गुवाहाटी, 5 अक्ट'बर: भारत हादतनि फुटबल गेलेमुखौ मुलुगनि फोथाराव लांनायनि थांखिजों जरखायै खुंनाय इन्डियान सुपार लीग (आइएसएल) नि गेलेनायखौ थांनाय माखासे बोसोरनिफ्राय हादतनि गुबुन गुबुन गेलेग्रा फोथाराव फारियै खुंबोदों । फैगौ सिजननि इन्डियान सुपार लीगनि मेचखौ देरहानो थांखिजों नर्थ इष्ट इउनाइटेड एफसिआ बे समाव मिजिंथिजानाय गोखों गेलेगिरिफोरखौ हान्जायाव गोरोबथानि गेजेरजों लाबोनाय जादों। थांनाय बावैसो साननि सिगां मावरिसियान आरो परटुगालनि गेलेगिरिखौ नर्थ इष्ट इउनाइटेड एफसिआ हान्जायाव गेलेनो लाबोनायनि उनावनो मैया अष्ट्रेलियानि डिफेन्डार डेलान फक्सखौ हान्जायाव गोरोबथानि गेजेरजों लाबोनाय खौरांखौ मिथिनो मोन्दों। सुलुंनि बायदिब्ला थांनाय सिजननि आइ लीगआव डिफेन्डार डेलान फक्सआ सेन्ट्रल कस्ट मारिनार्स हान्जाजों गेलेदोंमोन।
लाइमोन डिफेन्डारनि भारतयाव 7 बोसोरसिम गेलेनाय रोंगौथि आरो गोख्रोंथिखौ नुनानै नर्थ इष्ट इउनाइटेड एफसिआ बोसोरसेनि थाखार बादायलायनायाव अष्ट्रेलियानि लाइमोन गेलेगिरिया साबसिन गेलेगिरि बान्थाखौ आजावनो हाबोदोंमोन । नर्थ इष्ट इउनाइटेड एफसिनि मावफुं बिथोनगिरि प्रिया रुनसालआ बुङोदि, डेलान फक्सआ आइ लीगआव गावखौनो गोख्रों गेलेगिरि महरै दिन्थिनो हादों आरो बेनि गेलेनायजों हान्जाया फैगौ सिजननि आइएसएलआव गोख्रोंसिन गेलेनो हागोनखौबो मिजिंथि लाखिदों । गुबुन फारसेथिं अष्ट्रेलियानि डिफेन्डारआ भारतनि आइएसएलआव इउनाइटेड एफसिजों गेलेनो थाखाय गोरोबथा जानायखौ जोबोर गोजोन्नाय फोरमायदों आरो गावनि गेलेनायखौ थाबैनो हान्जाजों जागायजेनगोन होन्ना बाथ्रा होयो। लोगोसे इउनाइटेड एफसिनि गाहाय कचनि दैदेननायाव गेलेनो खाबु मोनगोनखौ गावनि खाफाल गोनां होन्नानैबो फोरमायदों।
