Bodosa

काजलगाव महखुमा फोरमायथाय आरो सुबुं फोनांजाब मावख’गिरिनि बानजायनाय आरो मावखनिनो सावराय नब्लांआव हादर सिबिनाय सान” फालिदों गेदेमा रुंसारि तरुनराम फुखन नि थैनाय सानखौ लोबबा लाखिनानै । तरुन राम फुखना 22 जानुवारि 1877 आव जोनोम जानानै 28 जुलाई 1939 माइथाइआव रुंसारि जादोंमोन।  बिथां आ सासे गोगख्रों दैदेनगिरिमोन इनडियान नेसनेल खंग्रेग दोलोनि। बे मेहेर गोनां दिनखौ फालिनायाव चिरां जिललानि उफ्रा जिलला बेंगिरि, फनिनद्र दास, सहित’ बानथा मोनगिरि मुस्रि लखिनाथ ब्रह्म, चिरां जिलला प्रेस क्लबनि आफादगिरि मुस्रि अब्बु बख्खार सिधिग, फोरमाइथाइ आरो चिरां जिललानि सुबुं फोनांजाब मावख’गिरिनि मुस्रि गगन नारजारि जों लोगोसे बे जिललानिनो गोबां खौरांगिरि मोनहा नुजाफैनानै बिथां तरुन राम फुखनानो खुलुमना मान बावदों। चिरां जिलला नि उफ्रा जिलला बेंगिरि, फनिनद्र दास आरो मुस्रि लखिनाथ ब्रह्म मोनहा गावसोरनि बिबुंथि लाखिनाय समाव तरुन राम फुखनानि जिउ जारिमिन, बिथांनि हदर उननाय आरो हदरनि उदांस्रिनि थाखाइ खामानि मावनायनि सायाव सुंद’यै फोरमायलांयो।

बाक्सा जिल्लानि सिङाव थानाय गरेस्वर खोन्दो जौगाखां बिबानगिरि मावखनि मावफारियानि सायाव बि जे पिनि दैदेनगिरि एबा बिधान सभानि मासिगिरि बिस्वजित दैमारीनि हेफाजाबगिरि टि सि एल सि सि बर्डनि लेङाइ मासिगिरि दयाल डेकाया गाग्लोबो। मिथिनाय बादिब्ला एम जि एन रेगानि सिङाव 20 लाख रांनि माथावरि लुफुंनायनि खामानि मोनदोंमोन बिपुल डेकाआ। खामानिखौ आबुङै मावफुङालासेनो रांखौ दिहुनजोबनो नाजादोंमोन थिकादार आरो टि सि एल सि सिनि लेङाइ मासिगिरि दयाल डेकाआ। नाथाय जौगाखां खोन्दो मावखनि मावफारिया नयन महन्तआ माथाउरि लुफुंनायनि खामानिया 70 जौखोन्दोल जादों होन्नानै बुंनायनि थाखाय रागा जोंनानै मावफारिया नयन महन्तखौ मावखनि सिङावनो गाग्लोबो दयाल डेका आरो बिपुल डेका मोनहा। बे जाथायनि उनाव मावखनि बिबानगिरि-मावफारियाफोरा मावखनि लांगोना मोखाङाव दायनिगिरिखौ पुलिसआ हमनानै गोख्रों साजा होनांगौनि दाबि दैखांनानै सोमावसारनाय हाबाफारि लायो। बे जाथायनि लोब्बाजों आरो टि सि एल सि सिनि लेङाइ मासिगिरि दयाल डेका आरो थिकादार बिपुल डेकानि हेंथायै गरेस्वर पुलिस थानाय मोनसे केसबो थिसनहैयो। लोगोसे बे केसनि कपिखौ बिथांखि बिबानगिरि, जिल्ला बेंगिरि, पुलिस बिबानगिरि आरो गरेस्वर सार्कलनि बिबानगिरिनिसिम दैथायहरो होन्नानै मिथिनो मोन्नाय जादों।

गसाइगाव महखुम्मा फोरमायथाय आरो सुबुं फोनांजाब मावख’गिरि मावख’नि बानजायनायाव हादोत सिबिथाय सान फालिदों। बे सानखौ हादोत सिबिसुला रुंसारि तरुनराम फुकननि गोसोखांथि सान महरै गिबि खेबनि थाखाय राज्यो नाङैनो “हादोत सिबिथाय सान” महरै फालिजेन्दों। तरुनराम फुकनआ आसामनि मादाव सासे मुंदांखा हादोर अनफावरि सासे सिबिसुला गोसोनि गियानि जोहोलावमोन। बिथाङा 1877 मायथायनि 22 जानुवारी खालि जोनोम जादोंमोन आरो 1939 मायथाइनि 28 जानुवारी दिनखालि 62 बोसोर बैसोआव रुंसारि जालांदोंमोन। बे हाबाफारिया कक्राझार जिल्लानि गसाइगाव महकुमानि महहकुमा फोरमायथि आरो सुबुं फोनांजाब बिफाननि मावख’आव कभिदनि नेम-खान्थिखौ मानिनायनि गेजेरजों खुंफुंलाङो। बे हाबाफारिखौ गसाइगाव प्रेस क्लाबनि बोसोनगिरि संकर चौधुरिनि सामब्लायनायाव खुंफुंनाय जायो। बे हाबाफारियाव गसाइगाव महकुमा फोरमायथाइ आरो सुबुं फोनांजाब बिफाननि मावख’गिरि बिग्राय बसुमतारी,  लोगोसे आलासि महरै गसाइगाव महखुम्मा लेङाई बेंगिरि रसिहुल आलम, गसाइगाव आसाम साहित्य सभानि आफादगिरि फनिन्द्र’ नाथ दास, गसाइगाव प्रेस क्लाबनि आफादगिरि हाफिजूर रहमान आरो गाहाय नेहाथारि उथफल दे मोनजों गुबुन गोबां दैदेनगिरि-सोद्रोमाफोराबो बाहागो लादोंमोन।

थांनाय माखासे साननिफ्रायनो उदालगुरि जिल्लानि भेरगावनि गुबुन गुबुन ओन्सोलाव हाग्रानि मैदेरा उदखार खालामबोदों। उदालगुरि जिल्लानि भारत-भुटान सिमा ओन्सोल डिमाकुसि, रजागड़, नालापारा, धरमजुलि, टेंकिबस्टि, भुटियासां, भलातार, हातिगड़, उलुबारि, घाग्रा, बगरितल बायदि ओन्सोलफोराव हाग्रानि मैदेरनि फालोआ हाबफैनानै आबादफोरखौ खहा खालामनायजों लोगोसे न-बांफोरखौबो बोफाय-बोसि खालामना सिलिंखार खालामलाङो। हाग्रानि मैदेरनि फालोआ न-बां सिलिखार खालामजानाय नखरफोराव  बि टि चिनि मावफुं सोद्रोमा सन्जित तान्तिआ दावबायहैनानै थासारिनि सायाव सुलु लाहैनायजों लोगोसे न-बांफोरखौ फिन लुफुंनो थाखाय रांखान्थियारि अनसुंथाय होयो आरो थाबैनो हाग्रा बिफानजों सावरायलायनानै सरकारनिफ्राय अनसुंथाय होगोन होन्नानै बिथाङा बुंबावो।