गोदान दिल्ली, 6 सेप्तेम्बर : सान्जा लाद्दाखआव चीनजों सोलिबाय थानाय सान्थ्रिनि दावराव-दावसिनि गेजेरआव भारत आरो रुसनि दै सान्थ्रिफोरआ सोनाब बंगनि बंगप लैथोमायाव दरनै हादतनि नेभिफोरा दावहानि हुदा खालामनो जागायबाय। बेनि थांखिया गुबुन गुबुन रैखाथि सेलेन्सफोरखौ नोजोर होनानै समानथिखौ बांहोनाय। भारतीय नेभिनि बुंथिगिरि कामान्डार बिबेक मधबालआ फोरमायदोंदि, बे हुदा खालामनायनि थांखिया दरनैबो हादतनि नेभिनि गेजेरआव बुजिलायनाय आरो सान्नाय हनाय बायदि रोंगथिफोरखौ बांहोनाय आरो साबसिनै आजावलायनो हानाय।
बे दावहानि हुदा खालामनाया दरनै हादतनि नेभिनि गेजेराव थानाय मोजां सोमोन्दोखौबो दिन्थियो। मख'जाथावदि, चीननि गाग्लोबनाय आरो थुनज्लायनाय आखु दिन्थिनायखौ गोख्रों फिनजाथाय होनो थाखाय भारतआ भारत लैथोमा ओन्सोलआव दैनि सान्थ्रि हान्जाखौ बांसिनै थिसन्दों। बेयाव गोबां अन्जिमानि दावहारु गाथोन आरो साबमेरिनबो दं। भारत आरो रुसनि नेभिया जुथायै हुदा खालामनायखौ ‘इन्द्र' मुं होनाय जादों। बेयाव हा आरो आबहावायाव थानाय थांखिफोरखौ गावहरनानै सिलिंखार खालामनाय बायदिफोरखौ हुदा खालामदों। बेयाव रुसनि दावहारु गाथोन एडमिरेल बिनग्रादब, एडमिरल त्रिबुत्स आरो बरिस बुतमानि अनगायै हेलिकप्टारफोरनि हान्जाखौबो लाफादों। भारतीय नेभियाबो गावनि दावहारु गाथोन रणबिजय, सहचाद्रि, किल्टान, शक्ति आरो हेलिकप्टारफोरजों लोगोसे बे दावहानि हुदायाव बाहागो लादों ।
बे दावहानि हुदाया सोलिफुनाय समावनो भारतनि रैखाथि मन्थ्रि राजनाथ सिंआ शंघाइनि हेफाजाबगिरि फसंथाननि जथुमायाव बाहागो लानो थाखाय रुसआव थांदों। राजनाथ सिंआ थांनाय बृहस्पतिबारखालि रुसनि रैखाथि मन्थ्री जेनेरेल सेर्गेइजोंबो लोगो हमदोंमोन, जेराव सानैजों माखासे जरखा आयदाफोराव हेफाजाब होज्लायनायखौ लानानै सावरायज्लायदोंमोन। भारत-रुसनि नेभिफोरनि बे दावहानि हुदा खालामनायजों दरनै हादतनि सोमोन्दोआ आरोबाव गोनोसिन जागोन।
