• Home
  • /
  • National
  • /
  • लाडाखयाव फिन भारत आरो चीना सान्थिनि गेजेराव मोगा-मोगि जालायदों, चीननि 60 सान्थ्रिफोरा भारतयाव हाबफैनो नाजादों

September 9, 2020

लाडाखयाव फिन भारत आरो चीना सान्थिनि गेजेराव मोगा-मोगि जालायदों, चीननि 60 सान्थ्रिफोरा भारतयाव हाबफैनो नाजादों

गोदान दिल्ली, 9 सेप्तेम्बर: थांनाय माखासे दाननि सिगां लाडाखनि गलवान घाटीयाव भारत आरो चीन सान्थ्रिनि गेजेराव सिमा जेंनाखौ लानानै गोनों मोगा-मोगि बुलाइ-सोलाय जानायजों दरनै हादतनि सान्थ्रिफोरा जिउ ख'हा जानाय जाथायनि उनावनो लाडाखयावबो फिन दरनै हादतनि सान्थ्रिनि गेजेराव दासान्दि गोख्रों मोगा-मोगि जाफिन्नाय जाथायखौ नुनो मोन्दों।

सुलुंनि बायदिब्ला भारतनि गोख्रों सान्थ्रि थानायनि गेजेरावबो चीननि खमैबो 60 सान्थ्रिफोरा भारतनि दखलाव हाबफैनो नाजादों। चीननि सान्थ्रिआ सोलो आरो बोलोजों सिमा ओन्सोलाव थानाय भारतनि सान्थ्रिफोरखौ फासयहोनायनि थांखि लादोंमोन। नाथाय भारतनि सान्थ्रिफोराबो चीननि हेंथायै सिमा ओन्सोलाव गोख्रों गोहो-बोलोखौ दिन्थिनानै दासान्दि गोख्रों नोजोराव दं। मख'नो गोनांदि, सान्जा लाडाखनि पेंगंग झिलनि सोनाब ओन्सोलनि साखाथियाव रेजांग ला हाजो ओन्सोल दं। सुलुंनि बायदिब्ला रेजांग लानि सा फारसे चीननि खमैबो 60 सान्थ्रिफोरा भारतनि फारसे आवगायबोबाय थानायखौ नुनो मोन्दों। बेनि लोगो-लोगोनो भारतनि सान्थ्रिआ चीननि सान्थ्रिखौ दबथायनो थांखिजों गोजौ फारसे फाइरिं हगारनो गोनांबो जादों।

Ladakh

गुबुन फारसेथिं सिमा ओन्सोलाव चीननि सान्थ्रियाबो 10 निफ्राय 15 राउन्ड गोजौ फारसे गुलि गावगारदों। सुलुंनि बायदिब्ला भारतनि सान्थ्रिआ गुलि गावगारनायजों गोख्रों सांग्रांथि होनायनि उनाव चीननि सान्थ्रिआ फिन थांफिन्नो गोनां जादों। बे जाथायाव मोननै बिथिङाव जेबो जोखोम आरो ख'हा जानायनि खौरांखौ मोनाखै।

मख'नो गोनांदि, भारत आरो चीन हादतनि गेजेराव सिमा जेंनाखौ लानानै दरनै हादतनि सोमोन्दोआ गाज्रिसिन जानायाव गोबां खेब गोजोन सावरायनाय जादोंब्लाबो नाथाय बे जेंनाया दिनैसिम सुस्रां जायाखै आरो दरनै हादतआ गाव-गावनि गोहोखौ लानानै मोगा-मोगि जुजिलायनायखौ नुनो मोन्नायजों थासारिया सिमा ओन्सोलाव दासान्दि दुंहावै सोलिगासिनो दं। अदेबानि थांनाय 1975 माइथायनि उनाव एबा 45 बोसोरनि गेजेराव मुलुगनां सिमा ओन्सोलाव गिबि खेब भारत आरो चीन सान्थ्रिनि गेजेराव गुलि गावगारलायनाय जाथाया नुजाथिदों।

Share with your friends!

Related Posts

न’खर न’खर हादरारि फिरफिला बिरहोनाय थांखिजों 24BN SSB नि गोलाव हान्जा सुरनाय ।

न’खर न’खर हादरारि फिरफिला बिरहोनाय थांखिजों 24BN SSB नि गोलाव हान्जा सुरनाय ।

रांखान्थि मन्थ्रिआ मैया मिरुनि बाजेटखौ थिसन्दों

रांखान्थि मन्थ्रिआ मैया मिरुनि बाजेटखौ थिसन्दों

बि टि आरनि सिङाव ओन्सोल सोसनायनि थाखाय आर’जलाइ गथायनायनि समखौ फोलावबाय

बि टि आरनि सिङाव ओन्सोल सोसनायनि थाखाय आर’जलाइ गथायनायनि समखौ फोलावबाय

हादतनि गोबां राइज्योफोराव बार्ड फ्लुआ गिथावनायै गोसारदों

हादतनि गोबां राइज्योफोराव बार्ड फ्लुआ गिथावनायै गोसारदों

Published by

Bodosa


Bodosa is a Daily Newspaper, printed in Bodo language.

Leave Your Comment Here