गोदान दिल्ली 4 सेप्तेम्बर: थांनाय बावैसो साननि गेजेराव गेलेलांनाय सेम्पियन्स लीगनि फाइनालाव जेननांनाय पेरिस सेन्ट जार्मान सुंदयै पि एस जि क्लाबनि सा 3 फुटबल गेलेगिरिफोरनि देहायाव करना पजिटिभ मोन्दों। फ्रान्सनि सेथि थाखोनि फुटबल क्लाबआ 2 सेप्तेम्बरखिल बे बाथ्राखौ मिथिहोदों। पि एस जि क्लाबआ हान्जानि करना सन्देरजानाय गेलेगिरिनि मुंखौ मिथिहोयाखैब्लाबो नाथाय मोनसे सुलुङा बिसोर सा 3 गेलेगिरिफोरनि गेजेराव नेइमारआबो करना सन्देरजादों होन्नानै मिथिहोदों।
थांनाय सेम्पियन्स लीगयाव जार्माननि क्लाबजों जेन्नांनायनि उनाव हान्जाया मोनसेबो मेचखौ गेलेयाखैमोन। नाथाय सा 3 गेलेगिरिनि देहायाव टेस्ट खालामनायनि गेजेरजों पजिटिभ केसखौ मोन्नो हायो। पि एस जि क्लाबआ फैगौ सिजननि फ्रेन्स लीगयाव गेलेनायखौ फैगौ 10 सेप्तेम्बरनिफ्राय जागायजेनगोन। बेनि सिगांनो सा 3 गेलेगिरिनि देहायाव करना पजिटिभ मोन्नाया हान्जानि थाखाय जिंगासिथावना जादों। दासान्दि नेइमारजों लोगोसे सन्देरजानाय गुबुन सानै गेलेगिरिफोरनि मुंखौ एन्जेल डि मारिया आरो लियेन्द्र पेरेडसखौ देहाफाहामसालियाव थिसन्नाय जादों। सुलुंनि बायदिब्ला बिसोर सा 3 गेलेगिरिया हान्जानिफ्राय जानगारथ'नानै स्पेनआव बेरायनो थांदोंमोन होन्ना मिथिनो मोन्दों।
मख'नो गोनांदि, 4 बोसोरनि सिगां बार्सिलना क्लाबखौ नागारनायनि उनाव नेइमारआ 2017 माइथायाव गासै 19.8 कौटि डलाराव फ्रान्सनि सेथि क्लाब पि एस जिजों गेलेनो गोरोबथा जायो आरो गावनि गेलेनायखौ बे क्लाबआव नेइमारआ गोख्रों खालामनो हानायजों हान्जानि गुबुन सासे गोनां गेलेगिरि महरैबो मिथिजायो। खौरां बिजोङाव खेबलेखेबले फैदोंब्लाबो नेइमारआ फ्रान्सनि क्लाबआव थानानै करना सन्देरजानाय खौरांखौ जेबो बायजोयाव ओंखारहोयाखै। नाथाय नेमारनि देहायाव करना पजिटिभ मोन्नाया रोखा जादों । गुबुन फारसेथिं मोनसे खौराङाव ओंखारदोंदि, नेइमारआ बार्सिलना क्लाबआव लियनेल मेसिजों गेलेनो थाखाय हास्थायदों। नेइमारआ बार्सिलना क्लाबआव फैफिन्नो थाखाय पि एस जि क्लाबनि गावनि मोन्नाय धोननिफ्राय 60 रोजा पाउन्डखौ मोनफ्रोम सप्ताहयावनो होनांगोन।
