• Home
  • /
  • Sports
  • /
  • लियनेल मेसिया गोरलैयै बार्सिलनानिफ्राय ओखारनो हानाय नङा

August 28, 2020

लियनेल मेसिया गोरलैयै बार्सिलनानिफ्राय ओखारनो हानाय नङा

स्पेन, 27 आगस्ट: बार्सिलनानि जाफुंसारनाय फुटबल गेलेगिरि लियनेल मेसिया हान्जाखौ नागारनायनि फारसे इसारा होदोंब्लाबो नाथाय गेलेगिरिया क्लाबनिफ्राय गोरलैयै ओंखारनो हानाय नङा। बार्सिलना क्लाब आरो लियनेल मेसिनि गेजेराव बे बाथ्रानि सायाव गोरोबलायनायखौ नुनो मोनाखै आरो बे जेंनाया बिजिरसालिसिम सहैनो हागौ होन्नानै सुलुङाव फोरमायदों। बार्सिलना क्लाबखौ नागारगोननि खौराङा सोराङाव फैनायनि उनावनो क्लाबनिफ्राय रोखा जादोंदि, लियनेल मेसिया क्लाबनि माखासे नेमखान्थिनि गेजेरजोंसो उदां जानो हागोन एबा ओंखारनो हागोन।

मख'नो गोनांदि, थांनाय माखासे बोसोरनिफ्राय आर्जेन्टिनानि गेदेमा फुटबलार लियनेल मेसिया बार्सिलना क्लाबखौ नागारगोननि बाथ्राफोरखौ खेंसालिया नोजोरजों बुंबोबाय थाबोदों। 6 थि खेब फुटबलनि देरसिन बान्थाखौ आजावनो हानाय लियनेल मेसिया गमामायैनो बार्सिलना क्लाबखौ नागारोब्ला बेनि सिगां आइननि गेजेरजों मोगा-मोगि जानांगोनखौ क्लाबनि बिबानगिरि सुलुङाव मिथिहोखादों। गुबुन फारसेथिं लियनेल मेसिया क्लाबखौ नागारगोननि बुंनाय बाथ्राफोरखौ नेवसिगारबोदोंब्लाबो नाथाय थांनाय समनि सेम्पियन्स लीगनि मेचखौ जेन्नायनि उनावनो मेसिनि हान्जा नागारगोन थांखिया रोखा जादों।

मेसिनि अनगायैबो बिनि नख'रनि सोद्रोमाया मैया खौरां बिजोङाव बार्सिलना क्लाबखौ नागारगोननि सायाव मिथिहोबावदों। बार्सिलनाया दासान्दि लियनेल मेसिनिफ्राया मोनसे लाइजामखौ मोन्दों आरो बे लाइजामनि गेजेरजों बार्सिलनाया थोजोङै बिजिरसालिनि हेफाजाब लानो बाथ्रा बुंथिदों । बार्सिलनाया लियनेल मेसिनिसिम बुंदोंदि, जुदि मेसिया क्लाबजों गावनि गेलेनायखौ सोलिहोबाय थानो सानोब्ला गेलेबाय थानो हागोन । नाथाय बे समाव क्लाबखौ नागारनाया बिनि थाखाय एबा मेसिनि थाखाय गोरलै जानाय नङा होन्नानै रोखा खालामना होदों।

मख'नो गोनांदि, लियनेल मेसिया बार्सिलना क्लाबजों गेलेनो थाखाय गोरोबथा बायदियै फैगौ 2021 माइथायाव बिनि गेलेनाय समा थुंगेहैगौमोन। नाथाय बेनि सिगांनो हान्जानि खेबले-खेबले जेन्नांनायनि फिथाइखौ लानानै लियनेल मेसिया फैगौ सिजननिफ्राय गोदान क्लाबजों गेलेनो थांखि लादों।

Share with your friends!

Related Posts

आसाम इयुथ अलिम्पिक 2022 आव तामुलपुरनि गेलेगिरिफोरा मोननै सना आरो मोननै रुफानि मेडेल दारहासारदों

आसाम इयुथ अलिम्पिक 2022 आव तामुलपुरनि गेलेगिरिफोरा मोननै सना आरो मोननै रुफानि मेडेल दारहासारदों

रनाल्डनि गलआ बेकार: सिरि-एआव भेरोनाया जुभेन्टासजों ड्र लाखियो, प्रिमियार लीगआव मेनसिटिआ लान्थ्रियैनो 20 थि मेच देरहादों

रनाल्डनि गलआ बेकार: सिरि-एआव भेरोनाया जुभेन्टासजों ड्र लाखियो, प्रिमियार लीगआव मेनसिटिआ लान्थ्रियैनो 20 थि मेच देरहादों

आगु वर्ल्ड सेम्पियनखौ फेजेन्नानै रेसलिंआव सना मेडेल देरहाबाय भिनेश फगातआ

आगु वर्ल्ड सेम्पियनखौ फेजेन्नानै रेसलिंआव सना मेडेल देरहाबाय भिनेश फगातआ

भारतनि हान्जाया जोबथा मेचयाव मुलुगनि नैथि हान्जा आर्जेन्टिनानि हेथायै ड्र गेलेदों

भारतनि हान्जाया जोबथा मेचयाव मुलुगनि नैथि हान्जा आर्जेन्टिनानि हेथायै ड्र गेलेदों

Published by

Bodosa


Bodosa is a Daily Newspaper, printed in Bodo language.

Leave Your Comment Here