(इम्फल, आइजल आरो कहिमासिम रेल लामा फोनांजाबसिगोन)
गुवाहाटी, 29 आगस्ट: रेलवे बिफानआ दिनै सा-सान्जा राइज्योफोरनि थाखाय मोनसे गोजोन्थाव खौरां फोसावथि होदोंदि, फैगौ 2023 माइथायसिमनि गेजेराव भारतीय रेलवेनि मान सावगारियाव सा-सान्जा भारतनि मोन 8 राइज्योफोरनि गेजेराव मोन 6 राजथावनिफोरा नुजागोन।
नर्थ-इस्ट फ्रन्टियार रेलवे आसाम, त्रिपुरा आरो अरुनाचल प्रदेशनि राजथावनिफोरखौ सिगाङावनो ट्रेन सिबिथायजों सरजाबफादों । दा मनिपुर, मिजराम आरो नागालेन्डनि राजथावनिखौबो रेलवेजों सरजाबनो थाखाय रेलवे बिफानआ बिथांखि लागासिनो। बे रेलवेजों राजथावनि सरजाबनायनि खामानिया 2023 नि मार्च दानसिमाव आबुङै मावफुंजागोन।
मख'नाय जायोदि, सा-सान्जा भारतयाव गिबि ट्रेन सिबिथाया 138 बोसोर सिगां खरसा आसामनि डिब्रुगड़ सहरनिफ्राय जागायजेन्दोंमोन। एनएफआरनि गाहाय सामलायगिरि सन्जिब रयआ दिनै फोरमायदोंदि, सा-सान्जा भारतनि मोनथाम गुबुन गेदेत सहरफोर फारियै इम्फल (मनिपुर), आइजल (मिजराम) आरो कहिमा (नागालेन्ड) खौ फोनांजाबनो थाखाय गोदान रेल लामा खालामनो थांगासिनो।
सिक्किम आरो मेघालयनि हा आरो हाजोयारि थासारिनि थाखाय माखासे जेंना गोनां हिसाबै बे राइज्योनि राजथावनिजों रेल लामा फोनांजाबनाया माखासे समफोरनि गोनांथि जानो हागौ। गोदान मुलागायारि आदब खायदाखौ बाहायनानै सा-सान्जानि मोनथाम राजथावनिफोरजों रेल सिबिथायखौ फोनांजाबनाय जागोन होन्नानै सन्जिब रयआ फोरमायबावदों।
