जरहाट, 7 सेप्तेम्बर: जरहाटआव सासे हमिअपेथिक फाहामगिरि डाक्टार राहुल बसुमतारिखौ बुथारखांनायनि 24 घन्टानि गेजेराव जरहाट पुलिसआ दिगन्त तान्ति मुंनि सासे रं मिस्ट्रिखौ खानो हायो। जाथायजों सोमोन्दो थानाय बाथ्राखौ दिगन्त तान्तिआ सिमानबो लादों। जरहाट पुलिसनि सुलुङाव फोरमायनाय बादिब्ला सन्देह खालामजाथाव रं मिस्ट्रि हाबा मावनानै जिउ खांग्रा दिगन्त तान्तिआ डाक्टार राहुल बसुमतारिखौ खास्रि-बिस्रि बुथारखांनायनि उनाव राहुल बसुमतारिनि थान्डारबार्ड बुलेट, गंसे डि एस एल आर केमेरा आरो गंसे मबाइल फनखौ लानानै जायखारलांदोंमोन। जरहाट पुलिसआ दिगन्तखौ जेरा खालामनायनि उनाव बे गासै जाथायफोरा सोराङाव फैयो। पुलिसनि सुलुङाव फोरमायनाय बादिब्ला दिगन्त तान्तिआ डाक्टार राहुल बसुमतारिजों सोमोन्दो दङमोन। बे जाथाया बयखौबो सोमो नांहोदों।
अदेबानि पुलिसनि जेरायाव दिगन्त तान्तिआ बेसेबां सैथो बाथ्राखौ सिमान लादों बेनि सायाव गोबाङानो सोमो नांनाय फोरमायदों। लिसुबारि पुलिस आउट पस्टनि आइ सि बिद्युत दत्तआ मिथिहोनाय बादिब्ला दिगन्त तान्तिजों डाक्टार राहुल बसुमतारिआ सोमोन्दो दङमोन आरो जाथाय जानाय सानखालि सानैनि गेजेराव नांलाय-खमलाय सोमजिदोंमोन आरो उनाव राहुलखौ दिगन्त तान्तिआ खास्रि-बिस्रियै जिउ फोजोबो।
गुबुन फार्से पुलिसनि सुलुङाव मिथिहोबावनाय गुबुन मोनसे रिपर्टनि बायब्लिा डाक्टार राहुल बसुमतारिआ दिगन्त तान्तिनि सायाव गाग्लोबनो नाजादोंमोन आरो गावखौ रैखाथि होनो थाखाय दिगन्त तान्तिआ डाक्टार राहुल बसुमतारिखौ बुथारदोंमोन। अन्नाय-खान्नाय गैयाजासे बुखारखांनानै खावनानै लांनाय गंसे मथर साइकेल, राहुलनि फन आरो डि एस एल आर केमेराखौ दिगन्तआ दोनखोमादोंमोनब्लाबो पुलिसनि जेरायाव सिमान लानो गोनां जायो। लिसुबारि पुलिसआ डाक्टार राहुल बसुमतारिनि स्मार्ट फननि फन कलफोरखौ ट्रेस खालामनानै दायनिगिरि दिगन्त तान्तिखौ नागिरनानै मोन्नो हादोंमोन। दुखु नांथाव बाथ्रादि, बि टि सिनि सिङाव थानाय उदालगुरि जिल्लानि हमिअपेथिक फाहामगिरि डाक्टार राहुल बसुमतारिखौ थांनाय 5 सेप्तेम्बरखालि हरनि समाव जरहाटनि चन्दन नगराव थानाय 4 नं बायलेननि गंसे भारा नआव गोबौ हाथियारजों गाग्लोबनानै दिगन्त तान्ति मुंनि दुथांआ जिउ फोजोबदोंमोन।
