• Home
  • /
  • Regional
  • /
  • श्बयम बिथांखिनि सिङाव राइज्योनि सा 2 लाख लाइमोनफोरनो राइज्यो सरकारआ 50 रोजा रां होगोनः हिमन्त

September 5, 2020

श्बयम बिथांखिनि सिङाव राइज्योनि सा 2 लाख लाइमोनफोरनो राइज्यो सरकारआ 50 रोजा रां होगोनः हिमन्त

गुवाहाटी, 5 सेप्तेम्बर: 2017-2018 माइथायनि बाजेटआव फोसावनाय जादोंमोन स्वामी बिबेकानन्द आसाम इयुथ इम्पावारमेन्ट यजना सुंद'यै श्बयमखौ । बे बिथांखिखौ फिन फोथांफिन्नो सरकारआ बे समाव गोनांथार राहा लादों । जायनि थाखाय बे बिथांखिनि मुडाव आसाम सरकारआ गासै 1000 कौटि रां बाहायगोन । बे बिथांखिनि सिङाव राइज्योनि सा 2 लाख सेंग्रा-सिख्ला लाइमोनफोरनो नोगोद 50 रोजा रां होनायनि हाबाफारि लादों। आसाम सरकारनि रांखान्थि बिफाननि मन्थ्रि हिमन्त बिश्व शर्माया 5 सेप्तेम्बरखालि फोसावनाय बादिब्ला, श्बयम बिथांखिनि सिङाव राइज्योनि 2 लाख लाइमोनफोरनो 50 रोजा रां होनो थाखाय आजावना लादों।

बे बिथांखिखौ गाहामै मावफुंनायनि सिगां सरकारआ राहा लानाय बादियै माखासे खान्थिफोरा फारियै 2020 नि 1 सेप्तेम्बरनि सिगाडावनो हान्जाफोर दाफुंना लानांगोन । बे हान्जायाव सा 20 निबो बांसिन आरो साबानिख्रुइ खम सोद्रोमा जानो मोन्नाय नङा । बेनि उनाव आर'जलाइ गथायनाय हान्जानि सोद्रोमाफोरा आसामनि अरायथा थागिबि जानांगोन । सोद्रोमाफोरनि बैसोआ सोलिफु 2020 नि 1 सेप्तेम्बरनि गेजेराव 18 बोसोरनि गाहायाव आरो 40 बोसोरनि गोजौआव जानो मोन्नाय नङा। आर'जलाइ गथायग्रा हान्जानि माहारियारि फालांगि आरो कअपारेटिभ बेंकआव एकाउन्ट थानांगोन आरो एकाउन्टनि फारिलाइयाव हान्जानि मुं थानांगोन। हान्जानि साफ्रोमबो सोद्रोमाफोरा मेट्रिक उथ्रिसारनाय जानांगोन। हान्जानि सोद्रोमाफोरा गावयारि बेंकजों लेन-देन एबा लन लानाय जानो मोन्नाय नङा।

फैगौ 16 सेप्तेम्बरआव बेनि थाखाय मोनसे पर्टेल खुलिगोन राइज्यो सरकारआ। पर्टेलनि गेजेरजों आरजलाइखौ हान्जानि सोद्रोमाफोरा आबुडै मिबथिहोनो हागोन । बेजों लोगोसे जिल्लाफोराव मोनफा मोनफा कमिटि थागोन । कमिटिआव राजखान्थिजों लोब्बा थानाय सुबुंफोरा खाबु मोन्नाय नडा। बे बिथांखिखौ रांखान्थि बिफानआ गाहायै सामलायगोन। आर'जलाइ गथायनायनि उनाव सेंग्रा-सिख्ला लाइमोनफोरखौ सानथामनि थाखाय फोरोंथाय होनाय जागोन । कारखाना फसंनायजों लोगोसे गुबुन बिफानआवबो थिका महरै खामानि मावनो हागोन । गिबि खोन्दोआव 30 रोजा रां, नैथि खोन्दोआव 20 रोजा रांखौ एकाउन्टआव सोहरनाय जागोन।बे बिथांखिया बोसोरफ्रोमबो सोलिबाय थागोन। उदांश्रिनि उनाव आसामआव बे बिथांखिआ लाइमोनफोरखौ फसंथानायनि गिदिर राहा आरो खाबु होनाय जागोन । 

Himanta

मख'नो गोनांदि, श्बयम बिथांखिनि सिडाव बे जर'खा खाबुखौ फैगौ दान मोनथामनि थाखाय होनायनि राहा लादों । बे बिथांखिनि सिङाव सेल्फ-हेल्प ग्रुप आरो आबादारि हान्जानि एकाउन्टआवबो धोन हाबहैगोन। मिबथिनो गोनांदि, उननि समाव बेफोर रांखौ सरकारनो लाइमोनफोरा होनांनाय नङा।

 फार्सेथिं आसाम साहा बागान धोन बान्था बिथांखि बादियैब्ला साहा बागाननि गासै 8 लाख सुबुंफोरनि एकाउन्टआवबो 3 रोजा रां होनायनि सरकारआ राहा लादों। फैगौ 20 सेप्तेम्बरनि गेजेराव गोदानै हाबाफारि लानो गोनां बे बिथांखिनि गेजेरजों सरकारआ फैगौ 7-8 अक्टबरनि गेजेराव रांफोरखौ एकाउन्टआव हरनाय जागोन। मन्थ्रि हिमन्त बिश्व शर्माया फोसावनाय बादिब्ला, थांनाय 2017-18 माइथायाव गासै 6 लाख 36 रोजा 411 साहा बागाननि श्रमिकफोरा बेंक एकाउन्ट खुलिनानै लादोंमोन आरो बेफोर एकाउन्टआव बिसोरनो 2 रोजानिबो बांसिन राखौ सरकारआ होनाय जायो। बेनि उनाव 2018-19 माइथायाव आरोबाव बे बिथांखिखौ आजावनानै लायो। बे बोसोराव साहा बागाननि श्रमिकफोरा गासै 7 लाख 15 रोजा 979 बेंक एकाउन्ट खुलिदों। बेफोर एकाउन्टआव फिन 2 रोजानिबो बांसिन राखौ होनायनि सरकारआ राहा लायो। बेनि उनाव सोलिफु 2020-21 माइथायाव बेफोर बेंक एकाउन्टआव सरकारआ 3 रोजा राङै होनायनि थांखि लानायखौ  फोसावनानै होबाय। सरकारआ बे बिथांखिनि थाखाय 250 कौटि रां बाहायनो थांखि लादों।

Share with your friends!

Related Posts

आसामाव जेब्लासिम BJP सोरखार थागोन अब्लासिम फिसा फिसा हारि हारिसाफोरनि मोन्थायफोरा जोबस्रांलांगोन : कास्तम बसुमतारि

आसामाव जेब्लासिम BJP सोरखार थागोन अब्लासिम फिसा फिसा हारि हारिसाफोरनि मोन्थायफोरा जोबस्रांलांगोन : कास्तम बसुमतारि

संका बानदो, जामफैनि दैखौ बानदो थेनानै दै दिखांनो हायैजों जिंगा सिनांदों माखासे आबादारिफोरा

संका बानदो, जामफैनि दैखौ बानदो थेनानै दै दिखांनो हायैजों जिंगा सिनांदों माखासे आबादारिफोरा

11 मेनिफ्राय मेट्रिक आन्जादखौ खुंनो फोसावबाय

11 मेनिफ्राय मेट्रिक आन्जादखौ खुंनो फोसावबाय

तिवा गावखुंथाय गौथमनि गाहाय मावफुंगिरि महरै जिबन चन्द्र कुवँरआ समायखिरा लाबाय

तिवा गावखुंथाय गौथमनि गाहाय मावफुंगिरि महरै जिबन चन्द्र कुवँरआ समायखिरा लाबाय

Published by

Bodosa


Bodosa is a Daily Newspaper, printed in Bodo language.

Leave Your Comment Here