सुशान्त सिं राजपुतनि केसआव अन्किता लखन्डे, कंगना रनत आरो कृति सेनननि उनाव आथिखालाव

बरुण धवनआबो सिबिआइ नायबिजिरनो दाबि दैखांदों (उनाव आथिखालाव बरुण धवानआबो सिबिआइ नायबिजिरनो दाबि दैखांदों ) । गोदान दिल्ली, 14 आगस्ट: फावखुंगुर सुशान्त सिं राजपुतनि थैनाया एन्टारटेनमेन्ट मुलुगखौ मोननै हान्जायाव गावस्राहोदों । इन्डास्ट्रिनि मोनसे हान्जाया सिरि थादोंब्ला गुबुन मोनसे हान्जा एखेराहेयै सुशान्त सिं राजपुतनि थाखाय सिबिआइ नायबिजिरनो दाबि दैखांदों। फारसेथिं सनु सुडनि फेन्सफोर, खाथिनि सोमोन्दो थानाय लोगोफोर आरो नखरनि सुबुंफोरा एखेराहेयै सिबिआइ नायबिजिरनो आर'ज गाबदों। बेनि गेजेराव बलीउड फावखुंगुर बरुण धवानआ बे मामलायाव दुखु मोन्नानै गावनि बिबुंथिखौ होदों आरो सुशान्तनि थाखाय बिजिरनायखौ मोन्नो दाबि खालामनानै सिबिआइ नायबिजिरनो आर'ज गाबदों । बरुण धवानआ गावनि इनस्टाग्राम स्टरिआव #cbiforss लिरदों । बरुण धवाननि बे पस्टआ सोराङाव फैनाय लोगो-लोगोनो बिनि मुखौ टुइटाराव ट्रेन्ड खालामनो जागायदों। मख'नो गोनांदि, बरुण धवाननि सिगां मौनी रयआबो इनस्टाग्राम स्टरीनि गेजेरजों सिबिआइ नायबिजिरनो थाखाय गावनि हेफाजाबखौ होदों। फारसेथिं अन्किता लखन्डे, कंगना रनौत, अमिषा पाटेल आरो कृति सेननआबो #cbiforss लिरनानै सुशान्तनि थाखाय सिबिआइ नायबिजिरनो दाबि दैखांदों । सुशान्त सिं राजपुतनि एक्स गार्लफ्रेन्ड अन्किता लखन्डेआ मोनसे भिडिअनि गेजेरजों सिबिआइ नायबिजिरनो दाबि दैखांदों जाहाथे फावखुंगुरखौ नायबिजिरनाय मोनो। अन्किता लखन्डेखौ बे भिडिअयाव बुनाय नुनो मोन्दों, हादतआ मोनथिनो हास्थायोदि, सुशान्त सिं राजपुतनि सायाव मा जायामोन? सुशान्त सिं राजपुतनि थाखाय सिबिआइ नायबिजिरनांगौ। मख'नो गोनांदि, फावखंग्रि कृति सेननआ बावैसो समाव गावनि इनस्टाग्राम एकाउन्टआव मोनसे पस्टखौ फोसावनानै बुंदोंदि, फावखुंगुरखौ मोजां मोनग्रा सबंफोरा नंगबैखौ मोनथिनो गोनांथार। इनस्टाग्राम स्टरीआव पस्ट शेयार खालामनानै कृति सेननआ लिरदों, आं आर'ज गाबोदि, नंगुबैआ थाबैनो बयनिबो सिगाडाव फैथों। बिनि नख'रनि सुबुंफोर, बिनि लोगोफोर, आरो साफ्रोमबो बिखौ मोजां मोनग्राफोरा थारखौ मोनथिनो उसुखुथु जादों।