दिसपुर, 26 सेप्तेम्बर: आसाम पुलिसनि लेडाइ नायसंगिरि थिसन्थायनि थाखाय खुंनाय लिरथि आन्जादनि सोंथि बिलाइआ बायजोयाव ओंखारखोमानाय जाथायखौ गोख्रों राहा लानो गिबि मन्थ्रि सर्बानन्द सनवालआ बिथोन होनाय बायदियै दासान्दि संदान्नाय खामानिया सोलिगासिनो दं। लाइमोनफोरनि इयुनखौ खैफोदनि लामाजों लांनाय जायखि जाया खामानिखौनो राइज्यो सरकारा माब्लाबाबो रेहाय होनाय नङा होन्नानै गिबि मन्थ्रि सर्बानन्द सनवालआ लोगोसेयै बुङोदि, बे जाथायजों लोब्बा थानाय साफ्रोमबो सुबुंफोरानो बारग'नाय नङा। फैगौ दानसेनि गेजेरावनो बे आन्जादखौ खुंफिन्नो थाखाय बिथोन होदों गिबि मन्थ्रिआ। शुक्रबारखालि आसाम एडमिनिस्ट्रेटिभ कलेजाव खौरांगिरिफोरजों जानाय मोनसे मोगा-मोगियाव गिबि मन्थ्रि सर्बानन्द सनवालआ लोगोसेयै बुङोदि, गेनाखान्थि उदां आसाम खालामनायनि थाखाय राइज्यो सरकारा सुबुंफोरनो बाथ्रा होदोंमोन।
बे बाथ्रा बायदियैनो राइज्यो सरकारा गेना खान्थि उदां आसाम खालामनायनि राहा लानानै गुबुन गुबुन बिथिङाव हाबाफारि लानाय जादों । नाथाय बेनि गेजेरावनो थांनाय समनि लेङाइ पुलिस नायदिंगिरि थिसन्थायनि थाखाय खुंनाय लिरथि आन्जादनि सोंथि बिलाइआ बायजोयाव ओंखारनाय जाथायखौ गोख्रों रावजों सोंखारिनानै गिबि मन्थ्रिआ बे जाथायाव लोब्बा थानाय एबा सोंथि बिलाइ बायनो थांग्रा साफ्रोम सुबुंफोराबो दायनिगिरि। बे बिथिङाव सरकारा जेबो रेहाय होनाय नङा होन्नानै गोख्रों बाथ्राखौ गिबि मन्थ्रिआ मिथिहोदों। राइज्यो सरकारा जागायजेन्नायनिफ्रायनो मोनफ्रोमबो आन्जादखौ गेबेङै खुंबोना बिजाथिफोर थिसनबोदों। एपिएससि आरो गुबुन गुबुन बिफानआव आथिखालनि राइज्यो सरकारा थांनाय समफोराव रोंगौथि गोनां फरायसा एबा बिजाथिफोरखौ साख्रियाव थिसन्नो हादों । इयुनावबो बेबायदि गोखों राहाजों गेबेङै साख्रियाव थिसन्थाय माव बिबानखौ सोलिहोलांबाय थागोन होन्नानै गिबि मन्थ्रिआ बाथ्रा होयो।
