गवालपारा, 25 आगस्ट: गवालपारा जिल्लानि सिङाव थानाय धनुभाङानि देवशिलायाव दिनै मोनसे गिथावना गारि सौग्रावनाय जाथाया नुजाथिदों । बे जाथायाव सानै सुबुङा जायगायावनो जिउ खहा जानायजों लोगोसे माखासे सुबुंफोराबो जोखोम जादों। जाथायाव जिउ खहा जानाय सानैनि गेजेराव गुबुन सासेखौ बिजेपिनि दख'रा आफादनि दैदेनगिरि होन्नानै मिबथिनाय जादों।
बिजेपिनि दख'रा दैदैनगिरि बिजु पखरेल शर्माजों लोगोसे बे जाथायाव दालिम कलिता मुनि सुबुङाबो जिउ खहा जायो आरो बिसोर सानैनि न'खौ गवालपारानि सिमलितलायाव होन्नानै मिबथिनाय जादों । गवालपारा जिल्लायाव थांनाय 24 घन्टानि गेजेराव गुबुन मोनसे नुजाथिबावनाय जाथायाव सानै फरायसाफोरा गारिजों सौजानानै जिउ खहा जादों।
मिबथिनाय बादिब्ला, गवालपारानिफ्राय बक' फार्से गोख्रै थांबाय थानाय एएस 01 डिएफ 3861 नम्बरनि सुइफ्ट डिजायार आरो एएस 01 एइससि 9000 नम्बरनि बासजों मोगा-मोगि सौग्रावलायनाय जाथाया जोबोद गिथावनायै नुजाथिदों होन्नानै जायगानि सुलुङा फोरमायदों । बे जाथायाव जोखोम मोन्नाय माखासे सुबुंफोरखौ रंजुली देहा फाहामसालिआव थिसन्नाय जायो आरो बेनि उनाव गुवाहाटीसिम फाहामथाय होनो लांनो नाजानाय समावनो सुबुङा जिउ खहा जायो।
