गुवाहाटी, 4 सेप्तेम्बर: आसामनि राइज्यो बेंगिरि प्रफेसार जगदिश मुखिआ थांनाय 3 सेप्तेम्बरखिल मोनसे गोनां मेलयाव राइज्योनि सिङाव थानाय गुबुन गुबुन मुलुगसोलोंसालिनि भाइस सेन्सेलरफोरजों गोनांथारै गोदान माहारियारि सोलोथाय खान्थिनि सायाव सावरायदों। राजभवननि जथुमग्रा खथायाव खुंनाय गोनां मेलाव राइज्योनि गं 6 मुलुगसोलोंसालिमानि भाइस सेन्सेलरफोरा बाहागो लानानै गोदान सोलोंथाय खान्थिनि सायाव सावरायो आरो सोलोंथायनि फरा-फारिखौ राइज्योनि सोलोंथाय फसंथानफोराव माबायदि थिसन्नांगौ आरो बाहायनांगौ बेफोरनि सायाव सावरायनानै थांखि लायो। लोगोसे बे गोदान सोलोंथाय खान्थिनि गेजेरजों फरायसाफोरनि गेजेराव माबोरै गोरलै राहाजों फोरोंथाय होनो हायो बेनि सायावबो राइज्यो बेंगिरि मुखिआ भाइस सेन्सेलरफोरजों सावरायो।
बे मेलयावनो गोदान सोलोंथाय खान्थिखौ थिसन्नायजों लोगोसे साफ्रोमबो भाइस सेन्सेलर, रेजिस्ट्रार, प्रिन्सिपाल आरो मावफारियाफोरखौ सेनिटाइस खालामनायनि फार्सेबो राहा लानो राइज्यो बेंगिरिआ बिथोन होयो ।
मख'नो गोनांदि, राइज्यो बेंगिरिआ खुंनाय बे गोनां गोदान माहारियारि सोलोंथाय खान्थिखौ लानानै सावरायनाय मेलाव आसाम सरकारनि सोलोंथाय बिफाननि बोसोनगिरि प्रफेसार मिहिरकान्ति चौधुरि, कमिसनार, सेक्रेटारिजों लोगोसे डिब्रुगड़ मुलुगसोलोंसालिनि भाइस सेन्सेलर ङ रन्जित तामुलि, गुवाहाटी मुलुगसोलोंसालिनि भाइस सेन्सेलर प्रफेसार पिजे हेन्डिक, आसाम साइन्स आरो टेक्नलजी मुलुगसोलोंसालिनि भाइस सेन्सेलर ङ धिराज बरा, बड'लेन्ड मुलुगसोलोंसालिनि भाइस सेन्सेलर प्रफेसार लाइस्राम लादु सिं, आसाम अमेन मुलुगसोलोंसालिनि भाइस सेन्सेलर प्रफेसार मालीनि गस्वामी आरो श्रीमन्त शंकरदेब मुलुगसोलोंसालिनि भाइस सेन्सेलर प्रफेसार दिबीका डेकामोनहा बाहागो लादोंमोन।
