• Home
  • /
  • Regional
  • /
  • 15 अक्टबरखालि सिसिटवाआ राइज्योआव गोदान राजखान्थि दागोनः आदित्य खाख्लारी

September 25, 2020

15 अक्टबरखालि सिसिटवाआ राइज्योआव गोदान राजखान्थि दागोनः आदित्य खाख्लारी

गुवाहाटी, 25 सेप्तेम्बरः गेजेराव माखासे दानल' दंसै आसाम बिधान सभा बिसायखथिया। फैगौ 2021 माइथायनि मार्च-एफ्रिलनि गेजेराव खुंजानो गोनां बिधान सभा बिसाइख'थिखौ बिथा खालामनानै दानिफ्रायनो राइज्योनि गुबुन गुबुन राजखान्थि हान्जा आरो राजखान्थि नङै आफादफोरा मैखोमै बाहागो लानो जान्जि ख्राफ्रादों। बिसाइखथिया खुंजानो गेजेराव माखासे दानल' दङब्लाबो नाथाय दासान्दि आसामनि राजखान्थि फोथाराव गुबुन गुबुन हान्जाफोरनि सोलो बोलोजों हाबाफारि लानायनि दुंहाव बारहावाया सोलिबाय थानाय नुनो मोन्दों। अदेबानि बेबायदि समावनो राइज्योआव मोनसेनि उनाव गुबुन मोनसे गोदान राजखान्थि हान्जा जोनोम जानायखौबो नुनो मोन्दों।

Aditya Khakhlary

मख'नो गोनांदि, थांनाय माखासे साननि सिगां दुलाराइ आसाम फरायसा आफाद(आसु) आरो आसाम जातियताबादि युव चात्र परिषद(एजेवाइसिपि)आ जुथायै आसाम जातीय परिषद मुंनि गोदान राजखान्थि हान्जाखौ दाफुंदोंमोन। बेनि उनावनो बृहस्पतिबारखालि राइज्योआव गुबुन मोनसे गोदान राजखान्थि हान्जाखौ फैगौ बावैसो साननि गेजेरावनो दाफुंनो फोसावदों सिसिटवानि दैदेनगिरिया। 

मिथिनाय बायदिब्ला, क-अर्डिनेसन कमिटि अफ ट्राइबेल अर्गेनाइजेसन अफ आसाम(सिसिटवा)नि कन्भेनर आदित्य खाख्लारीआ बे बाथ्राखौ फोसावनानै बुङोदि, सिसिटवाया फैगौ 15 अक्टबरखालि मोनसे ओनसोलारि गोदान राजखान्थि हान्जाखौ दाफुंनाय जागोन। मख'नो गोनांदि, माखासे दाबिफोरखौ लानानै सरकारनि हेंथायै सोमावसारबोनानै गावसोरनि मोन्थाय आरो दाबिखौ मावफुंनायनि थांखिजों गोदान राजखान्थि हान्जा दाफुंनानै राइज्योनि बिधान सभा बिसाइखथियाव बाहागो लानो थियारि जानाया दासान्दि राइज्योआव बिसाइख'थिनि दुंहाव बारहावा लाबोदों। थांनाय बावैसो साननि गेजेराव गोदान राजखान्थि हान्जा दाफुंनाय आरो फैगौ बावैसो साननि गेजेराव दाफुंनो लाबावनाय गोदान हान्जानि सोमोन्दोआव कृशक मुक्ति संग्राम समिटिआ बृहस्पतिबारखालि फोसावनाय बायदिब्ला ओनसोलारि राजखान्थि हान्जाया खौसेयै मोनसे फिरफिला, मोनसे नेर्सोन आरो मोनसे थांखियावनो राजखान्थि गेलेनांगौ होननानै फोरमायो। आसु आरो एजेवाइसिपिनि जुथायै दाफुंनाय राजखान्थि हान्जानिफ्राय थालांनायनि उनाव केएमएसएसआबो थांनाय समाव गोदान राजखान्थि हान्जा दाफुंगोननि इसारा होदोंमोनब्लाबो नाथाय दासिम जोबथा थांखि लाथ'वाखै।

अदेबानि केएमएसएसआबो जायखि जाया राजखान्थि हान्जाजों फैगौ बिधान सभा बिसाइख'थियाव बाहागो लानायनि मिजिं नुजाथिदों। बुंनो थाङोब्ला राइज्योआव दासिम मोनफ्रोमबो आफादफोरानो राजखान्थि फोथाराव ओंखारनो थियारि जादोंसै। फैगौ दाननि गेजेराव गोदान राजखान्थि हान्जाखौ जोनोम होगोननि बाथ्रा बुंथिनानै सिसिटवानि कन्भेनर आदित्य खाख्लारीआ बुङोदि,15 अक्टबरखालि ट्राइबेल आफादा सानसेनि हाबाफारिजों गुवाहाटी नोगोरमानि मासखवा आइटिए चेन्टारआव मोनसे राजखान्थियारि जुथुमनाय जागोन। खाख्लारीआ बुंबावोदि, जुदि आइटिए चेन्टाराव जुथुमनायनि गनायथि मोनाब्ला सनापुरआव थानाय फोथाराव खुंनाय जागोन । ट्राइबेल संघ, ट्राइबेल युथ लीग, मेच-कछारी जातीय परिषदखौ लाफानानै गासै मोन 21 ट्राइबेल आफादफोरनि सोद्रोमाफोरा बाहागो लागोन होन्नानै मिथिहोनायजों लोगोसे गोदानै दाफुंनो लानाय राजखान्थि हान्जाया गासै बारग' ट्राइबेल फरायसा दैदेनगिरिफोरखौ बरायनाय जागोन । लोगोसे गोजौआव मख'नाय खालारनि गोनां जुथुमनायावनो गोदान राजखान्थि हान्जाया इयुनाव मावलांनो लानाय हाबाफारिखौ आजावना लागोन। खाख्लारीआ गावनि बिबुंथियाव फोरमायबावनाय बायदिब्ला सिसिटवानि दाफुंनो लानाय गोदान राजखान्थि हान्जानि थांखिया 2021नि बिधान सभा बिसाइख'थियाव बाहागो लानाय आरो बिजाथि फसंनाय। हान्जाया ट्राइबेल सुबुंफोरनि थांखिफोरखौ लानानै खामानि मावलांगोन होन्नानैबो फोरमायो।

Share with your friends!

Related Posts

आसामनि मादावनो मुंदांखा जानो हानाय बगामाति लावखार ओंखाम जाग्रा थावनिखौ दिनै सोरखारि भाबै बेखेवनानै होबाय। 

आसामनि मादावनो मुंदांखा जानो हानाय बगामाति लावखार ओंखाम जाग्रा थावनिखौ दिनै सोरखारि भाबै बेखेवनानै होबाय। 

Ex Volunteers ग्रुबा All Bodo Ex Volunteer Force Organization मुं होना दिनै मिरु आफादखौ गोदानै दाफुंबाय।

Ex Volunteers ग्रुबा All Bodo Ex Volunteer Force Organization मुं होना दिनै मिरु आफादखौ गोदानै दाफुंबाय।

क’क्राझार सोरखारि फरायसालिमायाव ईशान चन्द्र मोसाहारी फोथायफुनजि बेनि सेथि गोसोखां बिबुंसार हाबाफारि खुंदों

क’क्राझार सोरखारि फरायसालिमायाव ईशान चन्द्र मोसाहारी फोथायफुनजि बेनि सेथि गोसोखां बिबुंसार हाबाफारि खुंदों

Grand Assam 2022 आव Ushna Basumatary आ Grand Miss Assam  Eminent 2022 बिमुंखौ मोननो हादों ।

Grand Assam 2022 आव Ushna Basumatary आ Grand Miss Assam  Eminent 2022 बिमुंखौ मोननो हादों ।

Published by

Bodosa


Bodosa is a Daily Newspaper, printed in Bodo language.

Leave Your Comment Here