BTR

रौता, 2डिसेम्बर: बोहैथि बोसोर 2020 माइथायाव हादरनां थाखोआव खुंनाय नेसनेल इलिजिबिलिटि काम एन्ट्रेन्स टेस्ट (NEET) सायख’ आन्जादआव 720/391 स्कर खालामनानै बरपेटा मेडिकल कलेजआव एमबिबिएस थाखोआव मुंथिसन्नो खाबु मोननो हादों उदालगुरि जिल्लानि रौता चारियालिनि थागिबि भुपेन ब्रह्म आरो जयमुथि ब्रह्मनि नैथि फिसाजो मुलुगमा ब्रह्म (सना)आ। मख’नो गोनांदि, मुलुगमा ब्रह्मनि सिगां रौता चारियालि ओन्सोलनि रावबो बर’ फिसाया बेबादि सायख’जानानै एमबिबिएस फरायनो मोन्नाय जाथ’याखैमोन। मुलुगमानि बेबादि देरहासारनायाव ओन्सोलनि राइजो-राजाफोरा गोसोआव देरगानाय मोन्दों आरो बिमाइ सनिलाल ब्रह्म (Rtd Sr. DCM. NFRly) आरो बिमाइ उन्दै प्रभात ब्रह्म (सिटिआइ, सियालदाह स्टेसन) बिथांमोनहा गोसो गोर्बोनिफ्राय जुनिया साबायख’र बाउहरदों। मुलुगमा ब्रह्मआ जाफुसारथों आरो गोजों इयुन मोन्नो हाथों बेखौनो ओन्सोलनि बयबो गोसोजों हास्थायनाय फोरमायदों।

कक्राझार, 1 डिसेम्बरः बर’ थुनलाइ आफादआ फैगौ 5 डिसेम्बर, 2020 अक्ट’खालि आफादनि मोनसे समनि बारग’ आफादगिरि गेदेमा लिरगिरि आरो समाज सिबियारि रुंसारि ब्रजेन्द्र कुमारनि थैनाय सानखौ मिरुनाङै गिबि खेब गाब गोनाङै फालिनो थाखाय थि खालामनाय जादों आरो बिथांनि रुंसारि जानाय सानखौ फालिनायजों लोब्बा लाखिनानै सेथि खन्थाय सान फालिनोबो थि खालामनाय जादों। बेनिखायनो बे हाबाफारियाव बाहागो लाफैनानै हाबाफारिखौ मेहेरगोनाङै जाफुंसार होफैनो थाखाय मिरु बर’ थुनलाइ आफाद आरो कक्राझार जिल्ला बर’ थुनलाइ आफादआ जुथायै गासैबो बर’ राइजो-राजाफोरखौ बाहागो लाफैनो थाखाय गुरैयै खावलायहरदों। हाबाफारि बादियै 5 डिसेम्बरखालि फुंनि 7 रिंगायाव कक्राझार जिल्लानि सिङाव थानाय दतमा लङाबाङि (सालानि बाथाबारि)आव रुंसारि ब्रजेन्द्र कुमार ब्रह्मनि मांखरसालियाव बिबार बाउगोन। फुंनि गु रिंगायाव कक्राझार सहरनि रुपनाथ ब्रह्म गोसोखां नमायाव बर’ थुनलाइ आफादनि फिरफिला बिरहोगोन आरो रुंसारिनि सावमुआव बिबार बाउगोन । बेनि उनाव फुंबिलि 10 रिंगायाव कक्राझार सहरनि रुपनाथ ब्रह्म गोसोखां नमायाव खन्थाय सान फालिनाय जागोन।

गुवाहाटी, 1 डिसेम्बरः बिटिसिआव दासान्दि बिसायख’थिखौ लानानै गुबुन गुबुन राजखान्थि दोलोफोरनि फोसावदिंनायजों ओन्सोलनि बिसायख’थियारि थासारिआ दुंहाव जानानै दङ। समबारखालि 25 नं बागानपारा बियाबनि बिजेपि दोलोनि बिजाथि आरति बरदलैनि जानानै बिसायख’थि फोसावदिंफैदों बिजेपिनि राइज्योयारि आफादगिरि रन्जित कुमार दासआ। फोसावदिंनाय मेलआव आफादगिरि दासआ गोबां बाथ्राफोर फोरमायथियो। खौरांगिरिनि सोंनायनि फिनआव आफादगिरि दासआ बुङोदि, फैगौ बिटिसि बिसायख’थिनि फोसावदिंनाय मेलफोराव हाग्रामा महिलारि आरो हिमन्त बिश्व शर्माआ सासेआ गुबुन सासेखौ मावजि, मोख्रा, सियाल बायदि सोदोब बाहायनानै बिबुंथिजों सोंखारिलायनानै गाग्लोबलायदोंमोन। जिब जुनातनि मुं लानानै बिबुंथिजों गाग्लोबलायनाय जाथायखौ फिनजाथाय होनानै रन्जित कुमार दासआ बुङोदि, हिमन्त आरो हाग्रामाआ बेफोर बादि सोदोब बाहायैआनो गाहाम। लोगोसे दासआ बुंबावोदि, बिश्वजित दैमारिआ बिटिसिनि गाहाय खुंगिरि सिफ जाया, नाथाय बिजेपि दोलोनिफ्राय पार्लियामेन्टयाव राइज्यो सभानि एमपिसो जागोन। बे खेबनि बिटिसि बिसायख’थियाव देरहानानै बिजेपि सरकार जायोब्ला बर’ हारिनिफ्रायनो गाहाय खुंगिरि सिफ जागोन आरो गुबुन अबर’ हारिनिफ्राय लेडाइ गाहाय एबा डिपुटि सिफ जागोन होन्नानै रोखा खालामनानै होयो।

कक्राझार, 1 डिसेम्परः ब्रैथि बिटिसि बिसायख’थिया खुंजागोननि समआ जेसेबांनो खाथि नोजोराव सफैदों एसेबांनो राजखान्थि दोलोनि दैदेनगिरिफोरनि फोसावदिंनायनि मुङाव गुबुन गुबुन हाबाफारि लानायखौ बे समाव नुनो मोन्दों। गेजेराव माखासे सानल’ थाबावनायनि सिगांनो बिटिसि बिसायख’थिखौ मिरु खालामनानै गुबुन गुबुन राजखान्थि दोलोफोरा गाव-गावनि बियाबफोराव फसंनाय बिजाथिखौ सोलो-बोलोजों देरहाहोनायनि थांखि लानानै आरो भटार राइजो-राजाफोरखौ लाफानानै दासान्दि गोहो दिन्थिनायखौबो नुनो मोन्दों। बेबादि समावनो राजखान्थिगिरिफोरनि अजद खालामलायनाय आरो बाथ्रानि बान गावलायनायखौबो नुनो मोन्दों। थारैनो बिसायख’थिनि खाथि नोजोराव इउपिपिएल दोलोनिफ्राय ओखारनांनाय पृथ्विराज नारायन देब मेचआ थांनाय माखासे सानफोराव इउपिपिएल दोलोनि आफादगिरि प्रमद बर’नि हेंथायै माखासे आयदाखौ लानानै नंखाय अजद खालामदोंमोन। बेखौ लानानै समबारखालि खौरागिरि मेल खुंनानै इउपिपिएल दोलोआ पृथ्विराज नारायननि हेंथायै कक्राझार पुलिस थानायाव गसर थिसन्नाय बाथ्राखौ मिबथिहोदों। गांसे रादाब बिबुंसारनि गेजेरजों इउपिपिएल दोलोनि आफादगिरि प्रमद बर’नि हेंथायै नारायन देब मेचआ माखासे अजद लाबोदोंमोन, जेराव भटार राइजो-राजाफोरखौ गावस्राहोनायनि सोलो बाहायनानै पृथ्विराज देब मेचआ प्रमद बर’नि हेंथायै बायदिसिना आयदाखौ बोखांनानै अजद खालामदोंमोन होन्नानै इउपिपिएल दोलोआ फिनजाथाय खालामो। बिटिसिनि ट्राइबेल बेल्ट आरो ब्लकआव थानाय आइन बेरेखायै हाबफैनाय सुबुंफोरखौ प्रमद बर’आ होखारगोन होन्नानै बुंथिनाय बाथ्रानि फिन्नाय होनानै बे बिथिडाव सिगाङाव पृथ्विराज नारायन देब मेचआ गावसो सार्थनि थाखाय गसर थिसन्दोंमोन होन्नानै इउपिपिएलआ अजद खालामो। इउपिपिएल दोलोआ दोलोनि आफादगिरि प्रमद बर’नि हेंथायै नंखाय अजद खालामनायनि दायाव कक्राझार पुलिस थानायाव गसर थिसन्नायनि उनाव पृथ्विराज नारायन देब मेचआ बेनि सायाव फिन्नाय होनांगोन एबा आइननि गेजेरजों मोगा-मोगि जानांगोनखौ रोखा नुहरदों।

काजलगाव, 28 नभेम्बरः सोलिफु बोसोर 2020 आव खुंजानाय हादरनां थाखोनि थिसन्थाय आनजाद थामहिनबा नेसनेल इलिजिबिलिटि काम एनथेन्स टेस्टआव आसामनि दाब दाब जिल्लाफोरजों लोगोसे आफां आसामनि कक्राझार, चिरां, बाक्सा आरो उदालगुरिनिफ्रायबो गोबां फरायसाफोरा उथ्रिसार जानो हानानै गोजौ सोलोंथाय फसंथानफोराव मुं थिसन्नो खाबु मोनदों। बेबादिनो चिरां जिल्लानि सिङाव थानाय बेंटल बिक्रमपुर गामिनि आलिसा हाज’वारीआबो गावनि गोब्राब नाजानाय आरो कस्ट खालामनायनि गेजेराव हादरनां थाखोनि बे बादायारि आनजादखौ उथ्रिसारनानै एम बि बि एस थाखोआव मुं थिस’ननो हानानै जिल्लानि आरो ओनसोलनि थाखाय देरगानाय लाबोदों। बिक्रमपुर गामिनि थागिबि बेनेडिक हाज’वारीनि आंगोनि फिसाजो आलिसा हाज’वारीआ ‘निट’ आनजादाव उथ्रिनो हानानै दिफु मेडिकल कलेजआव एम बि बि एस थाखोनि थाखाय मुं थिसन्नो हादों। आलिसा हाज’वारीआ गावनि थांखि आरो सिमां बादियै एम बि बि एस कर्सखौ आबुङै फोजोबनो हानानै जाफुंसार जाहैनो हागोनखौ मिजिंथिनाय फोरमायदों लोगोसे बिफा बेनेडिक हाज’वारीआबो एम बि बि एसखौ जाफुंसार खालामनानै नख’रनि, ओनसोलनि आरो जिल्लानि थाखाय गोग्गानाय लाबोनो हागोनखौ गावनि फिसाजो आलिसा हाज’वारीनि सायाव मिजिंथिनाय फोरमायदों।