गोदान दिल्ली, 28 आगस्टः हादतनि बेडमेन्ट गेलेगिरि सात्विक साइराज रेंकि रेड्डिखौ लाफानानै बे बोसोरनि हादतयारि गेलेमु बान्था देरहानो हानाय सा 3 गेलेगिरिफोरनि देहायाव करना पजिटिभ मोन्नाय जादों। बे हिसाबै बिसोर सा 3 गेलेगिरिफोरा फैगौ 29 आगस्ट एबा गाबोन जानो गोनां अनलाइन बान्था रान्नाय हाबाफारियाव बाहागो लानो मोन्नाय नंला।
बान्था रान्नायनि जारिमिनाव गिबि खेब करना भाइरासनि जाहोनाव हादतयारि गेलेमु बान्था रान्नाय हाबाफारिखौ अनलाइननि गेजेरजों खुंनाय जागोन। गेलेमु बिफानआ थांनाय सानखालि बुंदोंमोनदि, हाजतयारि गेलेमु बान्था देरहानो हानाय सा 74 गेलेगिरिफोरनि गेजेराव सा 65 गेलेगिरिफोरा अनलाइननि गेजेरजों बान्था रान्नाय हाबाफारियाव बाहागो लागोन। बे बोसोराव मोन 7 थाखोयाव गासै 74 बान्था होनाय जागोन । बे हाबाफारियाव सा 65 गेलेगिरिफोरा बाहागो लागोन आरो गुबुन सा 9 बान्था देरहागिरिफोरा गावबा-गावनि माखासे जाहोनफोरनि थाखाय बाहागो लानो हानाय नङा।
बिसोरनि गेजेराव सोरबाया हम क्वारेन्टाइनयाव दं आरो सोरबाया करना पजिटिभ जानानै दं। बेराफारसे माखासे बान्थानि थाखाय सायख'जानायफोरा भारतनि बायजोयाव दंहैयो। बेबायदिनो सा 3 बान्था देरहागिरिफोरा करना सन्देरजानायनि जाहोनाव बान्था रान्नाय हाबाफारियाव बाहागो लानाय नङा । बान्था रान्नाय हाबाफारिनि गासै जायगाखौनो सेनिटाइस खालामनाय जादों आरो समाजयारि जान्थायनि नेमखान्थिखौ फालिनायनि गेजेरजों बे बान्था रान्नाय हाबाफारिखौ बान्जायनो थांखि लादों।
