गोदान दिल्ली, 14 अक्टबरः भारतनि आइजो हकी हान्जानि गुबुन सासे गोख्रों गेलेगिरि महरै मिबथिसारजानाय गुरजित कौरआ फोथायोदि, फैगौ बोसोराव खुंजानो गोनां गेलेमुनि देरसिन बादायलायनाय टकिय अलिम्पिक गेम्सआव हादरनि हकी हान्जानि थाखाय साबसिन गेलेनायनि सम होन्नानै फोरमायदों। जापाननि राजथावनि टकिय सहरआव फैगौ बोसोरनि जुलाइ दानआव खुंनो गोनां अलिम्पिक गेम्सनि थाखाय क्वालिफाइ जानो हाखांनानै दासान्दि प्रेक्टिस खालामनायखौ गोख्रोङै सोलिहोबाय थादों हान्जाया। मुलुगनि जायखि-जाया हान्जाफोरनि हेंथायै गोख्रों गेलेनो थांखिजों फैगौ अलिम्पिक गेम्सआव हान्जाया गेलेनो थाखाय थियारि जानाय बाथ्राखौबो रायखांनानै गुरजित सिंआ बुङोदि, हान्जाया फैगौ समाव साबसिन गेलेनायनि मोजां खाबु दङ।
25 बोसोर बैसोनि गेलेगिरि कौरआ बुंबावोदि, थांनाय बोसोराव मुलुगनि गोख्रों आइजो हकी हान्जाफोरनि हेंथायै देरहाबोनो हानायखौ नोजोर होयोब्ला हान्जाया फैगौ समाव साबसिन गेलेनो हानायनि मिजिं दङ। लोगोसे हान्जाखौ साबसिन आरो गोख्रोंसिन गेलेनो हागोन होन्नानै गेलेगिरिआ फोथायनाय लाखियो। भारतनि जानानै दासिम मोन 80 निबो बांसिन हकी मुलुगनां मेचफोरखौ गेलेखांनाय गुरजित कौरआ बुंबावोदि, कभिड-19 नि गेजेरावनो थांनाय 19 आगस्टनिफ्राय हान्जाया प्रेक्टिस खालामनायखौ सोलिहोगासिनो दङ। गेलेग्रा फोथारआव मुलुगनां मेचफोरखौ गेलेनो हायाखैब्लाबो नाथाय प्रेक्टिस खालामनायनि गेजेरजों सिगांनि गोख्रों गेलेनाय फर्मखौ लाबोफिन्नो हागोन होन्नानै गेलेगिरिआ बुङो। बेराफार्से दासान्दि कभिड-19 नि समाव गेलेनायखौ लाबोफिन्नाया साफ्रोमबो गेलेगिरिफोरनि थाखाय गिथावना आरो फोत गोनां जादों होन्नानै फोरमायो।
