा ब्रह्म, बि टि आरनि मावफुं सोद्रोमा रन्जित बसुमतारी, रेव रेवा नार्जिहारी, बड’लेण्ड मुलुग सोलोंसालिनि रेजिष्ट्रार ड० सुबुं बसुमतारीआ बाहागो लायो।

त्रिपुरायाव साख्रि गोमा जानाय फोरोंगिरिफोरा धर्ना होदों

by

आगरतला, 12 सेप्तेम्बर: सुप्रिम कर्टनि गेजेरजों गावसोरनि साख्रियाव थिसनजानाय एबा एफएन्टमेन्टखौ आयेन बेरेखा होन्ना फोसावजानायनि उनाव साख्रि गोमानांनाय सा 100 निबो गोबांसिन फोरोंगिरिफोरआ सोनाब त्रिपुरा जिल्लानि खुमुली ओन्सोलआव बृहस्पतिबारआव धर्ना होदों आरो अपसनेल साख्रिनि दाबि दैखांदों। बेयाव गोबां सुबुंफोरआबो बाहागो लादों आरो लामाखौ जाम खालामदों। सासे धर्ना होग्राया बुंदों, 2018 नि बिसायख’थिनि सिगां गावसोर मिथिनो मोन्दोंदि, सोलोंथाय मन्थ्रि आरो गिबि मन्थ्रिआ गोबां खोथा होदोंमोन, नाथाय बिजेपिआ खुंथायाव फैनायनि उनाव बै खोथा होनायफोरखौ फुरा खालामाखै। गुबुन सासेया बुंदों, बिसोर खोथा होदोंमोनदि, बिसोर आयेनखौ सोदांगोन आरो गावसोरनि साख्रिनि थाखाय अरायथा सुस्रांनायनि राहा लागोन। नाथाय दासिमबो जेबो सुस्रांनायनि राहा लायाखै। बिसोरनि गाहाय दाबि दैखांनाया जादों गावसोरनो थाबैनो अपसनेल साख्रिनि थाखाय हाबाफारि मावनांगौ। गावसोरनि दाबिखौ फुरा खालामब्ला गावसोर मोनसे गिदिर धर्ना होनो गोनां जागोन। मख’जाथावदि, थांनाय दानआव सुप्रिम कर्टआ त्रिपुरानि 8,882 फोरोंगिरिफोरखौ साख्रिनिफ्राय होखारनायनि थांखिखौ लादोंमोन।