Bodosa Newspaper

July 27, 2024
Facebook Youtube
Menu

#BTR

गुरुदेब कालिचरन ब्रह्म त्रासआ 5 थि गुरुदेब कालिचरन ब्रह्म बान्थाखौ होनो थाखाय फोसावबाय

by

बड’सा थान्दै, गसाइगाव, 30 मार्चः गुबुन गुबुन बोसोराव होबोनाय बायदिनो देग्लायबो 2023 गुरुदेव कालिचरन ब्रह्मनि 164थि जोनोम सानजों लोब्बा लाखिनानै फैगौ 18 एप्रिलाव  दिल्लियाव खुंफुंनो लानाय मोनसे हाबाफारियाव गुरुदेब कालिचरन ब्रह्मनि जोनोम सानजों लोब्बा लाखिनानै गुरुदेब कालिचरन ब्रह्म त्रासआ 5थि गुरुदेब कालिचरन ब्रह्म बान्थाखौ होनो थाखाय मोनसे जुरि बर्टनि सायख’नायजों होनो फोसावबाय। मिथिनो मोनाय बायदिब्ला, देग्लायनि बे बान्थाखौ मोननो हादों परेश मेन अफ इनडिया पद्माश्री जादब मलाय बायेंआ। बिथाङा सासे समाजनि थाखै नांथाबनानै समाजनि जानानै अराय मोजां खामानि मावग्रा सुबुं बिथाङा समाजनि जानानै आराय सम हाबा मावो। बिथाङा मुलुगनांआरि दरबाराव मिथिसार जानाय सासे सुबुं। बिथांखौ सासे बान्था मोनगिरि महरै मोननो हादों बेखौ गोर्बोजों गोजोनाय फोरमायदों गुरुदेब कालिचरन ब्रह्म त्रासनि आफादगिरि एबा गथ’सा बान्था मोनगिरि ड० अजित बर’आ। बे हाबाफारियाव गाहाय आलासि हिसाबै बाहागो लाफैगोन भारतनि मिनिस्थार अब  ट्रायबेल एफेयारस श्री अर्जुन मुन्दा, बि टि आरनि गाहाइ मावफुं सोद्रोमा प्रमद बर’, आसामनि मन्थ्रि उर्खाव गोरा ब्रह्म, राइज्यो सभानि एम पि रोनगोरा नार्जारीजों लोगोसे गोबां मेलेमजि सुबुंफोरा बे हाबाफारियाव बाहागो लाफैगोन होनानै खौरां मेल गेजेरजों ड० आजित बर’ आ फोरमायदों । लोगोसे बे हाबाफारियाव गासैबो हौवा माहारिखौ गामसा आरनाइ आरो होनजाव माहारिखौ गाबगोनां दख’ना गानना थांनो थाखै बिथाङा बयखौबो गुरैयै खावलायहरो।

श्रीरामपुरआव फिन दाव ब्रइलारजों आबुं गं 10 बलेर पिकआप भेनखौ सिमलतापु पुलिसआ हमदों।

by

श्रीरामपुर 30 मार्च: राइज्योनि जुनात फिसिनाय बिफाननि होबथानायनि उनावबो आसाम-सोनाब बंग सिमनाजों आइन बेरेखायै दाव ब्रइलार फालांगिया सोलिगासिनो दङ। आसामयाव गुबुन राइज्योनिफ्राय दाव ब्रइलार लाबोनायखौ होबथानायनि उनावनो आइन बेरेखायै दाव फालांगि खालामनायाव सिन्दिकेट हान्जाया सांग्रां जादों। हरनि समाव सिन्दिकेट हान्जाया माहारियारि राजा लामानि सोलायै गामियारि लामाजों गोबां रां लानानै दाव ब्रइलार रोगानाय गारिफोरखौ आसामाव हाबहोनायनि राहा लायो। बेबायदिनो थांनाय हरनि समावबो सोनाब बंगनिफ्राय आइन बेरेखायै दाव ब्रइलारखौ आसामाव लाबोनाय गासै गं 10 बलेर पिकआप भेनखौ सिमलतापु पुलिसआ आसाम-सोनाब बंग सिमनानि श्रीरामपुरयाव हमनो हायो। आसाम-सोनाब बंग सिमनानि गामि ओन्सोलजों आइन बेरेखायै दाव ब्रइलार रोगानाय AS 16 AC 4220, AS 26 C 9736, AS 15 C 6609, AS 1 HC 0196, AS 01 HC 6375, AS 16 AC 3791, AS 16 C 6550, AS 1 AC 6373, AS 16 AC 4243, AS 26 C 8211 नम्बरनि बलेर पिकआप भेनखौ सिमलतापु पुलिसआ हमनो हायो।

Ex Volunteers ग्रुबा All Bodo Ex Volunteer Force Organization मुं होना दिनै मिरु आफादखौ गोदानै दाफुंबाय।

by

मुसलपुर ,18 डिसेम्बर : दिनै Bodo Ex Volunteer Force For Bodoland Movement आफादआ बागसा जिलानि मुसलपुर जुनियर बेसिक गुदि फरायसालिनि नब्लांआव मोनसे मेलनि गेजेरजों‌ All Bodo Ex Volunteer Force Organization मुं होनानै मिरु आफादखौ दाफुंबाय। ककराझार जिलानि डलिन ब्रह्मखौ आफादनि आफादगिरि, बागसानि सिन्तु बसुमतारिखौ गाहाइ नेहाथारिनि बिबान होनानै आसामनि गुबुन गुबुन जिलाखौ लानानै गोदान मिरु आफादखौ दाफुंना लानाय जायो। बर’नि थामान्था रैखाथिखौ खौसेथिखौ फोथांना लाखिनाय थांखिखौ लानानै बे बड’लेण्ड सोमावसारारि आफादखौ दानाय जादों आरो बे बड’लेण्ड सोमावसारारि आफादा अहिंसा खान्थिनि गेजेरजों सुबुं सोमावसारनाय हाबाफारिखौ बड’लेण्ड मोनागौ मानि सोमावसारलांबाय थागोन होनना गोदानै दाजानाय आफादगिरि डलिन ब्रह्मआ मोनथि होदों।

क’क्राझार सोरखारि फरायसालिमायाव ईशान चन्द्र मोसाहारी फोथायफुनजि बेनि सेथि गोसोखां बिबुंसार हाबाफारि खुंदों

by
Kok govt college

क’क्राझार,05  डिसेम्बर :क’क्राझार सोरखारि फरायसालिमानि बर’ बिफानजों दाजानाय ईशान चन्द्र मोसाहारी फोथायफुनजि एबा ट्राष्टनि बानजायनायाव थांनाय 3 डिसेम्बर, 2022 खालारखालि “सेथि ईशान चन्द्र मोसाहारी गोसोखां बिबुंसार” हाबाफारिया गाजा गोमजायै खुंफुंजायो। ईशान मोसाहारीनि सावगारियाव बाथिसावनाय आरो बिबार बावनाय हाबाफारिजों जागाय जेननाय बे हाबाफारियाव हांख्रायजानाय आलासि,बर’थुनलाइनि लिरगिरि,समाज सिबियारि,फरायसालिमाफोरनि गोरायुं,क’क्राझार फरायसालिमानि बिबुंगिरिफोर आरो फरायसाफोरा बाहागो लादोंमोन। हाबाफारियाव क’काझार सोरखारि फारायसालिमानि गोरायुं लोगोसे फोथायफुनजिनि आफादगिरि ड0 बन’बिना ब्रह्मआ गावनि बराय बिबुंथिनि गेजेरजों बयखौबो बरायो आरो बर’लेण्ड मुलुगसोलोंसालिनि रिजिष्टार ड0 सुबुं बसुमतारीया बेखेव बिबुंथिखौ लाखियो । बिथाङा गावनि बिबुंथियाव बर’ थुनलाइनि आगुनि लिरगिरिफोरनि मावलांनाय हाबाफोरनि सोमोन्दै आथिखालाव गुवारै सावरायनायजों लोगोसे बिथांमोनखौ हारि-माहारिफोरनि गेजेराव अरायगोजोर खालामना लाखिनो नाजानांगौ होननानै फोरमायथियो। बे हाबाफारिनिनो फुंखा सुबुं सोनाब बेंगलनि रायग’न्ज मुलुगसोलोंसालिनि फेकालटि अफ आर्टस,कमार्स आरो ल’निडीन,प्रफेसार दिपक कुमार राय बिथाङा “बर’ राव आरो थुनलाइ जौगानायाव सा- बेंगलनि बिफाव आरो बिहोमा’ आयदानि सायाव सावरायो। लोगोसे,ईशान चन्द्र मोसाहारि फोथायफुनजिनि थिखानाय थांखि बादियै क’क्राझार सोरखारि फरायसालिमानि बर’ बिफानाव बर’ आयदायाव अर्नास लानानै आरिमु जालिया थाखोआव बयनिख्रुयबो बांसिन न’म्बर मोननो हानाय फरायसा थरायना बरनालि मोसाहारिनो बे बोसोरनि “आरिमु जालिया ईशान बान्थाखौबो होनाय जायो । मख’जाथावदि, बर’नि मुंदांखा थुनलाइगिरि ईशान चन्द्र मोसाहारिनि थुनलाइ सोरजि,बेनि सानथौ आरो सानस्रिखौ अराय गोजोरै फोथांना लाखिनाय थांखि आरो नोजोरखौ सिगाङाव दोननानै थांनाय 8 सेप्टेम्बर, 2022 खालारखालि ईशान चन्द्रमोसाहारी फोथायफुनजि एबा ट्राष्टखौ दानाय जादोंमोन। बै साननि हाबाफारियावनो ईशान चन्द्र मोसाहारी फोथायफुनजि एबा ट्राष्टनि सोमोन्दैबो फरायसालिमानि बर’ बिफाननि गाहाय लोगोसे बे फोथायफुनजिनि पावार अफ एर्टनी ग’बिन्द बर’आ बयनिसिम गुवारै बुंथिना होयो। बे बिबुंसारनि गासैबो सामलायनाय आरो दैदेननायनि बिबानखौ बानस’नाय क’क्राझार सोरखारि फरायसालिमानि बर’ बिफाननि लेङाइ बिबुंगिरि गणेश बर’नि साबायखर बावनायजों बे हाबाफारिया थुंगेयो।

दुलाराइ बाथौ गौथुमनि आफादगिरि ड० लिलाधर ब्रह्मनि बान्द्रा आसारखौ दिनै खुंफुंबाय।

by
630301355430080

तामुलपुर, 30 अक्टबर : दुलाराइ बाथौ गौथुमनि आफादगिरि ड० लिलाधर ब्रह्मनि बान्द्रा आसारखौ दिनै तामुलपुर जिलानि मठंगाफुरियाव खुंफुंनाय जायो। फुंनि समावनो ड० लिलाधर ब्रह्मनि मुसुखाखौ बिटिआरनि गाहाइ मावफुंगिरि सोद्रोमा प्रमद बर’आ बेखेवनानै होयो, बिनि उनावनो फुंनि आर’ज, दुलाराइ बाथौ गौथुमनि बानजायनायाव ड० लिलाधर ब्रह्मनि मुङाव सेबखांनाय ‘संदानगिरि’ मुंनि बिजाबखौ बेखेवनानै होयो पद्मश्री बान्था मोनगिरि ड० मंगलसिं हाजवारिया, बानजाय आफादा ड० लिलाधर ब्रह्मनि आबुं जिउ-खारि मुंनि सेबखांनाय बिजाबखौ बेखेवनानै होयो दुलाराइ बाथौ गौथुमनि आथिखालनि मावफुं सोद्रोमा खगेन रामसियारिया । बे हाबाफारियावनो बाहागो लादोंमोन तामुलपुर बिधान सभा बियाबनि एमएलए जलेन दैमारि, बिटिसिनि सोद्रोमा हेमेन्त कुमार राभा, दुलाराइ बाथौ गौथुमनि गाहाइ नेहाथारि गनेस दैमारि आरो गोबां बाथौ आफादनि दैदेनगिरि आरो सिबियारि फोरा बे हाबाफारियाव बाहागो लादोंमोन। मख’नो गोनांदि दुलाराइ बाथौ गौथुमनि आफादगिरि म लिलाधर ब्रह्मआ गोबाव सम जब्रायाव गोग्लैना थाखांनायनि उनाव थांनाय 21 आगस्तआव रुंसारि जानांदोंमोन। थुनलाइ, हारिमुखौ लाफाना बायदि बायदि बिथिंआव खामानि मावलांनायनि उनावबो ड० लिलाधर ब्रह्म बिथांआ बाथौ संदानगिरि महरै गोलाव सम खामानि मावबोदोंमोन। बिथांनि रुंसारि जानायखौ दुलाराइ बाथौ गौथुमनि गाहाइ नेहाथारि गनेस दैमारि बिथांआ बर’ समाजनि सुख’ हायै खहा जाबाय होनना खौरां बिजोंनि गेजेरजों फोरमायदों।

फैगौ 11 नभेम्बरनिफ्राय इउ पि पि एल दोलोनि थामथि थाम बोसोरारि जथुम्मा खुंफुंनो साखा-फारा।

by
फैगौ 11 नभेम्बरनिफ्राय इउ पि पि एल दोलोनि थामथि थाम बोसोरारि जथुम्मा खुंफुंनो साखा-फारा।

कक्राझार, 28 अक्टबरः बि टि आर सरकार खुंथायनि गोहोआव थानाय इउनाइटेट पिपुल्स पार्टि लिबारेल राजखान्थि दोलोआ फैगौ 11 नभेम्बरनिफ्राय सान्थामनि हाबाफारिजों दोलोनि थामथि थाम बोसोरारि जथुम्मा खुंनो थाखाय थांखि लादों। कक्राझार सहरनि साखाथि चन्द्रपारानि गेवलां फोथाराव खुंफुंनो लानाय बे जथुम्मानि दिनै लाइ खुन्थिया गाइसन्नाय जायो। बि टि आरनि मावफुं सोद्रोमाफोर, एम सि एल ए फोर आरो दोलोनि गोबां दैदेनगिरि मावथिफोरनि नुजाथिनायाव जानो गोनां बे जथुम्मानि लाइ खुन्थियाखौ गाइसन्नानै होयो 30 नं सान्जा कक्राझार बिधान सभा बियाबनि एम एल ए लरेन्स इस्लारिया। बे जथुम्मानि गेजेरजों फैबाय थानाय समाव बि टि आर हालामनि राइजो राजाफोरनि थाखाय गासै बिथाङाव जौगालु खामानि मावनो थांखि लानाय आयदाफोरनि सायाव गुवारै सावरायनाय जागोन आरो इउ पि पि एलनि गोजाम मिरु आफादखौ सिफायनानै गोदानै बिबानगिरि साइखनाय जागोन होन्नानै खौरां बिजोंनि गेजेरजों मिथिहोयो एम एल ए लरेन्स इस्लारिया। लोगोसे बे जथुम्मानि जोबथा सानखालि आसामनि गिबि मन्थ्रि ड० हिमन्त बिस्व शर्मा, बिजेपिनि हादरारि आफादगिरि जे पि नाड्डा, आसाम बि जे पि नि आफादगिरि भबेश कलिता मोनखौ आलासि महरै हांख्रायनाय जादों आरो 50 निफ्राय 70 रोजा राइजो राजाफोरा बे जथुम्मायाव बाहागो लाफैगोन होन्नानै एम एल ए लरेन्स इस्लारिया फोरमायो।

गामिआरि लामानि सायाव गोनांथार सावरायमेल खुंदों।

by

चिरां जिल्ला PWD बिबानगिरिआ गामियारि लामा आरो बेनि जौगानायनि बिहोमा आरो काजलगावनि District centre आव खुंगा 75 थि भारत उदांस्रि सान फालिथाइखौ लोबबा लाखिनानै मोनसे गोनांथार सालरायमेल खुंफुङो। बे हाबाफारिआव UPPL नि मावफुं आफादगिरि रोनगोरा नारजारि,  MCLA सायखं बसुमथारि, लेङाय बुंथिगिरि अबिराम महानायक, जिलला बेंगिरि नारेनद्र’ कुमार साह, PWD नि बिबानगिरि आरो  थिखादारफोराबो बाहागो लादोंमोन।

बाक्सानि बरमायाव बारग’ NDFB फोरा सोमावसारनाय हाबाफारि लादों।

by

बाक्सा जिल्लानि बरमा जौसिन फरायसालिनि गेलेग्रा फोथाराव दिनै बारग’ NDFB नि सोद्रोमाफोरा मोनसे सोमावसारनाय हाबाफारि लायो ।  बे सोमावसारनाय हाबाफारियाव बारग’ NDFB नि सोद्रोमाफोरा NDFB नि गाइसनगिबि आफादगिरि रन्जन दैमारीखौ 15 आगष्टनि सिगांनो हगारनांगौ, बारग’ NDFB नि सोद्रोमाफोरनि अनसुंथाइखौ थाबैनो होनांगौ, बारग’ NDFB नि सोद्रोमाफोरखौ साख्रिरियाव थिसननांगौ, BTR रादाय बादियै BTR नि गासैबो दफाफोरखौ थाबैनो मावफुंनो नांगौ, लोगोसे जोबथेसालियाव जोबनानै दोनजानाय गासै सोद्रोमाफोरखौ उदां खालामनांगौनि दाबिजों बायदि बायदि स्लगान होस्रिखावनानै बरमा सोहोरखौ दुंहाव खालामो।

कक्राझारनि सोहोरनि साखाथियाव थानाय बालाजान गामियाव निखावरि नखरफोराव बि टि सिनि गाहाय मावफुं सोद्रोमा प्रमद बर’आ सुलु लाहैदों।

by

बि टि सि आव गोरिबनि जेंनाखौ फोजोबनायनि गुदि नोजोरजों थांनाय सान्नैसो सिगांनिफ्राय बि टि सिनि गुबुन गुबुन जिल्लाफोरनि गामि गामि हाबनानै नायगिदिंनाय आरो सुलु लानाय बायदिनो, बि टि सि नि गाहाय खुंगिरि प्रमद बर’आ दिनै कक्राझार जिल्लानि सिङाव थानाय दाब दाब गामिफोराव हाबनानै गोरिब थाखोनि नखरफोरखौ नायगिदिंदों। कक्राझार सहरनि साखाथियाव थानाय देबोरगाव-बालाजाननि बाजपारा गामियाव हाबनानै सरकारि बिथांखिनिफ्राय जानगाराव थानांनाय नगद रय नि सुबुंनि नख’राव नुजाथिहैयो प्रमद बर’आ। बे समावनो बि टि सि नि गाहाय प्रमद बर’आ गोरिब आरो दुखुथिया सुबुंफोरनि जेंनाखौ फोजोबनो थांखिजों बि टि सि नि गासै जिल्लाफोराव सानसेयाव गंथाम दुखुथिया नख’राव हाबनायनि हाबाफारिखौ लादों होन्नानै खौरांगिरिनि सिगाङाव बुंथियो। लोगोसे फैगौ 16 आगस्टनि उनाव गासै EM-GM फोरा 2 अक्टबरसिम सानफ्रोमबो 3 निफ्राय 5 रिंगासिम सिम दुखुथिया नखरफोराव हाबनायनि थांखि लादों होन्नानै फोरमायबावो बि टि सि नि गाहाय खुंगिरि प्रमद बर’आ।

बि टि आरनि सोलोंथाइ खोन्दोखौ जौगाखांहोनायनि थाखाय बि टि आर खुंथाइनि मोनसे गोदान आगान।

by

बि टि आर आव सोलोंथाइ मान दान्दाखौ फोजौखांहोनो, सोलोंथाइ फसंथानफोरनि थासारिखौ नोजोर लाखिनो, सोलोंथाइ बिथांखि आजावनो, फरायसाफोरनो गुन गोनां, गोग्गो आरो उदां सोलोंथाइखौ लाफानानै सोलोंथाइजों सोमोन्दो थानाय गासै बिथिंनि सायाव नोजोर लाखिनो आरो जेंना बोस्रांनायनि सायाव खामानि मावनो थाखाय मोनसे गोदान सोलोंथाइ खान्थि लाबोनायनि नोजोरजों BTR सोलोंथाइ खान्थि रेबनाय रोंगौसा आफाद दानाय जायो।  दिनै कक्राझार CIT नि आलासि नमानि सावराय नब्लाङाव मोनसे हाबाफारि खुंनायनि गेजेरजों बे गोदानै दाजानाय BTR सोलोंथाइ खान्थि रेबनाय रोंगौसा आफादखौ बेखेवनानै होयो BTC नि गाहाय खुंगिरि प्रमद बर’आ। BTC नि गाहाय खुंगिरि प्रमद बर’खौ मासिगिरि आरो लेंथुमगिरि, BTC नि प्रिनसिपाल सेक्रेटारि शन्तानु पि गतमारेखौ लोगो लेंथुमगिरि आरो BTC सोलोंथाइ बिफाननि बिथोनगिरि जगदिस प्रसाद ब्रह्मखौ सोद्रोमा नेहाथारि महरै साइखनानै राइज्योनि गुबुन गुबुन सोलोंथाइ फसंथान,बर’ थुनलाइ आफाद,  NGO, गुबुन गुबुन आफाद- गौथुमफोरनि थान्दै आरो बर’नि माखासे सोलोंथाइ गिरि, सानसुमैफोरखौ लानानै गासै सा 45 सोद्रोमानि बे BTR सोलोंथाइ खान्थि रेबनाय रोंगौसा आफादखौ दानाय जादों।