• Home
  • /
  • Regional
  • /
  • माजुलिनि दरियापाराव थानाय माजुलि फरायसालिमानि गेलेग्रा फोथाराव माजुलि जिल्लानि 5 थि गाइसन्थाय सान फालिदों

September 9, 2020

माजुलिनि दरियापाराव थानाय माजुलि फरायसालिमानि गेलेग्रा फोथाराव माजुलि जिल्लानि 5 थि गाइसन्थाय सान फालिदों

दिसपुर, 9 सेप्तेम्बर: आसामनि गिबि मन्थ्रि सर्बानन्द सनवालआ 8 सेप्तेम्बरखालि माजुलिनि दरियापाराव थानाय माजुलि फरायसालिमानि गेलेग्रा फोथाराव माजुलि जिल्लानि 5 थि गाइसन्थाय सान आरो जिल्ला दाफुंनाया 4 बोसोर आबुं जानायखौ लोब्बा लाखिनानै खुंनाय हाबाफारियाव गाहाय आलासि महरै बाहागो लायो। हाबाफारियाव बाहागो लानाय गोबां राइजो-राजाफोरखौ थांखिनानै लाखिनाय बिबुंथियाव गिबि मन्थ्रिआ बुङोदि, महापुरुष गुरु मनिकान्सन फोनांजाब थिलि गोथार माजुलिनि खमैबो 2 लाख राइजो-राजाफोरनि थाखाय दिनैनि साना मोनसे जारिमिनारि सान। आथिखालनि राइज्यो सरकारा खुंथायाव फैनायनि 3 दाननि उनावनो 2016 माइथायनि 8 सेप्तेम्बरखालि भारत रत्न देंखोगिरि ड० भुपेन हाजरिकानि गोथार जोनोम सानखालि माजुलिनि राइजो-राजाफोरनि मोनसे गोलाव समनिफ्रायनो दाबिबोनाय जेंनाखौ सुस्रांनानै माजुलिया राइज्योनि गेजेराव मोनसे आबुं जिल्ला महरै जोनोम मोन्दोंमोन। जिल्ला दाफुंनायनि साननिफ्रायनो थांनाय मोन 4 बोसोराव माजुलिनि बिखायाव मा मा सोलायनाय फैदों बेखौ माजुलिनि थागिरि राइजो-राजाफोरानो नुनो मोन्दों ।

CM of Assam

गुदि थाखोनिफ्राय सोलायनायजों लोगोसे जिल्लानि रांखान्थि-सामाजखान्थि बिथिङाव गोदान लामानि मिजिंखौ मोन्नो हानानै राइजो-राजाफोरा ओरैनो गोजोन्नानै थाब्लाल' जानाय नङा। दिनैनि बे गोथार सानाव माजुलि जिल्लाखौ दरसे जौगाखां महरै मुलुगनि बिखायावनो दरसे आदर्श जिल्ला महरै फसंथानायनो साफ्रोमखौबो समायलानो गिबि मन्थ्रिआ माजुलिनि थागिबि राइजो-राजाफोरखौ खावलायो। बे गोथार हाबाफारियाव गिबि मन्थ्रिआ माजुलिनि रांखान्थि-सामाजखान्थि जौगानायनि बिथिङाव मोनसे जारिमिनारि फोसावनानै गासै 120.70 कौटि रां बाहायनायजों मोन 329 बिथांखिखौ बेखेवो आरो अन्थाय खाम्फा गाइसनो। गिबि मन्थ्रि सनवालआ बुङोदि, माजुलिनि थागिबिफोरनि अन्नाय आरो हेफाजाब होनायनि थाखायनो बे जिल्लाजों लोगोसे आसामनि 3 कौटि 50 लाख सुबुंफोरनि थाखाय सिबिथाय होनायनि खाबु मोन्दों। बेनि थाखाय माजुलिनि थागिबि राइजो-राजाफोरनि खाथियाव अरायसमनि थाखाय बिबान गोनां जानानै थानायखौ रायखांनानै बुंबावोदि, माजुलिनि राइज्योफोरनि गोहो, हेफाजाबखौ सिनायथिनानै दै बाना लोमसावनाय आरो हा खुरखानाय जेंनाजों भुगिनांनाय सुबुंफोरखौ रैखाथि होनायनि राहा लादों। माजुलिखौ बिथा खालामनानै आत्मनिर्भर आसाम आरो आत्मनिर्भर माजुलि खालामनायनि थाखाय दिनैनि सानावनो माजुलिनि साफ्रोमबो लाइमोनफोरा बिबान लानायजों लोगोसे सांग्रां जानांगोन।

थांनाय समफोराव आसामनि गुबुन गुबुन हारि-हारिसानि राइजो-राजाफोरनि गेजेराव आसार खान्थिया फारागथि जानायनि दासिम जेबो जाथायफोर नुजाथियाखै। राइज्यो सरकारा साफ्रोमबो राइज्योनि थागिबिफोरनि फोथायनाय आरो अन्नायनि थाखायसो खुंथाया जाफुंसारदों होन्नानै बुनायजों लोगोसे राइजो-राजानि खाथियाव थायोब्लासो सुबुं खुंथाया गोख्रोंसिन जायो। थांनाय मोन 4 बोसोराव राइज्योनि 70 लाख नख'रफोरखौ गुबुन गुबुन अन्साय बिथांखिनि गेजेरजों सामाजिक रैखाथि आरो रांखान्थि रैखाथि होनायनि थाखाय सरकारा नाजाबोबाय थाबोदों होन्नानै गिबि मन्थ्रिआ बुङो । गाहाय मन्थ्रिनि आदर्शजों आइजोफोरखौ फोजौखांनायनि बिजोंजों आइजो रैखाथिनि थांखियाव आजावना लानाय मोनसे गिदिर हाबाफारि हिसाबै फैगौ 2 अक्टबराव राइज्यो सरकारा बेखेवनो गोनां 'अरुनदय बिथांखि दाफुंनायनि गेजेरजों साफ्रोमबो राइजो-राजाफोरखौ सांग्राङै नोजोर लाखिनो फोसावना गिबि मन्थ्रिआ बुङोदि, समाजयाव नंखाय फोसावनो नाजानाय माखासे गावस्रा होग्रा, बेरेखा गोहोया गुबुन गुबुन बाथ्राजों बिबुंथि लाखिनानै राइजोराजाफोरनि गेजेराव बेले-बेजे खालामनो नाजानायखौ सुबुंफोरा जेबो खोमा होनाङा ।

बे हाबाफारिनि गेजेरजों देंखोगिरि ड० भुपेन हाजरिकानि लोब्बायै बिथांनि गोसोखां सावगारियाव बिबार बावनानै गिबि मन्थ्रिआ बुडोदि, शंकरदेबनि अद्यमिक जांख्रिथायनि आदर्शजों भुपेन हाजरिकायाबो सानख' हायै देंखो रोजाबबोदोंमोन । मख'नो गोनांदि, गिबि मन्थ्रि सर्बानन्द सनवालआ 52.70 कौटि रां बाहायनानै लुफुंनो लानाय गुबुन गुबुन बिफाननि 146 बिथांखिफोरखौ बेखेवो। बेनि गेजेराव 120 लाख रां बाहायनानै दै सम्फद बिफाननि मोनसे बिथांखि आरो गुबुन माखासे जेरै पिडब्लिउडि, जिब-जुनात फिसिनाय बिफान, हा-संरैखाथि बिफान, प्रधान मन्थ्रि आबाद बिथांखि बायदि लाख रांनि बिथांखिफोरखौ फारियै बेखेवदों। फारसेथिं गिबि मन्थ्रिआ 68 कौटि रां बाहायनानै आखायाव लानाय गुबुन गुबुन बिफाननि गासै 183 बिथांखिनि अन्थाय खाम्फाबो गाइसन्नाय जायो।  बे हाबाफारियावनो गिबि मन्थ्रि रेसम बिफाननि सिङाव सा 205 मुलाम्फायारिफोरनो होनो थिसन्थायनि थाखाय बिथांखि लानो रांखान्थि हेफाजाबनि चेक होनाय हाबाफारिखौबो जागायजेनो। माजुलि जिल्लानि टुंगिरि बिक्रम खैरिया बराय बिबुंथि लाखिनायजों जागायजेन्नाय हाबाफारियाव राइज्यो सरकारनि साहा जनजाति आरो श्रमिक कल्यान बिफाननि मन्थ्रि सन्जय किसान, लक्षीमपुर लक सभा बियाबनि एमपि प्रधान बरुवा, धेमाजिनि एम एल ए ड० रनुज पेगु आरो माजुलि बियाबनि एमएलए बिमल बरा मोनहाबो बाहागो लानानै गिबि मन्थ्रि सर्बानन्द सनवालआ आजावना लानाय राहा, हाबाफारिनि थाखाय बिथांखौ साबायखर बाउवो।

Share with your friends!

Related Posts

आसामाव जेब्लासिम BJP सोरखार थागोन अब्लासिम फिसा फिसा हारि हारिसाफोरनि मोन्थायफोरा जोबस्रांलांगोन : कास्तम बसुमतारि

आसामाव जेब्लासिम BJP सोरखार थागोन अब्लासिम फिसा फिसा हारि हारिसाफोरनि मोन्थायफोरा जोबस्रांलांगोन : कास्तम बसुमतारि

संका बानदो, जामफैनि दैखौ बानदो थेनानै दै दिखांनो हायैजों जिंगा सिनांदों माखासे आबादारिफोरा

संका बानदो, जामफैनि दैखौ बानदो थेनानै दै दिखांनो हायैजों जिंगा सिनांदों माखासे आबादारिफोरा

11 मेनिफ्राय मेट्रिक आन्जादखौ खुंनो फोसावबाय

11 मेनिफ्राय मेट्रिक आन्जादखौ खुंनो फोसावबाय

तिवा गावखुंथाय गौथमनि गाहाय मावफुंगिरि महरै जिबन चन्द्र कुवँरआ समायखिरा लाबाय

तिवा गावखुंथाय गौथमनि गाहाय मावफुंगिरि महरै जिबन चन्द्र कुवँरआ समायखिरा लाबाय

Published by

Bodosa


Bodosa is a Daily Newspaper, printed in Bodo language.

Leave Your Comment Here