• Home
  • /
  • Regional
  • /
  • मरान आरो बेंगली, गर्खा फरायसा आफादनि थान्दै हान्जाजों गिबि मन्थ्रिआ जथुमदों

August 30, 2020

मरान आरो बेंगली, गर्खा फरायसा आफादनि थान्दै हान्जाजों गिबि मन्थ्रिआ जथुमदों

(मोन 6 हारिसाफोरनि एसटि होनायनि खेंफोरथिखौ थाबैनो मिरु सरकारनो दैथायहरगोनःसनवाल)

दिसपुर, 29 आगस्ट: आसाम सरकारआ बाङाइ साननि गेजेरावनो मोन 6 हारिसाफोरनि एसटि खालामनायनि सोमोन्दोआव मन्थ्रि हान्जानि खेंफोरथिलाइखौ मिरु सरकारनिसिम दैथायहरगोन। मरान हारिसानि थाखाय सिगां समावनो फोसावनाय गाव खंथाय परिषदखौबो थाबैनो मावफुनायनि राहा लानाय जागोन। दिनै मरान हारिसानि गुबुन गुबुन आफादनि थान्दै हान्जाजों मोगा-मोगि सावरायनाय समाव गिबि मन्थ्रि सर्बानन्द सनवालआ बे गोनां बाथ्राखौ फोसावदों। आसाम एडमिनेस्ट्रेटिभ स्टाफ कलेजआव हारिसाफोरनि थान्दैफोरजों जथुमनायाव गिबि मन्थ्रि सर्बानन्द सनवालआ बुडोदि, आसाम सरकारआ मरानफोरनि जेंनाखौ समाधान खालामनायनि थाखाय गोनांथार राहा लाबोगासिनो दङ।

मरानफोरनि गोलाव समनिफ्राय दाबिबोनाय जेंनाफोरखौ समाधान खालामनो थाखाय सिगां फार्से आवगायदों। एसटि खालामनायनि सोमोन्दोआव गिबि मन्थ्रि सनवालआ बुङोदि, आसाम सरकारआ बे आयदानि सायाव गोनांथारै मिरु सरकारजों सावरायदों। मिरु सरकारनि बिथोनआव आसाम सरकारआ मन्थ्रि हान्जा दाफुंनायनि बाथ्राखौबो रायखांनानै गिबि मन्थ्रिआ बुङोदि, बे मन्थ्रि हान्जाया राइज्योआव दासान्दि थानाय हारिसाफोरजों लोगोसे गुबुन हारिफोरजोंबो सावरायनाय जादों। दासान्दि बिसोरनि मोन्थायनि सार्थ आरो मोन्थायखौ होनो थाखाय आसाम सरकारआ राहा लानाय बादियै मन्थ्रि हान्जाया खम समनि गेजेरावनो खेंफोरथिलाइखौ मिरु सरकारनिसिम दैथायहरगोन।

Gorka, Bengoli Moran And Student Union

सोलोंथाय आरो रांखान्थि-सामाजिक बिथिङाव मरानफोरा गोबां गोग्लैसोनानै दङ होन्ना रायखांनानै गिबि मन्थ्रि सनवालआ बुङोदि, गुबुन गुबुन हारिफोरजों लोगोसे हारिसाफोरखौबो बोखांनाय आरो सिगां फार्से लानानै थांनो मोनसे संबिधानिक राहानि गोनांथि दङमोन। बे बाथ्राखौ गोनांथि होनानै आसाम सरकारआ हारिसाफोरनि थाखाय गावखुंथाय परिषद दाफुनायनि राहाखौ आखाइयाव लादों आरो खम साननि गेजेरावनो बे लानाय राहाया मावफुजागोन। राइज्योनि फिसा-फिसा मोनफ्रोमबो हारि-हारिसाखौ सिगां फार्से लानानै थांनायाव आसाम सरकारआ खामानि मावदों।

बे बाथ्राखौ रायखांनानै गिबि मन्थ्रि सनवालआ बुङोदि, मरान हारिसानि जारिमिन बोखांनायनि थाखाय आरो दाफामनायनि थाखाय राइज्यो सरकारआ दासान्दि जैरैबादि राहाखौ आखाइयाव लादों बेनि फिथाइ महरै दाफामजागोन जारिमिनआ हारिनि जौगानाय, गोहो आरो बिबानखौ सुबुंनि गेजेराव लांनायनि अनगायैबो बे जारिमिनआ राइज्योनि थुनलाइ बिथिङाव मख'जाथावना फोनांजाब होगोन। गिबि मन्थ्रि सनवालआ हारिसानि दुलाराय जौगानायनि थाखाय आसाम सरकारआ गासै 125 कौटि रां बाहायनानै दाफामनो लानाय प्रकल्पनि अनगायैबो गुबुन गुबुन जेंनाफोरखौ समाधान खालामनायनि फार्से थोजासे राहा लानाय जागोन होन्नानै बुङो।

मरान हारिसानि थान्दैफोरा बे जथुमनायाव गिबि मन्थ्रि सनवालनो गुबुन गुबुन दाबिनि गांसे गोसोखालाइखौ गथायो। थान्दैफोरा हारिसानो एसटि खालामनायनि फार्से आसाम सरकारआ आजावना लानाय राहाखौ बाख्नायनानै आरो मन्थ्रि हान्जानि खेंफोरथिलाइखौ खम समनि गेजेरावनो मिरुनिसिम दैथायहरनो खावलायो। गावखंथाय परिषद दाफुनायनि फार्सेबो थाबैनो मावफुनायनि राहा लानो थान्दै हान्जाया गिबि मन्थ्रिखौ खावलायनायनि अनगायैबो हारिसानि रांखान्थि-सामाजिक आरो सोलोंथाय जौगानाय आयदानि सायावबो बाथ्रा देखाङो। बे जथुम्मायावनो तिनिसुकियानि बाघजान मिलनज्यति संघनि मोनसे थान्दै हान्जाया गांसे गोसोखांलाइखौ गथायनानै बाघजान गेस कुपनि अर जोब्लावनायनि जाउनाव खहा जानाय सुबुंफोरनो खहाथि सुफुनायजों लोगोसे अर खोमोरनाय बिथिअव गोनांथार राहा लानो थाखायबो गिबि मन्थ्रि सनवालखौ खावलायदों।

Bengoli, Gorka Moran And Student Union

थान्दै हान्जाया मिबथिहोनाय आयदाखौ नोजोर होनानै गिबि मन्थ्रि सनवालआ खहा सुफुंनायजों लोगोसे गेस लिक जानानै अर जोब्लावनाय आयदायाव थाबैनो अयेलनि बिबानगिरिफोरजों सावरायनाय जागोन होन्नानै बाथ्रा होयो। दिनैनि बे गोनां सावरायनाय मेलआव राइज्योयारि मन्थ्रि नब कुमार दले, गिबि मन्थ्रिनि मिडिया बोसोनगिरि ऋषिकेश गस्वामी, सदिया बियाबनि एमएलए बलिन चेतिया, उफ्रा सिफ सेक्रेटारि जिष्णु बरुवा, पुलिस नायसंगिरि हिरेन नाथ, गिबि मन्थ्रिनि सिफ सेक्रेटारि सन्जय लहिया, थाखो अन्साय बिफाननि जुथाय नेहाथारि ङ एम अंगमतु, राइज्यो सरकारनि माखासे गागि बिबानगिरिफोर, दुलाराय मरान फरायसा आफादनि आफादगिरि अरुनज्यति मरान आरो आफादनि थान्दै सोद्रोमाफोराबो बाहागो लादोंमोन।

गुबुन फार्सेथिं दुलाराय आसाम बेंगली लाइमोन फरायसा फेडारेसन आरो दुलाराय आसाम गर्खा फरायसा आफादनि मोननै थान्दै हान्जाया गिबि मन्थ्रि सर्बानन्द सनवालजों बे जथुमआवनो लोगो हमनानै गुबुन गुबुन दाबिनि गोसोखांलाइखौ गथायदों। मोननै थान्दै हान्जाया गिबि मन्थ्रिजों आलादाआलादायै जथुमनायबो जायो। बे जथुमनायाव गिबि मन्थ्रि सनवालआ बुङोदि, आसाम सरकारआ बराक-बुर्लुबुथुरनि असमीया बेंगलीफोरखौ रैखाथि होनायनि राहा लादों।

आथिखालनि राइज्यो सरकारनि माव बिबानआव असमीया बेंगली सुबुंफोरा आबुङैनो रैखाथिआव दङ। फैगौ दुर्गा फुजाखौ थांखि लानानै राइज्यो सरकारआ फुजा खुंनायनि फार्से सामाजिक जान्थाय थानाय हुदाखौ मानिनानै फुजा कमिटिफोरखौ फुजा खुंफुंनो थाखाय गनायथि होगोन। फिसा-फिसा फालांगिफोरा रांखान्थि हालोदजों मोगा-मोगि जानांनाय बिथिङावबो राइज्यो सरकारआ सान्नाय-हनाय खालामनानै सावरायदों होन्नानै गिबि मन्थ्रिआ बुङो। बेंगली लाइमोन फरायसा फेडारेसननि थान्दैफोरा गिबि मन्थ्रि सनवालनि दैदेन्नायाव राइज्योनि हिन्दु बेंगलीफोरा मोगा-मोगि जानाय जेंनाफोरा समाधान जागोन होन्नानै मिजिंथि लाखियो।

गिदिर असमीया हारि दाफुनायाव हिन्दु बेंगलीफोराबो लोब्बा दङ होन्नानै रायखांना थान्दै दैदेनगिरिआ डि-भटारफोरखौ मिबथिहोनायजों लोगोसे डिटेन्सन केम्पआव थानाय हिन्दु बेंगलीफोरखौ उदां खालामनाय, हिन्दु बेंगलीफोरनि थाखाय सेटेलाइट काउन्सिल दाफुनाय बायदि गुबुन गुबुन दाबि देखाङो। गुबुन फार्सेथिं दुलाराय आसाम गर्खा फरायसा आफादनि थान्दै हान्जाया गिबि मन्थ्रिखौ लोगो हमनानै गोसोखांलाइ गथायनानै गर्खाफोरनि थाखाय गावखंथाय परिषदजों लोगोसे गर्खाफोरा हा पात्ता मोन्नायनि फार्से मोगा-मोगि जाबोनांनाय जेंनाफोरखौ गिबि मन्थ्रिनि सिगाङाव फोरमायना होयो।

बेनि अनगायैबो आसाम-मेघालय सिमना ओन्सोलाव थानाय लाम्पिआव जिउ खुंनाय गर्खाफोरनि जौगानाय बिथिङावबो गोनांथार राहा लानो थाखाय थान्दै हान्जाया गिबि मन्थ्रिखौ खावलायो। गिबि मन्थ्रि सनवालआ बुङोदि, दुलाराय आसाम गर्खा फरायसा आफादनि थान्दै हान्जानि दाबि दैखांनाय आरो खावलायनायखौ गोनाथार नोजोरजों राइज्यो सरकारआ गावखुंथाय परिषद दाफुंनायनि सायाव थाबैनो मावफुंनायनि राहा लागोन।

Share with your friends!

Related Posts

क’क्राझार सोरखारि फरायसालिमायाव ईशान चन्द्र मोसाहारी फोथायफुनजि बेनि सेथि गोसोखां बिबुंसार हाबाफारि खुंदों

क’क्राझार सोरखारि फरायसालिमायाव ईशान चन्द्र मोसाहारी फोथायफुनजि बेनि सेथि गोसोखां बिबुंसार हाबाफारि खुंदों

Grand Assam 2022 आव Ushna Basumatary आ Grand Miss Assam  Eminent 2022 बिमुंखौ मोननो हादों ।

Grand Assam 2022 आव Ushna Basumatary आ Grand Miss Assam  Eminent 2022 बिमुंखौ मोननो हादों ।

दुलाराइ बाथौ गौथुमनि आफादगिरि ड० लिलाधर ब्रह्मनि बान्द्रा आसारखौ दिनै खुंफुंबाय।

दुलाराइ बाथौ गौथुमनि आफादगिरि ड० लिलाधर ब्रह्मनि बान्द्रा आसारखौ दिनै खुंफुंबाय।

फैगौ 10 नबेम्बर खालाराव अदालगुरियाव करेन्द्र बसुमतारिनि सारादु खुंगोन ।

फैगौ 10 नबेम्बर खालाराव अदालगुरियाव करेन्द्र बसुमतारिनि सारादु खुंगोन ।

Published by

Bodosa


Bodosa is a Daily Newspaper, printed in Bodo language.

Leave Your Comment Here