अरां, 28 आगस्ट: सोलिफु बोसोरनि फैगौ सेप्तेम्बर दाननिफ्राय दुलाराय बिटिसिआव बन्द जागोन आदार आरो जगायथाय बिफानआ होनाय बाङाइ बेसेननि माइरंआ। गासै 27 दान मोन्नांगौ कमिसननिफ्राय जानगारनांनानै दुलाराय बिटिसि फेयार प्राइज श्वप एस'सिएसनआ जोबनो गैयै सानसिम माइरं रान्नानै होनाय माव बिबाननिफ्राय जानगाराव थागोननि थांखि लादों।
थांनाय 24 आगस्टनि गेजेराव बिटिसिनि सिफ सेक्रेटारिआ बिटिसि बाङाइ बेसेननि जगायथाय होग्रा एजेन्ट गौथुमनो माखासे दानसिम मोनथावना रां कमिसनखौ होजोबनायनि बाथ्रा होदोंमोन । नाथाय 24 आगस्टनि सम सिमनाया बारलांनायनि उनावबो बिटिसि बाङाइ बेसेननि माइरं जगायथाय होग्रा गौथुमआ कमिसनखौ मोन्नो हायैआव खुद्रिखांनाय फोरमायदों। गौथुमआ अजद खालामनाय बादिब्ला, बिटिसिनि आदार जगायथाय बिफानआ गौथुमनो कमिसन राखौ होयाखै । गासै 27 सान मोनथावना कमिसनखौ मोनफुनो हायैआव फैगौ सेप्तेम्बर दाननिफ्राय बाङाइ बेसेननि माइरं रान्नानै होनाय माव बिबाननिफ्राय जोबनो गैयै समसिम जानगाराव थानो फोसावदों ।
बिटिसिनि जगायथाय होगा गौथुमआ थांनाय गोलाव साननिफ्रायनो गावसोरनि कमिसनखौ मोन्नायनि दाबियाव फारियै सोमावसारबोबाय थाबोदोंब्लाबो जेबो गोनांथि होयाखै बिटिसिनि जगायथाय बिफानआ।आसाम सरकारनि आदार आरो जगायथाय बिफानआ बिटिसिआव बाङाइ बेसेननि जगायथाय होगा गौथुमनि कमिसननि थाखाय गासै 16 कौटि राखौ हरदोंमोन। नाथाय दासिमबो बिटिसिनि जगायथाय बिफानआ आसाम सरकारआ हरनाय 16 कौटि राखौ दिनैसिम थाइसेबो रां होयाखै होन्नानै बिटिसिनि एजेन्ट गौथुमआ अजद खालामदों। गासै 27 दानसिम एनएसएफए-13 बिथांखिनि सिङाव माइरं जगायथायनि कमिसनखौ बिटिसिनि गौथुमआ मोनाखै । बेनि अनगायैबो दासान्दि करना महामारिनि समाव सरकारआ होनाय पिएमजिकेएवाइ बिथांखिनि कमिसनखौबो दिनैसिम मोन्नो हायाखै होन्नानै बिटिसिनि गौथुमआ मिबथिहोदों।
मख'नो गोनांदि, बिटिसिनि गेजेराव गासै 24,25,515 गोरिब थाखोनि ग्राहक एबा मुलाम्फायारिफोरा फैगौ सेप्तेम्बर दाननिफ्राय बाङाइ बेसेननि माइरंखौ मोन्नाय नंङा। जेब्लासिम 27 दाननि मोन्नांगौ कमिसनखौ मोनफुङा अब्लासिम माव बिबाननिफ्राय जानगाराव थानाया सोलिबाय थागोन होन्नानै फोसावदों गौथुमआ। बिटिसिनि गासै सा 3,901 बाङाइ बेसेननि माइरं जगायथाय होग्रा एजेन्टफोरा 27 दाननि कमिसनखौ मोन्नो हायैआव गोबां जेंनाजों भुगिनांनाय बाथ्राखौबो फोरमायदों। दासान्दि बिटिसिआव राइज्यो बेंगिरिनि खुंथायखौ जाबसिन्नायनि उनाव दुलाराय बिटिसि बाङाइ बेसेननि एजेन्ट गौथुमआ राइज्यो बेंगिरिनि खुंथायनिसिम कमिसनखौ होनो थाखाय गांसे गोसोखांलाइखौ गथायदों।
