काजलगाव, 14 सेप्तेम्बर: मिरु दुलाराइ बर' फरायसा आफादआ चिरां जिल्ला एबसुनि बान्जायनायाव आरो कक्राझार जिल्लानि दैदेन्नायाव रबिबारखालि आलादा-आलादा समाव माखासे गोनांथार आयदाफोरखौ लानानै मेल जथुमो। जिल्लानि सिङाव थानाय बर' बिजोंजों लोगोसे गुबुन गुबुन बिजोंनि भेन्सार फरायसालि आरो फरायसालिमाफोरनि जेंनाखौ लानानै गोबाव समनिफ्रायनो मावबोबाय थानाय फोरोंगिरिफोरजों आलादा-आलादायै सावरायलायनाय जायो। बे हाबाफारियाव बर' बिजोंजों लोगोसे गुबुन गुबुन बिजोंनि गुदि, गेजेर, गोजौ, गोजौसिन आरो फरायसालिमाफोराव गोबाव समनिफ्रायनो मावबोबाय थानाय सा 500 निबो बांसिन फोरोंगिरिफोरा आलादा-आलदायै जथुमनाय मेलाव बाहागो लायो।
मेलाव गाहाय आलासि महरै बाहागो लायो मिरु दुलराइ बर' फरायसा आफादनि आफादगिरि दिपेन बर' आरो बोसोनगिरि खुंख्रा सर्गियारिजों लोगोसे मिरु आफादनि गोबां दैदेनगिरिफोराबो बाहागो लायो। मख'नो गोनांदि, थांनाय 2017 माइथायाव सोलोंथाय दाफामनाय आइननि गेजेरजों बे दरनै जिल्लानिफ्राय गोबां फरायसालि आरो फरायसालिमाफोरा सरकारि जानायनिफ्राय जानगाराव थानांदोंमोन।
बे गोनांथार सावरायलायनाय मेलाव बाहागो लानाय फोरोंगिरिफोरा बुङोदि, भारत संबिजिरनि 8 थि सिडिउल्डआव गोग्लैनाय बिटिसि सरकारा बेफोर जेंनाफोरखौ सुस्रांनो हायोब्लाबो नाथाय बिपिएफ सरकारा थांनाय 17 बोसोराव आसाम बिधान सभायाव सा 12 एमएलएफोर आरो साथाम केबिनेट मन्ध्रि थासेयावबो मावफुंनानै होनो हायैखौ खुद्रिखांनाय फोरमायो। सोलिफु बोसोरनि थांनाय 27 जानुवारीखालि जालांनाय बिटिआर गोरोबथानि 6.3 नं दफायाव मख'नाय बायदियै फैगौ समाव गुदि, गेजेर, गोजौ, गोजौसिन आरो फरायसालिमाफोरखौ सरकारि खालामनो हागोनखौ मिजिंथिनानै एबसुआ बेबायदि हाबाफारि लानायखौ बाहागो लाफैनाय फोरोंगिरिफोरा गोजोन्नाय फोरमायनायजों लोगोसे एबसुनो साबायख'र जासियो।
