कंगना रनतनि अफिसखौ बुख्रुबनायनि उनाव हिमाचल प्रदेशनि गिबि मन्थ्रि जयराम ठाकुरआ गोखों फिनजाथाय होदों

गोदान दिल्ली, 11 सेप्तेम्बर : हिमाचल प्रदेशनि गिबि मन्थ्रि जयराम ठाकुरआ बुधबारखालि मुम्बाइयाव बलिउड फावखुंग्रि कंगना रनतनि अफिस बुख्रुबनायखौ लानानै बिधान सभायाव सोंखारिदों। बे आयदाखौ जागायनायाव बिधान सभायाव उदां बिजाथि हशियार सिंनि गेजेरजों दिखांनाय जादोंमोन ।

बियो बुंदोंदि, हाइकर्टआ होबथानायनि सिगां कंगनानि न'खौ बुख्रुबदों। कंगनाआ हिमाचल प्रदेशनि सासे फिसा हिन्जाव। गिबि मन्थ्रिआ शिबसेना सरकारजों गाग्लोब जानायनि जाउनाव बिनि जिउआव खैफोद नुजानायनि जाहोनाव बिखौ रैखाथि होदोंमोन। बिनि फिन्नाय होनानै गिबि मन्थ्रि जयराम ठाकुरआ बुंदोंदि, फावखुंग्रिनि बिफायाबो गावखौ लोगो हमदों आरो बिनि रैखाथिनि सोमोन्दै जिंगासिनाय फोरमायदों। गिबि मन्थ्रिआ बुंबावदोंदि, गावसोर मानालीआव बिनि न'नि बाइजोआव रैखाथि राहा जगायनानैबो होदों । 

बियो बे जाथायखौ गोबां सोंखारिजाथाव होन्नानै फोरमायदों । राइज्यो सरकारआ महारास्ट्र सरकारनाव आर'ज गाबगोन जाहाथे बियो बिनो मोजां रैखाथिखौ जगायना होयो। मख'नो गोनांदि, मुम्बाइनि पाली हिलआव थानाय कंगना रनतनि अफिसखौ बुधबारखालि बि एम सिनि बिथोन बायदियै जे सि बिजों बुख्रुबहैदोंमोन। बि एम सिनि बिब्दि हाबाफारिनि उनाव कंगनाया आरोबाव खनसे महारास्ट्र सरकारनि सायाव बाथ्रा बुंदों ।

बुधबारआव कंगनाया ससियेल मिडियाआव महारास्ट्र सरकारनि हेंथायै एखेराहायै मोनसेनि उनाव मोनसे टुइट खालामदोंमोन। मोनसे टुइटआव बियो बुंदोंदि, गावखौ उनथिंनिफ्राय गाग्लोबदों जेब्ला गाव फ्लाइटआव दङमोन । नाथाय सिगाङाव नटिस होनो एबा गाग्लोबनो बिसोरनाव साहस गैया। कंगना रनतआ एखेराहायै गावनि हेंथा सुबुंफोरनो टुइटनि गेजेरजों फिन्नाय होदों आरो लोगोसेनो गावखौ सापर्ट खालामनायनि थाखाय सुबुंफोरखौ साबायख'रबो बावदों।