गोदान दिल्ली, 8 सेप्तेम्बर: करना बेमारनि बे समआ बयबो सांग्रांथियै थानायनि सम। भारतजों लोगोसे मुलुगनाडैनो गोबां अन्जिमानि केस सन्देरगासिनो दङ। बे समाव जों करनाखौ सरासनस्रायै लानाडा। बेनिखायनो जों भेक्सिन फैजासे गोबां सांग्रांथियै थानांगोन। दासान्दि कभिड-19 नि भेक्सिन फैसिगोन होन्नानै मिजिं थिनाय जादों। बेनि थाखाय सोंथि सिखांदोंदि, करना भेक्सिनखौ बयनिख्रुइ सिगां सोर मोनगोन। बे सोंनायनि फिन्नायखौ थि खालामनो थाखाय सा 19 मुलुगनां देहा बिगियानगिरिफोरा थामथि खोलोबनि फेयार प्रायरिटि मडेल दिन्थिदों। जायनि थांखिया कभिड-19 जों सम जायैआवनो थैनाय आरो गोब्राब देहानि थासारिफोरखौ बाङाइनिफ्राय बाङाइ खालामनाय। बे आन्जाद नायनायनि गाहाय लिरगिरि आरो आमेरिकानि पेन्सिलभेनिया मुलुग सोलोंसालिनि एजेकेल जे एमानुवेलनि बुंनाय बायदिब्ला, सरासनस्रायै भेक्सिनखौ थासारिनि सायाव बिथा खालामना रान्नानै होगोन।
बे भेक्सिनखौ दिहुन्नायनि बयनिख्रुइबो देरसिन थांखिआनो जादों कभिड-19 जों थैनायखौ होबथानाय। गिबि खोलोबाव बेनि सायावनो नोजोर होग्रोनाय जादों। बिनि नैथि खोलोबाव लिरगिरिफोरा मोन्नै आयदानि सायाव नोजोर होदों। बिसोरनि गेजेराव मोनसेया रांखान्थि साबस्रांहोनाय आरो गुबुन मोनसेआ सुबुंफोरखौ निखाउरिनिफ्राय उदां खालामनाय। थामथि खोलोबाव बेरामा बांसिनै गोसारनाय हादतफोरखौ गिबियै नोजोर होनाय जायो। नाथाय गासै हादतफोरनो करनानि गोसारनायखौ होबथानो थाखाय थि बिबांनि भेक्सिन मोन्नायनि गोनांथि जागोन। हमदांना लानाय बायदिब्ला, 60 निफ्राय 70 जौखोन्दो नोगोरारिफोरा इम्युनिटि थानांगोन।
