रम, 24 सेप्तेम्बर: मुलुगनां रेंकिंयाव सेथि जायगा लानानै गेलेनाय नभाक जकभिकसआ 5 थि खेब इटालियान अपेनखौ देरहानो हाबाय। बे टुर्नामेन्टनि ट्रफिखौ देरहानायजों जकबिसआ मोन 36 थि एटिपि मास्टार्सखौ देरहानो हानाय मुलुगनि गिबि गेलेगिरि जानो हादों। आइजोफोरनि हार्सिङै गेलेनाय फाइनाल मेचखौ रमानियानि गेलेगिरि सिमना हालेपआ देरहानो हानायनि उनाव हौवाफोरनि सिंगेल्स गेलेनाय फाइनाल मेचखौबो सार्बियानि गेलेगिरि नभाक जकभिकसआ देरहानो हादों। मंगलबारखालि गेलेनाय टुर्नामेन्टनि फाइनाल मेचआव सार्बियानि गेलेगिरि जकभिकसआ आर्जेन्टिनानि गेलेगिरि डिय'ग'खौ गासै 7-5, 6-3 सेट पइन्टनि फारागथियाव फेजेन्नो हानानै ट्रपिखौ आजावनो हायो। जकबिसआ दासिम गावनि गेलेनाय केरियाराव 5 थि खेब इटालियान अपेननि फाइनालखौ देरहानो हानायाव जाफुंसारदों।
मख'नो गोनांदि, थांनाय बावैसो साननि गेजेराव जालांनाय इउएस अपेननि सेमि फाइनालनिफ्राय जेन्नांनाय नभाक जकभिकसनि उनाव स्पेननि राफेल नाडालआ दासिम मोन 35 आरो सुइजारलेन्डनि गेदेमा टेनिस गेलेगिरि रजार फेडारारआ मोन 28 थि खेब एटिपि मास्टार्सखौ देरहानो हादों। जकभिकसआ बे सोलिफु बोसोरनि गेलेनायाव मोन 32 टुर्नामेन्टनि गेजेराव गासै 31 मेचफोरखौ देरहानो हानायाबो रेकर्ड जादों । सोलिफु बोसोराव मोन 4 ट्रपिखौ देरहानो हानाय नभाक जकभिक्सआ दासान्दि मुलुगनां हौवा सिंगेल्स टेनिस रेंकिंयाव सेथि जायगा लानानै गेलेगासिनो दं। गुबुन फारसेथिं थांनाय समबारखालि रमानियानि गेलेगिरि सिमना हालेपआबो गावनि नाजाथाबनायनि गेजेरजों फाइनाल मेचखौ देरहानो हायो। फाइनालाव सिमना हालेपआ सेक गन'राइज्योनि गेलेगिरि केर'लिनाखौ फेजेन्नो हादोंमोन।
