कलकाता, 20 अक्टबर: फैगौ सिजननि इन्डियान सुपार लीगनि थाखाय बाहागो लागोन क्लाबफोरा दासान्दि गोख्रों गेलेगिरिफोरखौ हान्जायाव लाबोनाया सोलिबाय थानायनि गेजेरावनो रबिबारखालि भारतनि नेसनेल फुटबल हान्जानि स्ट्राइकार जेजे लालपेकुलुवाआ एससि इस्ट बेंगल क्लाबजों गेलेनो थाखाय गोरोबथा जाबाय। मख'नो गोनांदि, थांनाय बावैसो सान सिगां इस्ट बेंगल क्लाबआ आइएसएलआव गेलेनो थाखाय थिसनजादोंमोन। अदेबानि आइएसएलआव गेलेनो खाबु मोन्नायाव इस्ट बेंगलआ हादरनि गुबुन सासे गोख्रों स्ट्राइकारखौ हान्जायाव लाबोनानै आरोबाव हान्जाखौ गोख्रोंसिन खालामदों।
मिबथिनाय बादिब्ला, 29 बोसोर बैसोनि जेजेआ हादरनि फुटबल हान्जायाव मोन 50 मुलुगनां फुटबल मेचफोरखौ गेलेबोदोंमोन। 2011 माइथायनिफ्राय गावनि नेसनेल हान्जायाव गेलेनाय केरियारखौ जागायजेन्नानै जेजेआ बाङाइ बोसोरावनो गावनि गेलेनाय गोख्रोंथिखौ दिन्थिनो हादों। जेजेआ दासिम गावनि गुबुन गुबुन हादरनि क्लाबफोरजों मोन 251 मेचफोरखौ गेलेनायाव 94 गलखौ होनो हानायाव जाफुंसारदों। इस्ट बेंगल क्लाबआ जेजेजों लोगोसे स्कटलेण्डनि गेलेगिरि एबा डिफेन्डार डानि फक्स आरो जानिनि मिड-फिल्डार भिल्ले मित्तेखौबो हान्जायाव गोबां धोननि गेजेरजों गोरोबथा खालामनाय जादों ।
गावनि इस्ट बेंगल क्लाबजों गेलेनो थियारि जानायखौ आरो गोरोबथा जानायखौ गोजोन्नाय फोरमायनानै गेलेगिरि जेजेआ हादरनि गेजेराव एससि इस्ट बेंगल क्लाबआ गुबुन मोनसे गोख्रों क्लाब होन्नानै बुङो । जेजेआ थांनाय इन्डियान सुपार लीगआव चेन्नाइयान एफसिनि जानानै माखासे बोसोरसिम आइएसएलआव फारियै गेलेबोदोंमोन। नाथाय गावनि थांखि बादियै चेन्नाइयान एफसिजों गेलेनाय सोमोन्दोखौ नागारनानै जेजेआ फैगौ आइएसएलआव गुबुन गोदान क्लाबजों गेलेनो थाखाय थियारि जादों।
