डिजिटेल डेक्स, 13 सेप्तेम्बरः आसाम पुलिसआ जोबथारनायाव हमनो हाबाय रां बिनानै पुलिसनि एस आइ साख्रिनि लभ होग्रा दायनिगिरिखौ। मखनो गोनांदि, एस आइनि साख्रिनि थाखाय 4 लाख रां बिनायनि मोनसे अडिअ क्लिपआ राइजोयाव भाइरेल जानायनि उनाव पुलिसआ संदानदोंमोन।
संदाननायनि उनाव पुलिसआ दायनिगिरि मनज तामुली मुंनि सुबुंखौ हमनो हायो। लखिमपुर पुलिसआ हमनो हानाय सुबुंनि नखौ आजादर राजखवा गामिनि होननानै मिथिनो मोननाय जादों। मनजजों लोगोसे तेजपुरनि मोनसे गिदिरथार थगायग्रानि हान्जा दङ होननानैबो पुलिसआ सन्देह खालामदों। लखिमपुर पुलिसआ दा हमजानाय दायनिगिरि मनज तामुलीखौ सेबनानै संदाननाया सोलिगासिनो दङ होननानै सुलुङाव मिथनो मोननाय जादों।
