कक्राझार, 16 आगस्टः बिटिसि बिसायख'थिनि सिगां-सिगां बिटिसिनि दरब्रै जिल्लायाव गुबुन गुबुन समाव हाथियार बोखांनो हानायखौ नुनो मोनबोबाय थानाय जादों। दिनैबो कक्राझार पुलिसनि गोक्रों सिग्रोमनायनि राहा लानायाव सराइबिलनि सिङाव थानाय कात्लिबिल हाग्रा ओन्सोल आरो सेरफांगुरि थानानि सिङाव थानाय बेलगुरि हाग्रानिफ्राय बुरजा बिबांनि हाथियार आरो गुला-बारुद बोखांनो हायो। दिनै बेलासि समाव कक्राझार पुलिस खुंथाया हांक्रायनाय मोनसे खौरांगिरि मेलनि गेजेरजों फोरमायथिनाय बादिब्ला सराइबिलनि कात्लिबिलनिफ्राय गंसे एमएमजि, गं 5 एके 56 राइफल, गं 4 मेगजिन, गर 244 गोथां गुलि बोखांनायनि बेरेखायै सेरफांगुरिनि बेलगुरिनिफ्राय गंसे इन्सास राइफल, गंसे मेगजिन, गंथाम पिस्टल, गं 5 मेगजिन, चीनआव बानायनाय गंसे सिल्लाइ, थर 36 ग्रेनेड आरो मोनसे एमएमजि सेन बोखांनो हायो। मख'नाय बादिब्ला मोनसे इसिङारि सुलुंनि सायाव बिथा खालामनानै जिल्ला पुलिस बिफानआ गोनां सिग्रोमनायनि राहा लादोंमोन।
