गोदान दिल्ली, 25 आगस्ट: हादतयाव सुबुंफोरा सिगाङावनो करना भाइरासनि जाहोनाव गोबां जेंनायाव गोग्लैखांबाय। आरोबाव दा हादतनि माखासे जायगाफोराव जानाय रोजा अखा आरो हा गिसिखानायनि जाहोनाबो सुबुंफोरखौ भुगिहोगासिनो दङ। बेनि गेजेरजों भारतयारि बोथोर बिगियान बिफाननि बायदिब्ला, फैगौ सान 3 एबा 25 निफ्राय 27 आगस्टसिमाव दिल्ली एनसिआरजों लोगोसे हारियाणा, जम्मु, हिमाचल प्रदेश, उत्तराखान्ड, सोनाब बंग, छत्तीसगड़, झारखान्ड आरो उरिष्याआव रोजा अखा हानो हागौ।
बेराफार्से हादतनि सा बाहागोआव हारियाणा, पान्जाब, चन्डीगड़ आरो उत्तर प्रदेशयाव 26 आरो 27 आगस्टखालि आलादा आलादा जायगाफोरावबो रोजा अखा हानो हागौ। अदेबानि बोथोर बिफाननि बाइदिब्ला, जम्मु, बाल्टिस्तान, गिलगिट, मुजाफ्फराबाद, लाद्दाख आरो हिमाचल प्रदेशयाव सारअन्थाइ गोग्लैनायजों लोगोसे रोजा अखा हानो हागौ। 25-27 आगस्टनि गेजेराव उत्ताराखान्डआव रोजा अखानि एलार्ट फोसावदों।
तामिलनाडुनि उफ्रा बाहागोआव 24-26 आगस्टनि गेजेराव एसे बिबांनि अखा नुनो मोन्नो हागौ। बेजों लोगोसे अन्ध्र प्रदेश आरो तेलंगानाआव 25-26 आगस्टआव आरो संगानि ओन्सोलफोराव 25-27 आगस्टनि गेजेराव रोजा अखा हानो हागौ। बेराफार्से आसाम, अरुणाचल प्रदेश, सिक्किम, नागालेन्ड आरो मेघालयआवबो गेजेर थाखोनि बांसिन अखाखौ जागायजेन्नाय सप्ताहनिफ्राय ननो मोन्नो हागौ।
दिल्लीआव 26 आगस्टनिफ्राय थाद' थाद' रेजेंनिफ्राय गेजेर थाखोनि अखाया सप्ताह जोबथासिम सोलिबाय थागोन। इएसडिनि हमदांनाय बाइदिब्ला, दिल्ली-एनसिआरजों लोगोसे हारियाणानि गुरुग्राम, करीदाबाद, पलबल, नुह आरो रेवाड़ीआव एसे बिबांनि अखा हानो हागौ।
