गसाइगाव, 13 सेप्तेम्बर: गसाइगाव महकुमानि 31 नं राजा लामानि सायाव फिन आरोबाव गंसे तल गेट लुफुंनो थाखाय साखा-फारा खालामदों। गसाइगावनि तेलिपारायाव राइज्योनि बायजोनिफ्राय फैनाय मोनसे दारिमिना 31 नं राजा लामायाव गंसे तल गेट फसंनो थाखाय साखा-फारा जाबावदों। जेराव बेनि 20 कि:मिः जान्थायाव थानाय सोनाब बंग'नि आलिपुर दुवाराव बेबायदि तल गेटआ दंखायोमोन।
दुखुनांथाव बाथ्रादि, बार'बिसानिफ्राय कचुगावसिम राजा लामानि थासारिया एरैबायदि गाज्रिदि, लोमजा-साजा मानसि लानानै थांनांगौब्ला 30 मिनिटनि लामाखौ 1 घन्टानि बांसिन सम नांगौ जायो। बे लामाखौ लुफुंनो थाखाय 15 बोसोरनि सिगां मोनसे फसंथानआ राहा लादोंमोनब्लाबो मावफुङाजासे थफ्ला-थफ्लि लानानै जायखारलाङो।
अदेबानि बेनि उनाव गंसे फसंथानआ आद्रा जानानै थानाय लामाखौ फाहामनो खाबु मोन्दोंमोनब्लाबो बेबो दिनैसिम दिन्दांनानै दङ। बाथ्राखौ अजद होदों गसाइगाव महकुमानि राइजो-राजाफोरा। लामाखौ फाहामनानै होयालासै तल गेट फसंनो राहा लानायखौ खुद्रिखांना राइजो-राजाफोरा नेसनेल हाइवे अट'रिटि अफ इन्डियाखौ फाहामखांनायनि उनावसो तल गेटखौ लुफुनांगौ होन्नानै दाबि दिखांदों।
