• Home
  • /
  • Breaking News
  • /
  • जमुना बर’खौ फोरोंथाय होगिरि जनस्मित नार्जारीआ सुबुं सम्पद सोरजिनायाव मुखुबै नांथाबदों

September 11, 2020

जमुना बर’खौ फोरोंथाय होगिरि जनस्मित नार्जारीआ सुबुं सम्पद सोरजिनायाव मुखुबै नांथाबदों

ढेकियाजुलि 11 सेप्तेम्बर : मुलुगनां थाखोनि बक्सिं बादायलायनायाव गावनि गोख्रों गेलेनायजों गोबां मेडेल देरहानानै बर' हारिजों लोगोसे आसाम आरो भारत हादरनि थाखाय गोग्गानाय लाबोनो हानाय आइजो बक्सिं गेलेगिरि जमुना बर'नि गिबि फोरोंथाय होगिरि जनस्मित नार्जारीआ दासान्दि करना भाइरासनि थाखाय लकडाउन समनि गेजेरावबो जिरायनानै थायाखै ।

बबेखानि बिथां जनस्मित नार्जारीआ माहारियारि आरो मुलुगनां थाखोनि गेलेमु जौसाङाव दैखोहरनो थाखाय जायगानि माखासे लाइमोनफोरखौ सिरि सिरियै फोरोंथाय होबोबाय थादों। मख'नो गोनांदि बिथां नार्जारीआ गावनो सासे माहारियारी थाखोनि उसु गेलेगिरि जानानै आथिखालाव माखासे जाखांफुनाय लाइमोनफोरखौ बक्सिं गेलेमुनि फोरोंथाय होनाया थारैनो बिथांनि जोबोर बाख्नायथाव हाबा मावनाय जादों। आथिखालाव बिथाङा बक्सिं गेलेमु आयदायाव शनितपुर जिल्लानि गोरायुं महरैबो बिबान सामलायगासिनो । शनितपुर जिल्लानि धेकियाजुलि बियाबनि गोग्लैसोनाय ओनसोलनि बेलस्रि रेल स्तेसनजों नांजाबनाय जायगायाव जिउ खांबोनाय बक्सिं फोरोंगिरि जनस्मित नार्जारीआ बर' हारिनि गोख्रों आइजो बक्सिं गेलेगिरि जमुना बर'खौबो गुदियै फोरोंथाय होनानै मुलुगनां थाखोयाव दैथायहरनो हादों।

Jamna Boro

जमुना बर'नि अनगायैबो बिथांनि फोरोंथाय होनायावनो बेलस्रि ओनसोलनिनो गुबुन माखासे हिन्जावसाफोरनि गेजेराव 9 थाखोआव फरायनाय माइनाव बर'आबो 2019 माइथायाव गलाघाटआव खुंजानाय इयुथ बक्सिं सेम्पियनसिपआव सनानि मेडेल, 8 थाखोयाव फरायनाय जुनमनि बर'आ रुफानि मेडेल देरहानानै गोग्लैसोनाय बेलस्रि ओनसोलनि थाखाय गोग्गानाय लाबोनो हादोंमोन। आथिखालाव बिथां जनस्मितआ बेलस्रि रेल स्टेसननि प्लेटफर्मआवनो ओनसोलनि सा 25 हिन्जावसा आरो हौवासा लाइमोनफोरखौ फोरोंथाय होगासिनो।

मख'जाथावदि थांनाय 2019 माइथायाव थेलामारा ओनसोलाव गुबुन सासे बर'नि गोहोगोरा आइजो बक्सार अंकुसिता बर'आ वार्ल्ड सेम्पिनसिपआव सनानि मेडेल देरहानो हानायनि उनाव मोनसे बराय हाबाफारियाव राइज्योनि गिबि मन्थ्रि सर्बानन्द सनवालआ फैनानै ओनसोलाव गंसे गोदान जौगाखां महरनि इन्दर स्टेडियाम लुफुंनायनि बाथ्रा होदोंमोनब्लाबो नाथाय दिनैसिमहालागै मावफुंजायैयाव बिथां जनस्मित नार्जारीआ दुख फोरमायो। ओनसोलाव जुदि गंसे इन्दर आरो आवटदर स्टेडियाम लुफुंनानै उसु, बक्सिं, किक बक्सिं बाइदि गेलेनायनि थाखाय नांगौबादि गोनांथि जानाय गासै गेलेग्रा मुवा बेसादफोरखौ जगायनानै होयोब्ला थारैनो बे गोग्लैसोनाय ओनसोलनि थाखोमानाय गुन गोनां एबा रोंगौथि गोनां गेलेगिरिफोरा जमुना बर', अंकुसिता बर'मोनबादि मुलुगनां थाखोयाव मुं आर्जिनो हानायजों लोगोसे ओनसोलनि, हारिनि आरो राइज्योनि थाखाय मुंलाखिनो आरो सुबुं सम्पद सोरजिनो हागोनखौ मिजिंथिनाय फोरमायो फोरोंगिरि जनस्मित नार्जारीआ।

Share with your friends!

Related Posts

Grand Assam 2022 आव Ushna Basumatary आ Grand Miss Assam  Eminent 2022 बिमुंखौ मोननो हादों ।

Grand Assam 2022 आव Ushna Basumatary आ Grand Miss Assam  Eminent 2022 बिमुंखौ मोननो हादों ।

दुलाराइ बाथौ गौथुमनि आफादगिरि ड० लिलाधर ब्रह्मनि बान्द्रा आसारखौ दिनै खुंफुंबाय।

दुलाराइ बाथौ गौथुमनि आफादगिरि ड० लिलाधर ब्रह्मनि बान्द्रा आसारखौ दिनै खुंफुंबाय।

फैगौ 10 नबेम्बर खालाराव अदालगुरियाव करेन्द्र बसुमतारिनि सारादु खुंगोन ।

फैगौ 10 नबेम्बर खालाराव अदालगुरियाव करेन्द्र बसुमतारिनि सारादु खुंगोन ।

आसाम माइक्र-फाइनान्स थुलुंगाखां आरो रेहाय बिथांखि 2021 नि गेजेरजों चिरांआव मुलाम्फागिरिफोरनो चेक गथायदों।

आसाम माइक्र-फाइनान्स थुलुंगाखां आरो रेहाय बिथांखि 2021 नि गेजेरजों चिरांआव मुलाम्फागिरिफोरनो चेक गथायदों।

Published by

Bodosa


Bodosa is a Daily Newspaper, printed in Bodo language.

Leave Your Comment Here