ढेकियाजुलि, 1 अक्टबर : सनितपुर जिल्ला दुलाराय बर' फरायसा आफादनि बेन्दोंयाव थानाय थेलामारा दखरानि सिलिखाबारि गेजेर आरो गोजौ फरायसालिनि रंजा मन्सआव ढेकियाजुलि, सोनाब तेजपुर आरो थेलामारा मोनथाम दखराजों जथायै गोदान कमिसननि सोद्रोमा महरै सायख'जानाय दालिम बायन आरो जयन्त बसुमतारिखौ गाजा-गोमजायै बरायनाय जायो।
बे बरायनाय हाबाफारियाव आलासि महरै बाहागो लानानै मिरु दुलाराय बर' फरायसा आफादनि लेङाइ आफादगिरि एबा बिटिआर गोरोबथा कमिसननि सोद्रोमा जयन्त बसुमतारिआ बुङोदि, सोलिफु बोसोरनि 27 जानुवारिखालि भारत सरकार आरो आसाम सरकारजों जानाय बिटिआर गोरोबथा बादियै कमिसन दाफुंनाय जादों आरो बे कमिसनआव मोनथाम बिबान होनाय जादों। जेराव बर' बांसिन थानाय गामि जानांगोन एबा ट्राइबेल मेजरिटि जानांगोन। माखासे बर' आफादफोरा दाबिनाय बादि दासान्दि मोनब्रै जिल्लायाव गामि सोसन्नाय आरो गामि दानख'नायजों लोगोसे मोनब्रै जिल्लानि बाइजोयाव थानाय बिटिआरआव हाबनो नागिरनाय माखासे गामिफोराबो थिसनजागोन।
