दिसपुर, 6 सेप्तेम्बरः गोदान सोलोंथाय खान्थि 2020 खौ राइज्योयाव गाहामै मावफुंनाय आरो दाफुंनायनि थाखाय राइज्यो सरकारनि सोलोंथाय बिफानआ सिफ सेक्रेटारि बि कल्यान चक्रबर्तिखौ लिंथुमगिरि महरै बिबान होना गासै सा 73 सोद्रोमाफोरखौ लानानै मोनसे गोजौ थाखोनि कमिटि दाफुंनाय जाबाय।
सोलोंथाय बिफानआ दाफुंनाय बे गोजौ थाखो कमिटिनि शनिबारखालि गिबि जथुमनायाव बाहागो लादों सोलोंथाय मन्थ्रि ड० हिमन्त बिस्व शर्माआ। बिबुंथियाव ड० शर्माआ बुडोदि, बे गोदान सोलोंथाय खान्थिखौ लानानै हादतनि गेजेराव जेबो दान्थे-बिदान्थे जायाखै । लोगोसे मन्थ्रिआ बुंबावोदि, उदांस्रिनि उनाव भारत हादतया गिबि खेबनि थाखाय बेबायदि दान्थे-बिदान्थे गैयालासै गोदान सोलोंथाय खान्थिखौ आजावनो हादों। राइज्योनि थाखाय माहारियारि सोलोंथाय खान्थिनि सिङाव सोलोंथाय राहाखौ साबसिन खालामनायनि थांखिजों बे खान्थिखौ थि समावनो बाहायनांगौ होन्नानै मन्थ्रिआ बुंबावो । राइज्योनि सोलोंथाय, समाजखान्थि, गेलेमु, जौगानाय, बिगियान, दिहुन्थाय बायदिजों लोब्बा थानाय रोंगौसा आरो फुंखा सुबुंफोरखौ लानानै बे कमिटिखौ दाफुंनाय जादों। बे कमिटिया फैगौ 50 बोसोरसिम राइज्योनि सोलोंथाय इयुनाव लाइमोनफोरखौ थि लामाजों लानानै थांनायनि थाखाय नोजोर लाखिनाय आरो बिथोन होनायाव बिबान सामलायगोन होन्नानै मन्थ्रिआ बुंबावो। हादत आरो राइज्योनि गासै नख'रारि दिहुन्थायनि 6 जौखोन्दोआव गोदान सोलोंथाय खान्थिखौ बाहायनायनि थाखाय थोजासे रां बाहायगोन होन्नानै दासान्दि मिरु सरकारआ बाथ्रा होदों ।
गोदान सोलोंथाय खान्थिखौ थि समावनो फरायसाफोरनि गेजेराव बाहायनो हायोब्ला एबा थिसन्नो हायोब्ला फैगौ माखासे बोसोरनि गेजेराव राइज्योनि मोनफ्रोमबो जिल्लायावनो गोजौ सोलोंथायनि फसंथानखौ सिगां फार्से आवगायहोनो हागोन होन्नानै मन्थ्रि हिमन्त बिश्व शर्माआ मिजिंथियो। कमिटिनि सोद्रोमाफोरा गोनांथि बादियै राइज्योनि सोलोंथाय राहाखौ दाफामफिन्नायनि थाखाय गुबुननिफ्राय सुबुरुन लागोन होन्नानैबो मन्थ्रिआ मिथिहोयो।
फार्सेथिं बिमा रावनि बिजोङाव गुदि सोलोंथायनि गोनांथार आयदानि सायावबो बे कमिटिया गोनांथार नोजोर लाखिगोन होन्नानै मन्थ्रिआ गावनि बिबुंथियाव रायखाङो। सोलोंथाय बिफाननि सिफ सेक्रेटारि बि कल्यान चक्रबर्तिनि बराय बिबुंथि लाखिनायजों जागायजेन्नाय दिनैनि बे गोनां मेलयाव गोजौ थाखोनि कमिटिनि सोद्रोमाफोरजों लोगोसे राइज्यो सभानि एमपि बिस्वजित दैमारि, सोलोंथाय बिफाननि बोसोनगिरि ङ० मिहिर कान्ति चौधुरि, सेबानि आफादगिरि आरसि जैइन, सामलायगिरि-सेक्रेटारि प्रितम शइकिया आरो सोलोंथाय बिफाननि गोजौ बिबानगिरिफोराबो मेलाव बाहागो लादोंमोन।
