(खेलरत्ननिथाखाय 25 लाखरां, अर्जुनबान्थानिथाखाय 15 लाखरांहोदों : रिजिजु)
गोदान दिल्ली, 30 आगस्ट: मिरु सरकारनि गेलेमु बिफाननि आवथायाव बोसोरनि साबसिन गेलेनो हानाय गुबुन गुबुन गेलेमुनि गेलेगिरि आरो जाफुसारनाय कचफोरखौ सेलेक्सन कमिटिआ सायख'नानै मैया 29 आगस्टखालि हादतगिरि रामनाथ कबिन्दआ बार्सअल हाबाफारिनि गेजेरजों गासै गेलेगिरि आरो कचफोरनो नेसनेल स्पर्टस एवार्डखौ गथायनाय जाबाय।
हकिनि जादुगर मेजर ध्यानसन्दनि 115 थि जोनोम सानआव हादतगिरि कबिन्दआ बोसोरनि सायख'जानाय नेसनेल स्पर्टस एवार्डखौ गासै गेलेगिरिफोरनो गथायनाय जाबाय। मख'नो गोनांनि महामारि कबिङ-19नि जाहोनाव राष्ट्रपटि भवनआव बान्था रान्नाय हाबाफारिखौ बे खेबआव खुंनो हायाखैब्लाबो नाथाय हादतगिरिआ बसुअल हाबाफारिनि गेजेरजों सायख'जानाय गासै गेलेगिरिफोरनो माननि बान्थाखौ गथायनायनि बिथोन होयो। भारत सरकारनि गेलेमु बिफानआ बे बोसोराव खेल रत्न आरो अर्जुन बान्थानि राखौ बारायदेरनानै बांसिन खालामनायनि सायाव मन्धि किरेन रिजिजुआ बुङोदि, खेल रत्ननि थाखाय 25 लाख रां आरो अर्जुन बान्थानि थाखाय 15 लाख रांखौ होनाय जादों।
बेजों लोगोसे द्रनाचार्घ्य बान्थानि थाखायबो 5 लाखनि जायगायाव 15 लाख रां होनाय जादों। बान्थाखौ गाहामै गथायनो हानायनि सोमोन्दोआव गेलेमु मन्ध्रि रिजिजुआ बुङोदि, थांनाय 2008 माइथायाव दाफुनाय नेसनेल स्पर्टस एवार्डनि दाफुनाय बान्थाखौ सोलायनानै बे खेबनिफ्राय बांसिन खालामनाय जाबाय। मख'नो गोनांदि, बे सोलिफु बोसोरनि नेसनेल स्पर्टस एवार्डनि गुबुन गुबुन बान्थायाव गासै सा 60 गेलेगिरिफोरनो आरो कचफोरनो होनाय जादों।
गिबि खेब राष्ट्रपटि भवनआव बान्था रान्नाय हाबाफारिखौ करना भाइरासनि जाहोनाव खुंनो हायैजों हादतगिरिआ भिडिअ' कनफ्रेन्सिं एबा बर्सअल हाबाफारिनि गेजेरजों हादतनि गुबुन गुबुन साइ सेन्टारनिफ्राय गेलेगिरिजों फोनांजाब खालामनानै बान्थाखौ गथायनाय जादों। मख'नो गोनांदि, बे बोसोरनि खेल रत्न बान्थायाव टेबोल टेनिस गेलेगिरि मनिका बात्राजों लोगोसे क्रिकेटार रहित शर्मा, रानि रामपाल,मरियपन टेंगुयेलु, भिनेस पागट गासै सा 5 गेलेगिरिनो बान्थाखौ गथायनाय जादों। बेजों लोगोसे अर्जुन बान्थायावबो हादतनि गुबुन गुबुन जाफुंसारनाय गेलेगिरिफोरनो गथायनाय जादों।
