भबानिपुर, 14 सेप्तेम्बर: अन्जलि दैमारिया बिपिएफनि आखाइयाव फानजाबाय। बिपिएफआ गावसोर हायैनि अन्जलि दैमारिखौ बायदों। बे बाथ्राखौ बुंदों इउपिपिएलनि दैदेनगिरि रन्जित बसुमतारिआ। बागसा जिल्लानि सालबारि महकुमानि साखाथियाव रबिबारखालि खुंनाय इउपिपिएलनि मोनसे फोसावदिंनाय मेलाव बाहागो लानानै इउपिपिएलनि दैदेनगिरि रन्जित बसुमतारिआ। लोगोसे इउपिपिएल हान्जाया खुंथायाव फैनायनि उनावनो बिटिसियाव थानाय गुबुन गुबुन हारि-हारिसानि थाखाय मोन 23 जौगाखां गौथुम दाफुंनायजों लोगोसे थांनाय 17 बोसोराव बिपिएफआ मावफुंनो हायै खामानिफोरखौ 5 बोसोरनि गेजेरावनो इउपिपिएल हान्जाया मावफुंनानै दिन्थिगोन होन्नानै बुङो। सरकार दाफुंनायनि उनावनो गुबुन गुबुन हारि-हारिसाजों लोगोसे बिदा-फंबाय सानलायनाय, गोजोन खौसेथिनि सार्थयाव दाफुंनो लानाय जौगाखां गौथुमनि गेजेरजों मोनफ्रोम हारिनि गेजेराव गाव-गावनि राव हारिमुखौ फोथांनानै लाखिनायाव मदत मोन्नो हागोन होन्नानै गावनि बिबंथियाव फोरमायो।
इउपिपिएल हान्जानि दैदेनगिरि सत्यजित बर' दैदेन्नाय मेलाव इउपिपिएलनि आइजो मर्सानि गाहाय नेहाथारि बिउति बसुमतारिया बिपिएफ हान्जाखौ गोखों बाथ्राजों सोंखारिनानै थांनाय 17 बोसोराव बिपिएफ सरकारा सुबुंनि थाखाय जौगाखांनि मोनसेबो खामानिखौ मावाखै होननानै बुङो। बिउति बसुमतारिया बुंबावोदि पिएमवाइ न' बिथांखि, साख्रि बायदि गुबुन गुबुन बिथांखिफोरखौ बेले-बेजे खालामनायखौ नोजोर होनानै बिटिसिनि थागिबि राइजो-राजाफोरा बे खेबाव सोलायनाय लुबैदों। जों गोजोन आरो खौसेथिखौ हास्थायनानै सोलायनाय आरो गोजोन खौसेथिया बिटिसिखौ फैगौ समाव गोखोसिन खालामगोन होन्नानै बुंथियो। प्रमद बर'नि दैदेन्नायाव इउपिपिएल हान्जाया मोनसे गोदान मिजिंजों बिटिसिखौ जौगाखांनायनि फारसे लानानै थांनो हागोन होन्नानै बिउति बसुमतारिया बुंबावो। बिटिसिनि 21 नं सालबारि परिषद बियाबनि इउपिपिएल हान्जानि बिजाथि बिनद मुसाहारिया राइजो-राजाफोरनि साफ्रोमबोनि अन्नाय आरो हेफाजाबजों लोगोसे फोथायनायखौ लाखिदों। फैगौ बिटिसि बिसायख थियाव ओन्सोलनि थागिबि राइजो-राजाफोरा सोलायनायखौ लुबैनानै इउपिपिएल हान्जानि बे मेलाव इउपिपिएल हान्जानि गुबुन गुबुन हाबाफारि लानायखौ फोथायनाय आरो थुलुंगाखांनायजों गुबुन गुबुन हान्जा, आफादनि खमैबो सा 262 सोद्रोमाफोरा इउपिपिएल हान्जायाव हाबफैयो।
