मुम्बाइ, 16 सेप्तेम्बर: फावखुंगुर सुशान्त सिं राजपुत केसयाव ड्राग्स एंगलनि नायबिजिरबाय थानाय एनसिबिआ केसखौ गोथौसिम लांनो थाखाय लान्थ्रियैनो खना-खनला सिग्रोमदों। बे केसआ बलिउडजों सोमोन्दो गोनां माखासे सुबुंफोरनि मुङाबो सोराङाव फैदों। एनसिबिनि मावसुमाफोरा बुंनाय बायदिब्ला, एनडिपिएस एक्टआव दासिमआव ग्रेप्तार खालामजानाय रिया चक्रबर्तीजों लोगोसे सा 16 सुबुंफोरनाव सोंथि सोनायाव फावखुंग्रि सारा आली खान, रकुल प्रीत सिं आरो डिजाइनार सिमन खन्बादानि मुंखौ लादों, नाथाय बिसोरनि मुङा दासिमबो रोखा जायाखै आरो बिसोरनि गेजेराव रावनोबो सोंथि सोंनो थाखाय समन दैथाय हराखै।
सुशान्तजों सोमोन्दो गोनां ड्राग्स केसआ बिनि आइजो लोगो रिया चक्रबर्ती आरो बिनि फंबाय शौमिक चक्रबर्तीजों लोगोसे गासै सा 6 सुबुंफोरा 22 सेप्तेम्बरसिम आयेनारि बेंखनथायाव थागोन। बेनि गेजेराव एनसिबिआ समबारआव रिया चक्रबर्तीनि फंबाय शौमिकनि स्कुल समनि सासे लोगो सुर्यदीप मल्हत्राखौ सोंथि सोंनो थाखाय जिम्मायाव लादों। बेनि अनगायै रिया चक्रबर्तीनि बिमा सन्ध्यानि फनखौबो जब्द खालामदों। एजेन्सिआ ड्राग्स बायनो थाखाय बिनि फनजोंबो कल एबा मेसेज खालामदोंमोन ना खालामखैमोन बेखौबो रोखा जागोन।
फार्सेथिं रिया चक्रबर्तीनि जामिननि अजदलाइआव गावनि बिथोन होनायाव गाहाय आदालतआ बुंदोंमोनदि, नायबिजिरनाया जागाय जेन्नाय खोलोबाव दङ, बेनिखायनो मोन्नाय रेकर्डनि सायाव बिथा खालामनानै बेखौ बुंनो हायादि दायनिगिरि (रिया) खौ केसजों सरजाबनायनि थाखाय जेबो गुदि बिथा गैया। गाहाय जाज जीबि गुराबआ शुक्रबारआव रिया, शौबिक आरो गुबुन साब्रै दायनिगिरिफोरनि जामिननि आरजलाइखौ नेवसिदोंमोन। नाथाय आदालटआ बिथोनखौ समबारावसो फोसावदों।
