गुवाहाटी, 27 आगस्ट: आथिखालाव खौरां बिजोङा साफ्रोमबो सुबुं माहारिनि सानफ्रामबोनि थाखाय एंगार हायै मोनसे गोनांथार बिजों जाबोनो हमदों। बबेखानि सोलिफु गिख्रंथाव कभिड-19 नि साग्लोबनाय समनि गेजेरावबो खौरां बिजोङा सुबुंफोरनि एबा समाजनि थाखाय गोख्रों बिफाव लादों। गाव गावनि जिउखौ बावथ'नानैब्लाबो खौरांगिरिफोरा देहा बिफाननि मावथिफोर आरो रैखाथि सान्थ्रिफोरजों लोगोसे समानै खामानि मावफादों होन्नानै बुंनो हायो।
बे गिख्रंथाव थासारिनि समावबो गाव गावनि जिउखौ दोनथ'नानै खौरां बिजोंनि फोथाराव खामानि मावसोमनाय दावहारुफोरखौ दिनै जार्नालिस्ट एससियेसन अफ आसाम सुंदयै जेएएआ गुवाहाटी प्रेस क्लाबआव मोनसे हाबाफारि खुंनायनि गेजेरजों मान बाउदों। जेएएनि आफादगिरि दिएन चक्रबर्तिनि आफादगिरि मासि सामलायनानै दैदेन्नाय दिनैनि बे हाबाफारियाव मोनसे गेवलां मेलबो खुंनाय जायो।
बे हाबाफारियाव जेएएनि गाहाय नेहाथारि दालिम फुकनआ मेलनि थांखिखौ बेखेवनाय समाव बुङोदि, इन्टारनेसनेल फेडारेसन अफ जार्नालिस्टनि सुबुरुन बायदियै नेसनेल इउनियन अफ जार्नालिस्ट इन्डियाआ सा 20 गागि खौरांगिरिफोरखौ लाफानानै गासै आसामनि सा 30 सुबुंफोरखौ कभिड-19 नि दावहारु बान्थानि थाखाय सायख'दों।
मख'जाथाव खौरांगिरि ङ अलक मेहतानि दैदेन्नाय एनइउजेआइ सायख' आफादया गिबि खोलोबाव आसामनि बिसोर सा 30 खौरांगिरिफोरखौ दावहारु हिसाबै सायख'दों होन्ना गाहाय नेहाथारि दालिम फुकनआ फोरमायो। बे हाबाफारियावनो एनइउजे इन्डियानि लेङाइ आफादगिरि भुपेन गस्वामीआ गावनि बिबुंथियाव बुङोदि, कभिड-19 गोसारनायनि उनाव भारतनि खौरां बिजोङाव जर'खायै प्रिन्ट मिडिया सेक्टराव गोबांथार जेंनाजों मोगा-मोगि जानो गोनां जादों।
करना भाइरास साग्लोबनायनि थाखाय हादतनां लकडाउन फोसावनाय हिसाबै हादतनि गोबां खौरां बिलाइफोरनि दिहुन्थाय एबा रानसारनाया बन्द जानाय हिसाबै खौरां बिलाइनि खौरां बिजोङव खामानि मावग्रा गोबां मावफारिया आरो खौरांगिरिफोरा गावबा गावनि जिउ खुलांनाय बेलायाव गोबांथार जेंनाजों मोगा-मोगि जानो गोनां जादों। लोगोसे करना भाइरासजों साग्लोबजानानै हादतयाव माखासे खौरांगिरिफोराबो रुंसारि जादों।
बे हिसाबै जिउ खहा जानाय खौरांगिरिफोरनि नख'रनि सोद्रोमाफोरा जिउ खुंनाय बेलायाव खैफोदजों मोगा-मोगि जानांदों। बेनिखायनो मिरु सरकार आरो राइज्यो सरकारफोरा खौरांगिरिफोर आरो खौरां बिलाइ नख'रफोरनो हेफाजाब होनो थाखाय सिगांबोनांगौ होन्नानै भुपेन गस्वामीआ खावलायो।
