गुवाहाटी, 6 सेप्तेम्बर: आसाम सरकारनि पन्सायत आरो गामि जौगाखां बिफाननि मन्थ्रि नब कुमार दलेआ शनिबारखालि सान्नैनि हाबाफारिजों आफां आसामनि धुबुरि जिल्लायाव दावबायहैनानै जिल्लानि गुबुन गुबुन गाव पन्सायतआव 14 थि रांखान्थि आयगनि गनायथिनि सिङाव मोनथाम बिथांखिखौ बेखेवना होदों। बेफोर बिथांखिफोरा जादों रङामाती गाव पन्सायत मावखुलि भवन, पलिमारि कृष्णपल्ली गाव पन्सायतनि सिङाव सैबारि साहा बागान हातपला कालि मन्दिरनि लांगोनायाव पाक्कानि बेरा लुफॅनाय आरो बरुनीतरा बरदल गाव पन्सायतनि सिङाव लुफुंनाय मोनसे लामा। बिफाननि सिफ सेक्रेटारि ड० जेबि एक्का आरो सामलायगिरि हेमेन दासजों लोगोसे मोनसे बिबानगिरि हान्जाया दावबायनायाव मन्धिआ बे बिथांखिफोरखौ बेखेवनायनि समाव सान्जा बिलाशिपारा बियाबनि एम एल ए अशक कुमार सिंघिआबो बाहागो लादोंमोन।
बिथांखि बेखेवना होनायनि बिबुंथियाव बिफाननि मोनफ्रोमबो खामानिफोरखौ थि समावनो मावफुंनो थाखाय बाहागो लानाय पन्सायतनि कर्मसारि आरो सुबुं थान्दैफोरखौ मन्थ्रि नब कुमार दलेआ फोसावदों। मन्थ्रिआ लोगोसेनो मोनफ्रोमबो बिथांखिनि मुलाम्फायारिफोरखौ सायख'नाय आरो पर्टेलनि गेजेरजों फैफिन्नाय सुबुंफोरनि मुं रेजिस्ट्रेसन खालामनाय बायदि बिथिङाव सांग्रांथि होनो गोनांथार होदों।
फार्सेथिं प्रधान मन्थ्रि आवाज यजना ग्रामिननि उफ्रा फारिलाइआव मुं थानायफोरा आधार कार्डखौ लानानै जेबो जिंगा सिनाङा होन्नानै बुनायजों लोगोसे दासान्दि बेनि सोमोन्दोयाव मोनफ्रोमबो जिल्लानि खुंगिरिया बिसोर मुलाम्फायारिफोरनि थाखाय आधार कार्डनि राहा खालामनानै होनो थाखाय बिथोन होनाय जाबाय होन्नानै मन्थ्रिआ बाथ्रा होयो। बे बिथांखि बेखेवनायनि उनावनो मन्थ्रिआ धुबुरियाव गुबुन मोनसे सावराय मेलयाव बाहागो लानानै जिल्लायाव बिफाननि सिङाव दाफुंजानाय गुबुन गुबुन बिथांखिनि सोमोन्दोयाव खौरां लायो।
