कक्राझार, 13 सेप्तेम्बरः आसामनि सुबुं अन्साय आरो हा सं रैखाथि बिफाननि मन्थ्रि प्रमिला रानि ब्रह्मआ गामिसिम थांनि थौ, हाबाफारिखौ शनिबारखालि कक्राझार जिल्लानि भारत-भुटान सिमा ओनसोलाव थानाय उल्टापानी सरलपारायाव जागायजेनो।
बिफाननि गुबुन गुबुन बिबानगिरिफोरखौ लोगोसे लानानै भारत आरो भुटान सिमनाजों नांजाबफा उल्थाफानियाव मोनसे हाबाफारिनि लानायनि गेजेरजों बेखेवनानै होयो गामिसिम थांनि थु हाबाफारिखौ।
जिल्लानि गोबांथार गागि बिबानगिरि, बिफानारि मावथिफोरा बे मेलाव बाहागो लायो। बेबादिनो मख'जानाय बिथांखिनि आवथायाव राइज्यो नाङै लाजानाय बायदि जौगालु हाबा-हुखानि सायावबो ब्रह्मआ बिफानारिफोरनिफ्राय सुलु लायो।
मन्थ्रि ब्रह्मआ फोरमायनाय बायदिब्ला गोदोसोनाय ओन्सोलाव बे हाबाफारिखौ लानाय जादों गुदियै जिल्लानि आरो राइज्योनि सुबुंफोरनि गाहाम आरो जौगाखांनायनि थाखाय।
बिथाङा बुंबावनाय बायदिब्ला गावनि फारसेनिफ्राय अरायसम गामियारि नोगोरारिफोरनि जौगाखांनायनि थाखाय नोजोर होबोदों आरो बेबायदिनो दिनै हा संरैखाथि बिफानआ मावख'गिरिफोरनि मोनसे गोनांथार जथुमखौ उल्थाफानियाव लानाय जादों।
बिथाङा बिफानारि साफ्रोमबो मावख'गिरिफोरखौनो गामियारि ओन्सोलसिम थांना राइजो-राजानि जौगाखां हाबा-हुखायाव नांथाबनो खावलायो। मन्थ्रि ब्रह्मआ फोरमायदोंदि, आसाम सरकारनि हा संरैखाथि बिफानआ सरासनस्रा सुबुंफोरनि थाखाय मोजां हाबा मावबोदों। साफ्रोम मावसुमाफोरखौनो बिथांखिनि खामानिफोरखौ थि समनि गेजेराव मावफुंनो बिथोन होयो।
