गोदान दिल्ली, 4 सेप्तेम्बर: फावखुंगुर सुशान्त सिं राजपुत केसखौ सि बि आइआ नायबिजिर गासिनो दङ। बे जाथायाव सानफ्रोमबो गोदान बाथ्राया सोराङाव फैदों। फार्सेथिं सुशान्तनि थैनायनि उनाव बिनि सायाव सावथुन बानायनो दोहौ सोमजिखांदों। दासिमआव मोन्नै सावथुननि पस्टारआ सोराङाव फैखांबाय, जायनि मुङा जादों शशांक आरो सुसाइड या मार्डार। बे सावथुनखौ सुशान्तनि जिउजों थुलुंगाखांनाय फोरमायनाय जादों। बेनि गेजेराव सुशान्तनि बिफा के के सिंनि उकिल बिकाश सिंआ मोनसे प्रेस कनफारेन्सआव बुंदोंदि, नख'रनि गनायथि गैयालासे फाव खुंगुरनि सायाव जायखि जाया सावथुनखौ बानायनो मोन्नाय नङा।
उकिल बिकाश सिंआ फोरमायनाय बादिब्ला सुशान्त सिं राजपुतनि बिफा आरो बिब'फोरा गावसोरनि गनायथि गैयालासे सुशान्तनि सायाव जायखि जाया रोखोमनि सावथुन एबा सिरियाल बानायनो मोन्नाय नङा आरो बिजाब लिरनो मोन्नाय नङा होननानै थांखि लादों। जुदि सोरबा सुशान्तनि सायाव सावथुन बानायोब्ला गिबियाव बिनि बिफा आरो नख'रनि सुबुंफोरनो स्क्रिप्टखौ दिन्थिनांगोन। बियो बुंबावदोंदि, जुदि सोरबा बे थांखिनि हेंथायै थाडोब्ला बियो गावनि रिस्कआव खालामनांगोन। बिब्दियाव नख'रनि गनायथि गैयालासे सुशान्तनि सायाव सावथुन, सिरियाल बानायनायाव एबा बिजाब लिरनायाव बियो लीगेल एक्सननि मोगा-मोगि जालांनो हागौ।
