गोदान दिल्ली, 27 सेप्तेम्बर : बलिउड फावखुंगुर सुशान्त सिं राजपुत सुइसाइड केसआव ड्राग्स कानेक्सनखौ लानानै नायबिजिरनायाव माखासे सावथुन स्टारफोरनि मुङा सोराङाव फैदों। बे केसआव नायबिजिरनाय एनसिबिआ रिया चक्रबर्तीजों लोगोसे माखासे सुबुंफोरखौ ग्रेप्तार खालामदों आरो सावथुन मुलुगनि माखासे गिदिर स्टारफोरनो समन दैथायहरदों। आथिखालाव बे फारिलाइआव करण जहरनि मुंखौबो सरजाबनाय नुनो मोन्दों। माखासे मिडिया रिपर्टफोराव बबेबा पार्टिखौ लानानै करण जहरनोबो समन दैथाय हरनायनि आसा दङ होन्नानै फोरमायनाय जादों। बेनि गेजेराव करण जहरआ लिरनानै ससियेल मिडियाआ गावनि स्टेटमेन्टखौ फोसावदों।
करण जहरआ गावनि स्टेटमेन्टआव मिडिया रिपर्टआव गावनि फिनजाथायखौ होनानै बुंदोंदि, गावनि फार्से होनाय पार्टिआव माब्लाबाबो ड्राग्सखौ बाहायनाय जायाखै। लोगोसेनो बियो क्षितिज प्रसाद आरो अनुभब चपड़ाखौ लानानैबो बुंदोंदि, बिसोरजों गावहा जेबो खाथिनि सोमोन्दो गैया आरो बिसोर सानैनि गेजेराव रावबो गावनि हेफाजाबगिरि एबा खाथिनि हेफाजाब होग्रा नङा । बियो गावनि स्टेटमेन्टआव लिरबावदोंदि, माखासे खौरां होनाय चेनेलफोर, प्रिन्ट आरो इलेक्ट्रनिक्स मिडिया, ससियेल मिडिया प्लेटफर्मआव बे खौरांखौ फोसावनाय जादोंदि, करण जहरआ 28 जुलाइ 2019 आव गावनि न'आव जाय पार्टिखौ होदोंमोन, बेवहाय ड्राग्सखौ बाहायनाय जादोंमोन। आं बे खौरांखौ 2019 आवनो सोराङाव लाबोनानै बे दाय जाबसिन्नायखौ नंखाय होन्नानै फोरमायदोंमोन। आथिखालाव गोदानै सोलिहोफिन्नाय बे हाबाफारिखौ नोजोर होनानै आं गोदानै बेखौ बुंनो हास्थायदोंदि, बे दाय जाबसिन्नाया नंखाय। बै पार्टिआव रावबो ड्राग्स जायाखैमोन।
