• Home
  • /
  • Breaking News
  • /
  • आसामाव लामानि जाब्रथायनि जाथाया रेकर्ड जादों

November 27, 2020

आसामाव लामानि जाब्रथायनि जाथाया रेकर्ड जादों

गुवाहाटी, 27 नभेम्बरः हादतनि गुबुन गुबुन राइज्योफोरजों लोगोसे आसाम राइज्योयावबो लामा-दालांफोरनि हालोदआ सिगांनिफ्राय एसे साबसिन जानायजों गारि-मथरफोरनि हान्था-मेला खालामनाय बिथिङाव मोजां जादोंब्लाबो नाथाय आसामनि लामा-सामाफोराव गोख्रै खारनाय गारि-मथरफोरजों सम-सम सुबुंफोरनि फार्से दुखु गोनां थासारि लाबोनायखौ नुनो मोन्दों । राइज्योयाव गारि सालायनाय एबा हान्था-मेला खालामनायनि फार्से राइज्यो सरकारआ गोख्रों सांग्रांथि होनायजों लोगोसे आइन खानानै होनाय जादोंब्लाबो सुबुंफोरनि जौ लोंनानै गारि सालायनाया गुबुन दावबायारिफोरनि फार्से खहा लाबोनायखौ नुनो मोन्दों। बेनिनो मोनसे खेंफोरथिनि गेजेरजों बिदिन्थिखौ होनो हायोदि, थांनाय 2019 माइथायाव आसामाव मोन 8000 लामानि सौग्रावनाय जाथायाव खमैबो सा 3 रोजानिबो बांसिन सुबुंफोरनि जिउ खहा जानाय जाथाया मोनसे रेकर्ड जानानै थादों।

बेबायदिनो 26 नभेम्बरखालि राइज्योनि सिङाव मोनसे गारिनि सौग्रावनाय जाथायाव खमैबो सा 6 सुबुंफोरा जायगायावनो जिउ खहा जायो। जाथायनि बागै सुलुंनिफ्राय मिथिनो मोन्नाय बादिब्ला डिब्रूगड़ जिल्लानि लेपेतखाटा मुंनि जायगायाव दिनै फुंनि समाव गारि सौग्रावनाय जाथायाव सा 6 सुबुंफोरा जिउ खहा जानायनि अनगायैबो गुबुन मोनसे जाथाया लखिमपुरनि ढक सासे सुबुङा जायगायावनो जिउ खहा जायो। आसामनि गिबि मन्थ्रि सर्बानन्द सनवालआ गारि सौग्रावनाय जाथायाव जिउ खहा जानाय सुबुंनि दुखुथिया नख'रनिसिम गावनि गोथौ दुखु मोन्नायखौ फोरमायहरदों। लोगोसे जाथायनि सायाव गोनांथारै खौरां लानो थाखाय डिब्रुगड़ जिल्ला खुंथायजों फोनांजाब खालामनानै राहा लानो बिथोन होयो। डिब्रुगड़ जिल्लानि 37 नं माहारियारि गाहाय राजा लामायाव गंसे एक्स इउ भि गारिजों गुबुन फार्से जायगायाव दावबायलांनाय एबा रावना होलांनाय समावनो गारिनि खारनाय गोख्रैथिखौ दबथायनो हायैनि जाहोनाव गंसे ट्राकजों गोब्राबै सौग्रावो। जाथायखौ साखाथियावनो नुनो मोन्नाय सुबुङा फोरमायनाय बादिब्ला बिसोर सुबुंफोरा धेमाजि फार्सेनिफ्राय फैगासिनो दंमोन आरो गंसे ट्राकजों गोब्राबै सौग्रावनायनि जाहोनाव जायगायावनो सा 5 सुबुंफोरा जिउ गोमायो। गुबुन फार्सेथिं राइज्योयाव माहारियारि राजा लामाफोराव सानफ्रोमबो गारि-मथरफोरनि जाब्रबथाय जानाय जाथायफोरखौ नोजोर होनानै लामानि गारि-मथर सौग्रावनाय जाथायाव खमैबो सा 3,245 सुबुंफोरा जिउ खहा जादों। अदेबानि सिगांफोरनि रुजुनायाव थांनाय बोसोरनिफ्राय आसाम राइज्योनि लामा-सामाफोराव गारि-मथरजों सौग्रावनाय जाथाया बांसिन्नानै मोनसे रेकर्ड जादों होन्नानै खेंफोरथियाव फोरमायथियो।

Share with your friends!

Related Posts

आसामाव जेब्लासिम BJP सोरखार थागोन अब्लासिम फिसा फिसा हारि हारिसाफोरनि मोन्थायफोरा जोबस्रांलांगोन : कास्तम बसुमतारि

आसामाव जेब्लासिम BJP सोरखार थागोन अब्लासिम फिसा फिसा हारि हारिसाफोरनि मोन्थायफोरा जोबस्रांलांगोन : कास्तम बसुमतारि

संका बानदो, जामफैनि दैखौ बानदो थेनानै दै दिखांनो हायैजों जिंगा सिनांदों माखासे आबादारिफोरा

संका बानदो, जामफैनि दैखौ बानदो थेनानै दै दिखांनो हायैजों जिंगा सिनांदों माखासे आबादारिफोरा

सा 30 NLFB नि सोद्रोमाफोरा दिनै सौफैबावबाय

सा 30 NLFB नि सोद्रोमाफोरा दिनै सौफैबावबाय

भारतनि हान्जाया जोबथा मेचयाव मुलुगनि नैथि हान्जा आर्जेन्टिनानि हेथायै ड्र गेलेदों

भारतनि हान्जाया जोबथा मेचयाव मुलुगनि नैथि हान्जा आर्जेन्टिनानि हेथायै ड्र गेलेदों

Published by

Bodosa


Bodosa is a Daily Newspaper, printed in Bodo language.

Leave Your Comment Here