बासुगाव, 22 आगस्टः थांनाय बावैसो भारत सरकारनि सोलोंथाय आरो थुनलाइ बिफाननि गेजेरजों होनाय माहारियारि साबसिन फोरोंगिरि बान्था-2020 खौ आजावनो हादों चिरां जिल्लानि बासुगाव सहरनि थागिबि आरो कक्राझार सरकारि जौसिन फरायसालिनि फोरोंगिरि गौतम देब शर्माआ।
माहारियारि साबसिन फोरोंगिरि बान्थानि थाखाय दुलाराय हादतनि मोन 36 राइज्यो आरो मोन 7 मिरु खुंथाय ओनसोलनिफ्राय गासै सा 153 फोरोंगिरिफोरा अनलाइननि गेजेरजों बाहागो लादोंमोन। बिसोर फोरोंगिरिफोरनि गेजेराव सा 47 फोरोंगिरिफोरा बे माननि बान्थाखौ आजावनो हायो। अदेबानि आसाम राइज्योनिफ्राय सासेल' गौतम देब सर्माआ भारत सरकारनि सोलोंथाय आरो थुनलाइ बिफाननि गेजेरजों माहारियारि साबसिन फोरोंगिरि बान्थाखौ आजावनो हानाया आसाम आरो बिटिएडि ओनसोलखौ गोग्गाथाव आरो रंजाथाव खालामनो हादों।
बे माननि हादतयारि बान्थाखौ आजावनो हानाय साबसिन फोरोंगिरि गौतम देब शर्मानि बे जाफुसारनायाव जोनोम जायगा बासुगाव सहरनि थागिबि सोद्रोमाफोरजों लोगोसे मावबिबानाव थानाय कक्राझार सरकारि जौसिन फरायसालिनि गाहाय फोरोंगिरि, फोरोंगिरि-फोरोंगिरिजोफोरनि गेजेराव मोनसे गोजोन्नाय आरो रंजानायनि खुसि जानाय थासारिखौ नुनो मोन्दों।
बासुगाव सहरनि ब्रै नं. बार्डनि आजिरा मोन्नाय फोरोंगिरि जतिन्द्र शर्मा आरो थरुलता सानि नैथि फिसाज्ला गौतम देब शर्माया गुवाहाटी कटन कलेजनिफ्राय बिगियान आयदाआव उथ्रिसारनानै थांनाय 2006 माइथायनि 4 फेब्रुवारिनिफ्राय कक्राझार सरकारि जौसिन फरायसालिआव फोरोंगिरि महरै साख्रि मावगासिनो दं।
