मदि सरकारा जारिमिनारि हाबाफारि मावफूंदों, 1 कौटि नख’राव दैनि कानेक्सन होबाय

दिल्ली/जयपुर, 14 आगस्ट: गाहाय मन्थ्रि नरेन्द्र मदिनि नख'रफ्रोमबो दैनि सिमांखौ जाफुहोनो थाखाय मिरुआरि दै बिफाना बोसोरसेनि खम समावनो 1 कौटि नख'रफोराव लोंग्रा दैनि कानेक्सन होनानै जारिमिनारि खामानि मावबाय। करना बेरामनि गेजेरजोंबो दै बिफाना हादतनि 1 कौटि नख'रफोरखौ नलि कानेक्सनजों सरजाबनाय। अदेबानि मिरुआरि दै मन्थ्रि गजेन्द्र सिं शेखावतआ खौरां होनाय बायदिब्ला खम समनि गेजेराव एसेबां गिदिर जाफुसारनाया गासै राइज्योफोर आरो मिरुजों खुंजानाय राइज्योफोरनि गेजेरजों नाजानायखौ फोरमायो। बेनि गेजेरजों थांनाय बृहस्पतिबारखालि शेखावतआ बु़ङोदि, आनलक-1 जागायजेन्नायनिफ्राय बिसोर सानफ्रोमबो 1 लाखनिक्रुइ बांसिन नख'रफोरनो नलि कानेक्शन होगासिनो दङ। अदेबानि मिरु दै सम्पदनि मन्थ्रि गजेन्द्र सिंआ फोरमायनाय बायदिब्ला, जल जीवन मिशननि 3.60 लाख कौटिनि बे यजनानि गेजेरजों फैगौ 2024 सिमाव मोनफ्रोम गामियारि नख'रफोरनाव नालाजों दै सौहैहोनाय जागोन । जोंनि हादतयाव 19.04 कौटि गामियारि नख'र दङ, जायफोरनि गेजेराव 3.23 कौटि नख'रफोराव दैनि कानेक्शना सोलिगासिनो दङमोन। बे जल जीवन मिशननि माखासे धोनखौ मिरु सरकारा होगोन आरो खावसे खरसाखौ राइज्योफोरा गावसोरनो दिखांनांगोन । बेनि गेजेरजों बिहार, गवा, पुन्डेचेरी, तेलेंगानाया 2021 आव गुजरात, हारियाणा, हिमाचल प्रदेश, जम्मु-काश्मीर, लाद्दाख, मेघालय, पान्जाब, सिक्किम, उत्तर प्रदेश 2022 आव अरुणाचल प्रदेश, कर्नाटक, मध्य प्रदेश, मणिपुर, मिजराम, नागालेन्ड, त्रिपुरा, छत्तीसगड़आ 2023 आव आरो आसाम, अन्ध्र प्रदेश, झारखान्ड, केरेला, महाराष्ट्र, उड़िष्या, राजस्थान, तामिलनाडु, उत्तराखान्ड, सोनाब बंगआ फैगौ 2024 सिमाव मोनफ्रोम नख'रावनो नलिजों दै सौहैहोनायनि थांखि लादों होन्नानै सुलुङाव फोरमायनाय जादों।