Bodosa
जोबोद गुसु बोथोरजों लोगोसे डिसेम्बरआ जागायबाय
गोदान दिल्ली, 2डिसेम्बर: डिसेम्बर दानआ जागायनायजों लोगोसे गुसुआबो जागायबाय। बेनि गेजेरजों हाजो ओन्सोलफोराव बरफ गोग्लैनाया जागायबाय, जायनि गोहोमखौ फोथार ओन्सोलफोराव रोखायै नुनो मोन्नाय जायो। माखासे फोथार ओन्सोलफोराव फुंनि समा जोबोद गुसुजों लोगोसे जागायजेनो। आथिखालाव बेयाव सान्जौफुनि समाव सान ओंखारनायनिबो गोहोमखौ नुनो मोन्नाय जादों, नाथाय अब्लाबो गुसुआ सोलिबाय थासिगोन। अदेबानि हारियाणा, उत्तर प्रदेश, पान्जाबजों लोगोसे माखासे राइज्योफोराव जोबोद गुसुआ आगान खोख्लैबाय। बेरा फारसे तामिलनाडु आरो केरेला बायदि राइज्योफोराव निवारनि उनाव दा आरोबाव मोनसे बारहुंखा फैनायनि सन्देह दंबावो। बे जाहोनाव बे ओन्सोलफोराव गोबां अखा आरो गोख्रों बार बारनो हागौ। मख’नो गोनांदि, हारियाणाआव गुसुनि जाहोनाव सुबुंफोरा गावबा-गावनि सानफ्रोमबोनि खामानि मावनायाव जेंना गोनां जाबाय। नारनौलआ राइज्योनि बयनिख्रुइ गुसुसिन ओन्सोल, जेराव बिदुंखौ 6.2 डिग्री सेल्सियाससिम हमदांनो हानाय जादों। बेनि उनाव हिसार आरो रहतक, जेराव थांनाय सानथामनि गेजेराव बिदुङा 3 आरो 6 डिग्री सेल्सियासनि गेजेराव थादों। हिसारआव हरनि समाव बिदुं 6.9 डिग्री सेल्सियासजों लोगोसे बे ओनसोलाव 3 बोसोरनि रिकर्डखौ सिफायदों। बेराफारसे, दिल्लीयाव थांनाय नभेम्बरनि दाना बे बोसोरनि रिकर्डखौ सिफायो। दिल्लीआव बे दानाव 71 बोसोरनि गेजेराव बयनिख्रुइ गुसुसिन जायो आरो बेयाव फैगौ समफोराव गुसुआ बारायबावनो हाबावगौ।
फैगौ 5 डिसेम्बरआव बर’ थुनलाइ आफादनि बारग’ आफादगिरि ब्रजेन्द्र कुमार ब्रह्मनि रंसारि सान फालिनो साखाफारा
कक्राझार, 1 डिसेम्बरः बर’ थुनलाइ आफादआ फैगौ 5 डिसेम्बर, 2020 अक्ट’खालि आफादनि मोनसे समनि बारग’ आफादगिरि गेदेमा लिरगिरि आरो समाज सिबियारि रुंसारि ब्रजेन्द्र कुमारनि थैनाय सानखौ मिरुनाङै गिबि खेब गाब गोनाङै फालिनो थाखाय थि खालामनाय जादों आरो बिथांनि रुंसारि जानाय सानखौ फालिनायजों लोब्बा लाखिनानै सेथि खन्थाय सान फालिनोबो थि खालामनाय जादों। बेनिखायनो बे हाबाफारियाव बाहागो लाफैनानै हाबाफारिखौ मेहेरगोनाङै जाफुंसार होफैनो थाखाय मिरु बर’ थुनलाइ आफाद आरो कक्राझार जिल्ला बर’ थुनलाइ आफादआ जुथायै गासैबो बर’ राइजो-राजाफोरखौ बाहागो लाफैनो थाखाय गुरैयै खावलायहरदों। हाबाफारि बादियै 5 डिसेम्बरखालि फुंनि 7 रिंगायाव कक्राझार जिल्लानि सिङाव थानाय दतमा लङाबाङि (सालानि बाथाबारि)आव रुंसारि ब्रजेन्द्र कुमार ब्रह्मनि मांखरसालियाव बिबार बाउगोन। फुंनि गु रिंगायाव कक्राझार सहरनि रुपनाथ ब्रह्म गोसोखां नमायाव बर’ थुनलाइ आफादनि फिरफिला बिरहोगोन आरो रुंसारिनि सावमुआव बिबार बाउगोन । बेनि उनाव फुंबिलि 10 रिंगायाव कक्राझार सहरनि रुपनाथ ब्रह्म गोसोखां नमायाव खन्थाय सान फालिनाय जागोन।
बिटिआरनि चीफआ बर’ निफ्रायनो जागोन, अबर’ निफ्राय डिपुटि सिफ जागोन : रन्जित दास
गुवाहाटी, 1 डिसेम्बरः बिटिसिआव दासान्दि बिसायख’थिखौ लानानै गुबुन गुबुन राजखान्थि दोलोफोरनि फोसावदिंनायजों ओन्सोलनि बिसायख’थियारि थासारिआ दुंहाव जानानै दङ। समबारखालि 25 नं बागानपारा बियाबनि बिजेपि दोलोनि बिजाथि आरति बरदलैनि जानानै बिसायख’थि फोसावदिंफैदों बिजेपिनि राइज्योयारि आफादगिरि रन्जित कुमार दासआ। फोसावदिंनाय मेलआव आफादगिरि दासआ गोबां बाथ्राफोर फोरमायथियो। खौरांगिरिनि सोंनायनि फिनआव आफादगिरि दासआ बुङोदि, फैगौ बिटिसि बिसायख’थिनि फोसावदिंनाय मेलफोराव हाग्रामा महिलारि आरो हिमन्त बिश्व शर्माआ सासेआ गुबुन सासेखौ मावजि, मोख्रा, सियाल बायदि सोदोब बाहायनानै बिबुंथिजों सोंखारिलायनानै गाग्लोबलायदोंमोन। जिब जुनातनि मुं लानानै बिबुंथिजों गाग्लोबलायनाय जाथायखौ फिनजाथाय होनानै रन्जित कुमार दासआ बुङोदि, हिमन्त आरो हाग्रामाआ बेफोर बादि सोदोब बाहायैआनो गाहाम। लोगोसे दासआ बुंबावोदि, बिश्वजित दैमारिआ बिटिसिनि गाहाय खुंगिरि सिफ जाया, नाथाय बिजेपि दोलोनिफ्राय पार्लियामेन्टयाव राइज्यो सभानि एमपिसो जागोन। बे खेबनि बिटिसि बिसायख’थियाव देरहानानै बिजेपि सरकार जायोब्ला बर’ हारिनिफ्रायनो गाहाय खुंगिरि सिफ जागोन आरो गुबुन अबर’ हारिनिफ्राय लेडाइ गाहाय एबा डिपुटि सिफ जागोन होन्नानै रोखा खालामनानै होयो।
गुदि फरायसालिफोरा आसामाव 1 जानुवारिनिफ्राय खुलिफिनसिगोन
गुवाहाटी, 1डिसेम्बर : आसामनि सोलोंथाय मन्थ्रि हिमन्त बिश्व शर्माआ समबारखालि सोलोंथायनि मोनसे गोनां बाथ्रा फोसावदों। मन्थ्रि सर्माआ फोसावनाय बादिब्ला करना महामारिनि जाहोनाव गोबाव दानफोर सम बन्ध जानानै थानायनि उनाव गुदि फरायसालिफोरखौबो फैगौ गोदान बोसोर 2021नि 1 जानुवारिनिफ्राय खुलिफिनसिगोन। बे आयदानि सायाव थांखि लानायखौ मन्थ्रि शर्माआ फोरमायबावोदि, राज्योनि गेजेराव थानाय गुदि फोरोंगिरि गौथुमफोरजों गोबां खेब सावरायनायनि उनाव राज्यो सरकारआ जोबथा थांखि लादोंदि, गुदि फरायसालिफोरखौ फैगौ 1 जानुवारिनिफ्राय खुलिफिननाय जासिगोन। बिथाङा फोरमायबावनाय बादिब्ला गुदि फरायसालिनि थाखो खालामनानि थाखाय थाबैनो मोनसे गोदान गाइडलाइन फोसावनाय जागोन। एरैहाय सोलोंथाय बिफाना बावैसो सिगां मोनसे बिथोनथि फोसावनाय बादियै फरायसालिमाफोरनि हस्टेलफोराबो जखाथिनि गेजेरजों फैगौ 15 डिसेम्बरनिफ्राय बेखेवजाफिनगोन। जोबथा बोसोर थाखोनि फरायसाफोरा गावबा-गावनि हस्टेलफोराव फैफिननो हासिगोन। बिनि थाखाय सोलोंथाय बिफाना गासै फरायसालिमाफोरनि गोरायुं आरो फरायसालिमा खुंथायफोरनिसिम हस्टेलफोरखौ साखोन-सिखोन खालामफिननो आरो थियारि खालामनो थाखाय बिथोनलाइ हरखांबाय।
पृथ्विराज नारायन देब मेचनि हेंथायै कक्राझार पुलिस थानायाव इउपिपिएलनि गसर
कक्राझार, 1 डिसेम्परः ब्रैथि बिटिसि बिसायख’थिया खुंजागोननि समआ जेसेबांनो खाथि नोजोराव सफैदों एसेबांनो राजखान्थि दोलोनि दैदेनगिरिफोरनि फोसावदिंनायनि मुङाव गुबुन गुबुन हाबाफारि लानायखौ बे समाव नुनो मोन्दों। गेजेराव माखासे सानल’ थाबावनायनि सिगांनो बिटिसि बिसायख’थिखौ मिरु खालामनानै गुबुन गुबुन राजखान्थि दोलोफोरा गाव-गावनि बियाबफोराव फसंनाय बिजाथिखौ सोलो-बोलोजों देरहाहोनायनि थांखि लानानै आरो भटार राइजो-राजाफोरखौ लाफानानै दासान्दि गोहो दिन्थिनायखौबो नुनो मोन्दों। बेबादि समावनो राजखान्थिगिरिफोरनि अजद खालामलायनाय आरो बाथ्रानि बान गावलायनायखौबो नुनो मोन्दों। थारैनो बिसायख’थिनि खाथि नोजोराव इउपिपिएल दोलोनिफ्राय ओखारनांनाय पृथ्विराज नारायन देब मेचआ थांनाय माखासे सानफोराव इउपिपिएल दोलोनि आफादगिरि प्रमद बर’नि हेंथायै माखासे आयदाखौ लानानै नंखाय अजद खालामदोंमोन। बेखौ लानानै समबारखालि खौरागिरि मेल खुंनानै इउपिपिएल दोलोआ पृथ्विराज नारायननि हेंथायै कक्राझार पुलिस थानायाव गसर थिसन्नाय बाथ्राखौ मिबथिहोदों। गांसे रादाब बिबुंसारनि गेजेरजों इउपिपिएल दोलोनि आफादगिरि प्रमद बर’नि हेंथायै नारायन देब मेचआ माखासे अजद लाबोदोंमोन, जेराव भटार राइजो-राजाफोरखौ गावस्राहोनायनि सोलो बाहायनानै पृथ्विराज देब मेचआ प्रमद बर’नि हेंथायै बायदिसिना आयदाखौ बोखांनानै अजद खालामदोंमोन होन्नानै इउपिपिएल दोलोआ फिनजाथाय खालामो। बिटिसिनि ट्राइबेल बेल्ट आरो ब्लकआव थानाय आइन बेरेखायै हाबफैनाय सुबुंफोरखौ प्रमद बर’आ होखारगोन होन्नानै बुंथिनाय बाथ्रानि फिन्नाय होनानै बे बिथिडाव सिगाङाव पृथ्विराज नारायन देब मेचआ गावसो सार्थनि थाखाय गसर थिसन्दोंमोन होन्नानै इउपिपिएलआ अजद खालामो। इउपिपिएल दोलोआ दोलोनि आफादगिरि प्रमद बर’नि हेंथायै नंखाय अजद खालामनायनि दायाव कक्राझार पुलिस थानायाव गसर थिसन्नायनि उनाव पृथ्विराज नारायन देब मेचआ बेनि सायाव फिन्नाय होनांगोन एबा आइननि गेजेरजों मोगा-मोगि जानांगोनखौ रोखा नुहरदों।