• Home
  • /
  • National
  • /
  • हादरआव करना आनलक-4 नि थाखाय गाइडलाइन फोसावबाय

August 30, 2020

हादरआव करना आनलक-4 नि थाखाय गाइडलाइन फोसावबाय

(30 सेप्तेम्बरसिम स्कुल, कलेज आरो गुबुन फसंथानआबो बन्द थागोनः सरकार)

गोदान दिल्ली, 29 आगस्ट: मुलुगनि गुबुन गुबुन हादरफोरजों लोगोसे दासान्दि भारतआवबो कभिड-19 महामारिनि गोसारनायआ गिथावनायै सोलिगासिनो दङ। हादरनि गेजेराव कभिड-19 महामारिजों सुबुंफोरनि सन्देरजानाय एबा भुगिनांनाय थासारिखौ नोजोर होनानै मिरु सरकारनि नख'र बिफानआ दिनै आनलक-4 नि थाखाय गाइडलाइन फोसावबाय। नख'र बिफानआ फोसावनाय गोदान गाइडलाइन बादिब्ला, फैगौ 30 सेप्तेम्बरसिम स्कुल, कलेज, गुबुन फसंथानफोराबो बन्द थागोन।

नख'र बिफानआ बुडोदि, हादरनि सिङाव थानाय राइज्यो आरो मिरु खंथाय प्रदेशफोराव 50 जौखोन्दोसिम अनलाइननि गेजेरजों फोरोंथाय होनाय, गुबुन फोरोंगिरि नङै कर्मसारि आरो टेलि काउन्सेलिंनि थाखाय बिसोरखौ स्कुलआव लिंहरनो हागौ। बेजों लोगोसे कन्टेनमेन्ट जननिफ्राय बाइजोआव थानाय 9 निफ्राय 12 थाखोसिमनि फरायसाफोरा गावनि नख'रनि गनायथिनि उनाव फोरोंगिरिफोरनिफ्राय फोरोंथाय लानो फरायसालिआव थांनो हागोन। नख'र बिफानआ आनलक-4 नि थाखाय दिनै फोसावनाय गाइडलाइनआव रायखांनाय दडदि, फैगौ दाननि 21 सेप्तेम्बरनिफ्राय 100 सुबुंफोरनिख्रुबो बांसिन सिमा खानानै होनायजों लोगोसे सामाजिक, राजखान्थि, धोरोमारि हाबाफारिआव बाहागो लानो गनायथि होनाय जाबाय।

बेनि अनगायैबो गाइडलाइन बादियै फैगौ 7 सेप्तेम्बरनिफ्राय मेट्र खारहोनायखौबो गनायथि होनाय जादों। सरकारआ दासान्दि हादरनि सिङाव थानाय गासैबो राइज्योनि थासारिफोरखौ गोनांथार नोजोर होनानै सोलोंथाय आयदानि फार्से सिगां हाबाफारि लानाय जादों। मख'नो गोनांदि, कभिड-19 नि गोसारनाय जिन्ज्रिखौ बस'नायनि थांखिजों मोनसेनि उनाव गुबुन मोनसे फोसावनांनाय लकडाउननि जाउनाव दासिम फरायसालिफोरा बन्द जानानै थानायाव फरायसाफोरनि थाखो फोरोंथाय लानाया गोबां थालांनायजों इयुननि थाखाय जिंगासिथावना जादों।

अदेबानि फैगौ सेप्तेम्बर दाननिफ्राय हादरनि सोलोथाय फसंथानफोरखौ खुलिफिनगोननि फरायसाजों लोगोसे दिथागिरिफोराबो गोबां मिजिंथिदोंमोनब्लाबो मिरु सरकारआ दासान्दि गासै थासारिखौ नोजोर होनानै फिन फरायसालिखौ फैगौ 30 सेप्तेम्बसिम बन्द लाखिनायनि फोसावनाय जाबाय। गुबुन फार्सेथिं करना भाइरासनि जाहोनाव फोसावनाय लकडाउनआव थांनाय 22 मार्चनिफ्रायनो हादरनि गेजेराव रेल खारनाय एबा मेट्र खारनाया बन्द जानानै दङ। नाथाय आनलक-4 नि गाइडलाइन बादियै मेट्रखौ खारहोनो गनायथि होनायजों जर खायै दिल्ली एनसिआरनि सुबुंफोरा जेंनानिफ्राय एसे रेहाय मोन्नो हागोन।

Share with your friends!

Related Posts

बर’ फिसा अमब्रिका नार्जारीआ हादरारि थाखोनि एथलेटिक्स बादायलायनायाव सिल्भार मेडेल देरहादों ।

बर’ फिसा अमब्रिका नार्जारीआ हादरारि थाखोनि एथलेटिक्स बादायलायनायाव सिल्भार मेडेल देरहादों ।

न’खर न’खर हादरारि फिरफिला बिरहोनाय थांखिजों 24BN SSB नि गोलाव हान्जा सुरनाय ।

न’खर न’खर हादरारि फिरफिला बिरहोनाय थांखिजों 24BN SSB नि गोलाव हान्जा सुरनाय ।

रांखान्थि मन्थ्रिआ मैया मिरुनि बाजेटखौ थिसन्दों

रांखान्थि मन्थ्रिआ मैया मिरुनि बाजेटखौ थिसन्दों

बि टि आरनि सिङाव ओन्सोल सोसनायनि थाखाय आर’जलाइ गथायनायनि समखौ फोलावबाय

बि टि आरनि सिङाव ओन्सोल सोसनायनि थाखाय आर’जलाइ गथायनायनि समखौ फोलावबाय

Published by

Bodosa


Bodosa is a Daily Newspaper, printed in Bodo language.

Leave Your Comment Here