बार्लिन, 27 सेप्तेम्बर: गोदानै थिसनजानाय कच हेन्सि प्लिटनि दैदेन्नायाव बेयार्न मिउनिकआ इउ इ एफ ए सुपार कापनि फाइनाल मेचखौ देरहानो हानायाव जाफुंसारदों। कभिड-19 महामारिनि जाहोनाव इउ इ एफ ए सुपार कापनि फाइनाल मेचआ माखासे दानसिम थाथ'नो गोनां जानायनि उनाव दासान्दि सोलिबाय थानाय गिख्रंथाव थासारिनि गेजेरावबो सुपार कापनि फाइनाल मेचखौ बेयार्न मिउनिक आरो सेबिला क्लाबनि गेजेराव गेलेदों। गेलेनाय मेचखौ मोननैबो हान्जानि गेजेराव जोबथा 90 समसिम गेलेनाया 1-1 गलजों समान समान जायोमोनब्लाबो नाथाय गेलेनायनि नेमखान्थि बादियै उफ्रा टाइम गेलेनानायाव बेयार्न मिउनिकनि गेलेगिरि जाबि मार्टिनेसनि 104 मिनिटआव देरहानाय गलखौ होनो हायो।
मख'नो गोनांदि, फाइनाल मेचनि गेलेनाय समाव सेबिला क्लाबआ खाबु मोन्नायाव 13 मिनिटआव गेलेगिरि लुकासआ गलखौ होनो हादोंमोन। बेनि उनाव सेबिलानि गल आवग्रिनायखौ नोजोर होनानै बेयार्न मिउनिकआ 34 मिनिटआव गेलेगिरि लियननि गल होनायजों समान-समान खालामनो हाफिनो। बेबादिनो नैथि हाफ टाइमनि गेलेनायाव मोननै हान्जानि गेलेनाया गोख्रों जानायजों गल होलायनो हायैयाव उफ्रा समनि गेलेनायावसो मेचनि देरहानाया रोखा जायो। नायग्रा अन्सायारिफोर गैयालासेनो खुंनाय फाइनाल मेचआव मोननैबो हान्जानि गेलेनायखौ सिगांनिफ्राय लानानै जोबथा समसिम गोख्रों जुजिलायनायखौ नुनो मोन्दोंमोन। सिजननि इउ इ एफ ए सुपार कापनि ट्रफीखौ आजावनो हानायाव जार्माननि क्लाब बेयार्न मिउनिकआ जोबोद गोजोन्नाय फोरमायदों आरो रंजाखांदों।
