• Home
  • /
  • Sports
  • /
  • माराडनानि हरखाब रुंसारि जानायाव केरेला सरकारआ सान्नैनि थाखाय दुखु फोरमायनो फोसावदों

November 27, 2020

माराडनानि हरखाब रुंसारि जानायाव केरेला सरकारआ सान्नैनि थाखाय दुखु फोरमायनो फोसावदों

केरेला, 27 नभेम्बरः मुलुगनां फुटबलनि फोथाराव मोनसे समाव जादुगर महरै मिथिसारजानाय डियेग माराडनाआ 25 नभेम्बरखालि हरखाब रुंसारि जानाय लोगो-लोगो दुलाराय मुलुगनि गेजेरावनो फुटबल अन्सायारिफोरनि थाखाय दुखुनि बुब्लिया साग्लोबदों। आर्जेन्टिनानि गेदेमा फटबलार माराडनाआ हादतनि फटबल हान्जाखौ 1986 माइथायाव वार्ल्ड काप देरहाहोनो हानायाव जाफुंसारदोंमोन। बेनि अनगायैबो गुबुन गुबुन क्लाबजों गेलेनानै माराडनाआ गावनि रोंगौथि फुटबल गेलेनायनि गेजेरजों मुलुगनि फटबल अन्सायारिजों लोगोसे गेलेगिरिफोरखौबो थुलुंगाखांहोनो हादोंमोन। मुलुगनि गेजेरावनो मुं आरजिनो हानाय माराडनाआ हरखाब रुंसारि जानायाव गुबुन गुबुन हादतनिफ्राय दुखु फोरमायनायजों लोगोसे भारतनिफ्रायबो बारग' फुटबलारनि रुंसारि जानायखौ दुखु फोरमायदों। बेनि गेजेरावनो हादतनि सिङाव थानाय केरेला राइज्यो सरकारआ फुटबलनि जादुगर माराडनानि रुंसारि जानायाव सान्नैनि थाखाय दुखु सान फालिनो फोसावदों ।

Diego Armando Maradona passes away

केरेलानि गिबि मन्थ्रि पिलाराजी बिजयनआ बुङोदि, आर्जेन्टिनानि उनावनो माराडनानि अन्सायजानाया केरेलायाव बांसिन जादों। मानोना वर्ल्ड कापनि समाव माराडनानि पस्टारजों केरेलाखौ सिनायथि होदों। केरेलानि गिबि मन्थ्रिआ माराडनानि रुंसारि जानायखौ गावयारि फार्सेनिफ्राय गोथौ दुखु मोन्नाय फोरमायो। लोगोसे बिथांनि गोजोन जिउमानि थाखाय इसोरनि खाथियाव आर'ज खालामनायखौ गिबि मन्थ्रिआ सुलुंनि गेजेरजों फोरमायदों। मख'नो गोनांदि, फुटबल फोथाराव जादुगर आरो फुटबलनि राजा महरै मिथिसारजानाय डियेग माराडनाआ थांनाय माखासे साननि सिगाडाव ब्रेइन सार्जारि खालामजानानै बिनि देहा हालोदआ मोजाङाव फैनानै देहा फाहामसालिनिफ्राय उदां जानायनि उनावनो 25 नभेम्बरखालि हरखाब हार्ट एटेक जानायनि जाहोनाव रुंसारि जायो। थैनाय समाव माराडनानि बैसोया 60 बोसोर जाबायमोन। बिथाङा 1960 माइथायनि 30 अक्टबरनिफ्राय आर्जेन्टिनानि मिथिसारजानाय ब्युनर्स आयार्स प्रदेशनि गंसे देहा फाहामसालियाव जोनोम मोन्नायनि उनाव 12 बोसोर बैसोयावनो फुटबल गेलेमुआव बाहागो लानानै लासै-लासै गावनि गेलेनाय केरियारखौ जागायजेन्दोंमोन। मख'जाथावदि, फिफानि प्लेयार अफ डा 20 सेन्सुयेरि बान्थाखौ आजावनो हानाय माराडनाआ 1986 माइथायाव मेक्सिक'आव जानाय फिफा वर्ल्ड कापनि गेलेनायाव गावनि सोमो नांथाव गेलेनायजों गलखौ इंलेन्डनि हेंथायै होनो हानानै ट्रफीखौ आर्जेन्टिनाया देरहानो हानायाव जाफुंसारदोंमोन। थांनानै थानाय समसिम बिथाङा गेलेनायनि गेजेरजों गुबुन गुबुन फसंथाननिफ्राय गोबां माननि बान्थाखौ देरहानो हाबोनानै फुटबलनि गुबुन सासे गेदेमा आरो मुंदांखा गेलेगिरि जानो हादोंमोन।

Share with your friends!

Related Posts

आसाम इयुथ अलिम्पिक 2022 आव तामुलपुरनि गेलेगिरिफोरा मोननै सना आरो मोननै रुफानि मेडेल दारहासारदों

आसाम इयुथ अलिम्पिक 2022 आव तामुलपुरनि गेलेगिरिफोरा मोननै सना आरो मोननै रुफानि मेडेल दारहासारदों

रनाल्डनि गलआ बेकार: सिरि-एआव भेरोनाया जुभेन्टासजों ड्र लाखियो, प्रिमियार लीगआव मेनसिटिआ लान्थ्रियैनो 20 थि मेच देरहादों

रनाल्डनि गलआ बेकार: सिरि-एआव भेरोनाया जुभेन्टासजों ड्र लाखियो, प्रिमियार लीगआव मेनसिटिआ लान्थ्रियैनो 20 थि मेच देरहादों

आगु वर्ल्ड सेम्पियनखौ फेजेन्नानै रेसलिंआव सना मेडेल देरहाबाय भिनेश फगातआ

आगु वर्ल्ड सेम्पियनखौ फेजेन्नानै रेसलिंआव सना मेडेल देरहाबाय भिनेश फगातआ

भारतनि हान्जाया जोबथा मेचयाव मुलुगनि नैथि हान्जा आर्जेन्टिनानि हेथायै ड्र गेलेदों

भारतनि हान्जाया जोबथा मेचयाव मुलुगनि नैथि हान्जा आर्जेन्टिनानि हेथायै ड्र गेलेदों

Published by

Bodosa


Bodosa is a Daily Newspaper, printed in Bodo language.

Leave Your Comment Here